نصائح تهم كل مريض قبل عملية دوالي الخصية
لو قررت تعمل عملية دوالي الخصية بالجراحة الميكروسكوبية ، لازم تبقى عارف إن فيه خطوات مهمة ونصائح أساسية لازم تكون عارفها علشان تقدر تتعافى بشكل أسرع وترفع من نسب نجاح العملية ، زي :
1/ مواعيد الأكل والشرب.
2/ والغيار على جرح العملية.
3/ والادوية اللي المفروض نلتزم بيها بعد العملية.
3/ والرجوع لممارسة الحياة الطبيعية.
4/ والمتابعة مع الطبيب المعالج لضمان نجاح العملية وتحسن وظيفة الخصية.
نصائح ما بعد عملية دوالي الخصية بالجراحة الميكروسكوبية
نبتدي من بعد الخروج من غرفة العمليات مباشرة :
- لو المريض واخد بنج نصفي بعد العملية مباشرة يقدر يشرب عادي مفيش اي مانع بالنسبة للشرب ، والأكل يقدر يأكل بعد ساعة أو ساعتين ومفيش اي موانع بالنسبة للأكل والشرب.
- أما لو المريض واخد بنج كلي ، وده بيبقي اختيار ما بين دكتور التخدير وما بين المريض نفسه ، لكن الافضل طبعاً البنج النصفي لان مضاعفاته أقل ووجع قليل جداً جداً بعد العملية.
- والمريض نفسه يقدر يخرج من المستشفى بعد ثلاث لأربع ساعات سواء كان بنج كلى أو بنج نصفي ، والبنج الكلى بعد ما نطمئن على درجة وعي المريض ونشوف هل في وجع بعد العملية ، ومحتاج ياخد مسكن قبل الخروج من المستشفى ولا لا ، لان البنج النصفي بينتظر أن تأثيره ينتهي تماماً ، والمريض رجليه تبتدي تفك ويقدر يتحرك ويروح البيت بإذن الله ، فبالتالي بعد العملية بثلاث لأربع ساعات في المتوسط المريض بيقدر يرجع البيت علي طول ، وزي ما وضحنا الأكل والشرب بيبقي عادي جداً من اول يوم بعد العملية بساعة أو ساعتين يأكل ويشرب اي حاجة ومفيش موانع بالنسبة للأكل والشرب.
- وبالنسبة لاول يوم اللي هو يوم العملية ده بيبقي فيه راحة تامة في السرير ، ومن تاني يوم سواء كان بنج نصفي أو كلي ، فالمريض يقدر يمارس حياته بطريقة طبيعية في البيت ، يعني يتحرك ويقعد ويقوم ويصلي عادي جداً ، ولكن بعد العملية بيومين أو ثلاثة بيقدر المريض ينزل الشارع بس بدون مجهود عنيف ، يعني ميبقاش في وقفة كثير وميبقاش في عرق ولا شغل ولا شيل ثقيل.
طيب أمتي نبدا نغير أو ننضف علي جرح العملية ؟
من بعد العملية ب 48 ساعة بنقدر نشيل غيار العملية وبنقدر وقتها نطهر الجرح بطريقة يومية ، وبعدها المريض بيقدر يستحمي ومفيش اي مشكلة خالص ان فى مية تيجي على الجرح بس ميسبش المية تيجي على الجرح فترة طويلة ، يعني لازم ننشف بعد الاستحمام ونطهر الجرح بمحلول ملح وبيتادين وميستخدمش القطن لتطهير الجرح لأن القطن نفسه ممكن يوسخ جرح العملية ، لكن نستخدم الشاش المعقم وبنسيب الجرح مكشوف من بعد العملية ب 48 ساعة ، وتستمر عملية التغيير على الجرح من أول 48 ساعة لحد ما نشوف المريض مرة ثانية بعد العملية بأسبوع ل 10 أيام ، وفي الأسبوع الأول بتبقي الحركة الكثير ممنوعة للمريض ، يعني مايقفش لفترة طويلة والعلاقة الزوجية بتبقي ممنوعة أول أسبوع بعد العملية.
طب ايه هي الأدوية اللي المريض بياخدها اول فترة بعد العملية ؟
بيبقي في طبعاً مضادات حيوية علشان ميحصلش التهاب لجرح العملية وفي مسكنات عشان الوجع ، فالمريض يقدر يمارس حياته بطريقة طبيعية اول أيام بعد العملية ، وبيكون في مضادات للتورم لأن وراد جدا الخصيتين يتورموا مكان الجرح ، ودي كلها حاجات بتحصل اول أيام بعد العملية وبتخف تماماً خلال 10 أيام لأسبوعين بعد العملية بإذن الله.
وبنقدر نشوف المريض بعد العملية بأسبوع ل 10 أيام علشان نطمئن على جرح العملية ونطمئن على مكان الجراحة ونطمئن على تورم الخصيتين ، والمريض يفضل مكمل على علاجات التورم لحوالي اسبوعين لثلاث اسابيع ، والمضادات الحيوية في الأغلب بتتوقف بعد العملية بأسبوع ، ولو المريض ده مشكلته الرئيسية هي تأخر الإنجاب وفي مشكلة في تحليل السائل المنوي بنبتدي العلاجات التنشيطية بعد العملية بحوالي شهر.
طب أمتي المريض يقدر يرجع لحياته الطبيعية بشكل كامل ؟
بالنسبة لـ زي ما وضحنا أن المريض بيقدر يخرج من البيت بعد ثلاث ايام ، ويقدر يرجع يمارس العلاقة الزوجية وشغله حتى لو شغله شاق بعد العملية بأسبوع ، ولو المريض رياضي أو بيروح الچيم أو بيشيل حديد أو بيشيل حاجات ثقيلة فبيقدر يرجع لكل الحاجات دي بعد العملية بشهر.
طيب أمتي ينتظر المريض حدوث تحسن من العملية سواء كانت العملية معمولة علشان الوجع أو علشان تأخر الإنجاب ؟
بيبدأ تأثير الدوالي يتلاشى والخصية تتحسن كوظيفة سواء علشان الوجع أو الإنجاب بعد العملية بثلاث لست شهور ، وبالتالي اول تحليل سائل منوي بنعمله بيكون بعد 3 ل 6 شهور علشان نقيم وضع التحليل عامل ايه ومدى التحسن اللي حصل في التحليل ، وبالنسبة للوجع فالدوالي بتبدي تختفي تماما ويحصل تجلط في الأوردة اللي احنا ربطناها خلال 3 شهور ل 6 شهور من العملية.
ولو عندك اي استفسار عن عملية دوالي الخصية بالجراحة الميكروسكوبية ، ممكن تبعتلنا على رسائل الصفحه او من خلال الواتساب 01018874287.
دكتور اسامة محمد البكل مدرس واستشاري طب وجراحة أمراض الذكورة وتأخر الإنجاب والصحة الجنسية بطب القصر العيني.
احجز الآن :