هل يسبب التدخين ضعف انتصاب؟
التدخين مش مجرد عادة ضارة بصحة الجسم، فهو أيضاً يؤثر بشكل سلبي على القوة والقدرة الجنسية عند الرجال، ويعتبر واحدة من أبرز العوامل اللي بتزيد من خطر الإصابة بضعف الانتصاب.
ومن خلال المقال ده هنتكلم عن العلاقة بين التدخين وضعف الانتصاب، وإزاي الإقلاع عن التدخين ممكن يعمل تحسن إيجابي في حياة كل رجل من الناحية الجنسية والإنجابية…
متطلبات الانتصاب الطبيعي:
بس في البداية لازم تكون عارف إن علشان يحصل انتصاب طبيعي، يحتاج القضيب لكمية مناسبة من الدم المتدفق إليه، وكمية مناسبة من إفراز هرمون الذكورة في الجسم، ورغبة جنسية كافية لانتصاب القضيب، بالتالي فإن وجود أي خلل في المتطلبات دي هيؤدي إلى ضعف الانتصاب.
وضعف الانتصاب بيحصل نتيجة خلل في الأوعية الدموية اللي بتوصل الدم إلى القضيب، والخلل ده يا إما بيكون ضعف في ضخ الدم إلى القضيب، أو إن مش بيتم الاحتفاظ بالدم داخل القضيب المدة الكافية لحد ما نخلص العلاقة الزوجية.
كيف يؤثر التدخين على قوة الانتصاب:
ودلوقتي تعالوا نعرف مع بعض إزاي التدخين بيأثر على قوة الانتصاب:
وهنا خليني أقولك إن التدخين بيسبب ضعف انتصاب، لأنه بيأثر على الأوعية الدموية والأعصاب التي تساهم في عملية الانتصاب، من خلال عدة طرق:
1. ضيق الأوعية الدموية:
وده لأن مادة النيكوتين الموجود في السجائر بتؤدي إلى ضيق في الشرايين والأوعية الدموية، وده بيمنع تدفق الدم للأعضاء التناسلية، لأن زي ما قولنا قبل كده إن الانتصاب يعتمد على تدفق الدم بشكل طبيعي للقضيب، لذلك فإن التدخين بيضعف من قدرة القضيب على الانتصاب.
2. التأثير على الأعصاب:
لأن علشان يحصل انتصاب للعضو الذكري، المخ بيقوم بإرسال إشارات عصبية للأعضاء التناسلية، علشان القضيب يستجيب للمثيرات الجنسية فيحصل انتصاب، لكن التدخين بيأثر على الأعصاب، وبما إن العضو الذكري من الأعصاب الطرفية فإنت كده هتضعف وتضر بأعصاب العضو الذكري وده هيعمل ضعف انتصاب وسرعة في القذف نتيجة التأثير على التحكم العصبي.
3. التأثير على الهرمونات:
التدخين بيأثر على توازن الهرمونات في الجسم، وخصوصاً هرمون التستوستيرون اللي بيلعب دور مهم في الرغبة الجنسية والانتصاب، وعلى الرغم إن بعض الدراسات لقت إن مستواه ممكن يكون مش منخفض عند المدخنين، لكن التأثير الضار بييجي من ضعف وظيفة الخصية، واضطراب الإشارات الهرمونية، وده ممكن يؤدي لانخفاض الرغبة الجنسية وضعف الانتصاب بشكل عام.
4. التأثير على صحة الجسم بشكل عام:
لأن التدخين بيزود من خطر الإصابة بالأمراض المزمنة زي الضغط وأمراض القلب والأوعية الدموية، وكل الأمراض دي بتزود من مشكلة ضعف الانتصاب.
تأثير التدخين على الإنجاب:
ده غير إن التدخين بيكون ليه تأثير كبير جداً على الإنجاب وممكن يكون السبب في الإصابة بالعقم أو تأخر الإنجاب:
لأن زي ما قولنا قبل كده إن النيكوتين اللي بيكون موجود في السجائر بيقلل من وصول الدم للأعضاء التناسلية كلها، وده طبعاً هيأثر على إنتاج الخصية للحيوانات المنوية، وهيسبب تشوه في الحيوانات المنوية وضعف في قدرتها على الحركة، وكمان هيزود من تكسر المادة الوراثية وكل ده بيأثر على قدرة الحيوان المنوي على تخصيب البويضة وحدوث الحمل.
فوائد الإقلاع عن التدخين للانتصاب:
وتعالي دلوقتي أجاوبك على السؤال اللي بيدور في ذهنك وهو، هل الإقلاع عن التدخين هيحسن من القدرة على الانتصاب؟
خليني أقولك أيوا، الإقلاع عن التدخين هيحسن بشكل كبير من قوة الانتصاب، لأن لما الشخص يتوقف عن التدخين، هيبدأ الجسم يتعافى تدريجياً من تأثيراته الضارة على الأوعية الدموية، والأعصاب، وصحة الأعضاء الجنسية، وده طبعاً هيزود التروية الدموية للأعضاء التناسلية وهيحسن من أنسجة القضيب، وبكده هنحافظ على الانتصاب خلال العلاقة الجنسية.
نصائح إضافية لتحسين القدرة على الانتصاب:
ودلوقتي خليني أقولك على شوية تعليمات ونصائح بجانب الإقلاع عن التدخين عشان يكون عندنا قدرة عالية على الانتصاب في العلاقة الجنسية:
1. الحفاظ على وزن صحي ومثالي:
لأن الأكل الغير صحي بيأثر على الانتصاب والرغبة الجنسية، لأنه بيرفع من نسبة الدهون في الدم وبيؤدي إلى تصلب الأوعية الدموية والشرايين اللي بتمنع وصول الدم الكافي إلى القضيب لحدوث الانتصاب.
2. الابتعاد عن القلق والتوتر:
لأن القلق والتوتر من المشاكل اللي بتؤدي إلى ضعف في الرغبة الجنسية وضعف انتصاب، علشان كده من أهم طرق الوقاية من ضعف الانتصاب الابتعاد عن التوتر وممارسة طرق الاسترخاء والتأمل.
3. ممارسة الرياضة على الأقل 3 مرات أسبوعياً:
لأن الرياضة مهمة جداً لحياتك الجنسية، ومن أهم طرق الوقاية من ضعف الانتصاب، لأنها بتعزز من صحة القلب والأوعية الدموية وبتحافظ على الوزن وبتقلل من التوتر وتجعل الفرد يشعر بالرضى عن أدائه الجنسي.
4. الحصول على قسط كافٍ من النوم:
بمعنى أن النوم الجيد من 6-8 ساعات بيساعد على إفراز هرمون الدوبامين اللي بيكون ليه علاقة بالتحكم في عضلات الجسم، وبيخلي عندك رغبة جنسية كافية لممارسة العلاقة الزوجية.
ولو عايز تعرف أكتر عن أسلوب الحياة الغير صحي اللي ممكن يسبب ضعف انتصاب، اسمع الفيديو ده مع الدكتور أسامة البكل…
خلاصة:
في النهاية، لازم تبقى عارف إن الإقلاع عن التدخين هو خطوة حاسمة لتحسين صحتك الجنسية والعامة، وإن القدرة الجنسية معتمدة بشكل كبير على صحتك الجسدية والنفسية، ومينفعش نتكسف أبداً إننا نتكلم فيها مع دكتور متخصص علشان لو عندنا أي مشكلة نكشف ونعالجها عشان تأثيرها علينا ميزيدش.
جدول زمني للتحسن بعد الإقلاع عن التدخين:
- خلال 20 دقيقة: تحسن في الدورة الدموية
- خلال 12 ساعة: انخفاض مستوى أول أكسيد الكربون
- خلال 2-12 أسبوع: تحسن الدورة الدموية ووظائف الرئة
- خلال 1-9 أشهر: تحسن ملحوظ في الأعراض الجنسية
- خلال سنة: انخفاض خطر أمراض القلب بنسبة 50%
ولو لسه عندك أي استفسار تقدر تتواصل معانا على الرقم ده 01018874287 واحنا هنحددلك ميعاد مع الدكتور أسامة محمد البكل مدرس واستشاري طب وجراحة أمراض الذكورة وتأخر الإنجاب والصحة الجنسية بطب القصر العيني.
التعليقات
لا توجد تعليقات حتى الآن. كن أول من يعلق!