ما هي أسباب وعلاج تشوه الحيوانات المنوية؟
تشوه الحيوانات المنوية واحدة من أهم أسباب العقم عند الرجال، بسبب بعض الأسباب والعادات الغلط اللي بيعملها معظم الشباب، وبتسبب في الشكل الطبيعي للحيوانات المنوية، وده أمر بيترتب عليه صعوبة في الإنجاب، ولكن بفضل التقدم العلمي والتكنولوجي بقى كل مشكلة وليها علاج، وتشوه الحيوان المنوي ليها كذا طريقة للعلاج وهنقدر نحلها بإذن الله.
الشكل الطبيعي للحيوان المنوي:
ودلوقتي تعالوا نعرف مع بعض إيه هو الشكل الطبيعي للحيوان المنوي، وإمتى نقول على الحيوان المنوي إنه مشوه:
في البداية لازم تكون عارف إن الشخص الطبيعي والسليم لازم يكون عنده نسبة من الحيوانات المنوية المشوهة في العينة، والنسبة دي بتكون أقل من 96% وبالتالي لو النسبة دي زادت عن كده هيكون الشخص ده عنده تشوه للحيوانات المنوية.
ولو عايز تعرف معلومات أكثر عن النسبة الطبيعية لتشوه الحيوانات المنوية، اسمع الفيديو ده مع الدكتور أسامة البكل…
ولأن الحيوان المنوي بيكون ليه مواصفات معينة علشان يقدر يوصل للبويضة ويخصبها ويكون جنين، وبيتكون من:
رأس الحيوان المنوي:
- الشكل: والرأس دي لازم تكون بيضاوية الشكل.
- المادة الوراثية: وبيكون فيها 23 كروموسوم اللي هي المادة الوراثية للزوج واللي بتكون مسؤولة عن تكوين الجنين، ولازم تكون المادة الوراثية دي سليمة ومفيهاش نسبة تفتت أو أي عيوب خلقية أو أي مشاكل في الجينات أو في عدد الكروموسومات، لأن لو فيها خلل هيحصل مشكلة في الأجنة وإما إنها مش هتتولد أصلاً أو هتتولد بعيوب خلقية.
- الأكروسوم: والرأس دي بيكون عليها الأكروسوم وده حاجة عاملة كده زي الكاب، والأكروسوم ده بيكون فيه إنزيمات هي اللي بتكون مسؤولة عن إن الحيوان المنوي يخترق البويضة، ولو الأكروسوم ده مش موجود كده الحيوان المنوي يعتبر مشوه ومش هيقدر يخترق البويضة ويكون جنين.
عنق الحيوان المنوي:
ويعتبر هو مصدر الطاقة اللي بيحرك ذيل الحيوان المنوي ويساعده على الانتقال من مهبل الزوجة بعد القذف عشان يوصل لقناة فالوب ويخصب البويضة.
ذيل الحيوان المنوي:
- الشكل: ولازم ذيل الحيوان المنوي يكون مستقيم ومش معوج ومفيهوش أي عيوب خلقية.
- التركيب: والذيل بيكون جواه أنابيب رفيعة جمب بعض والأنابيب دي بتتفاعل وهي اللي بتخلى الذيل يتحرك يمين وشمال ويدي الحيوان المنوي القدرة على الحركة.
علامات تشوه الحيوان المنوي:
وبالتالي هو ده الشكل الطبيعي للحيوان المنوي واللي هنقدر من خلاله نقول إن الرجل ده عنده خصوبة جيدة وقدرة على الإنجاب، لكن لو لقينا عكس ده، بمعنى:
- أن لو لقينا إن الحيوان المنوي عنده رأسين
- أو أن الرأس أكبر أو أصغر من المعدل الطبيعي
- أو أن في عيوب في العنق
- أو أن الذيل كان صغير أو معوج أو مش موجود أصلاً
ساعتها كل الحاجات دي هتقول إن الحيوان المنوي ده مشوه، ومش هيقدر إنه يخصب بويضة ويكون جنين.
أسباب تشوه الحيوانات المنوية:
وده ممكن يحصل نتيجة أسباب كتير منها عادات كثير غلط بنعملها في حياتنا، زي:
1. خلل الهرمونات:
بمعنى إن في مشكلة في الغدة النخامية اللي بتفرز هرمون FSH و LH، لأن الهرمونات دي هي اللي بتحفز الخصية على إنتاج هرمون التستوستيرون والحيوانات المنوية، وبالتالي لما يحصل خلل في الغدة النخامية ساعتها الخصية هتوقف إنتاج الحيوانات المنوية السليمة والمكتملة، وهيبقى عندنا حيوانات منوية مشوهة.
2. دوالي الخصية:
لأن الدوالي بتأثر على الدورة الدموية في الخصية، وده طبعاً بيأثر على الحيوانات المنوية ويتسبب في تفتيت المادة الوراثية في رأس الحيوان المنوي، ده غير إنها بتسبب تشوهات في الرأس وضعف في الحركة وقلة في عدد الحيوانات المنوية عن المعدل الطبيعي.
3. وجود التهابات أو عدوى في الجهاز التناسلي:
كالأمراض المنقولة جنسياً أو العدوى الفيروسية لأن كل ده بيسبب تلف في إنتاج الحيوانات المنوية وبنيتها وشكلها.
4. التعرض للتلوث والسموم البيئية:
وأكتر ناس بتكون معرضة لده هما الناس اللي بيشتغلوا في أماكن بيتعرضوا فيها للإشعاع أو المواد الكيميائية، وده بيسبب لهم مشاكل كتير في إنتاج الحيوانات المنوية زي التشوه.
5. التدخين بشراهة:
لأن مادة النيكوتين الموجودة في السجائر بتقلل من وصول الدم للخصية ده غير السموم اللي بتوصل للخصية وده بيزود من نسبة التشوه في الحيوانات المنوية.
علاج تشوه الحيوانات المنوية:
وبعد ما عرفنا أسباب تشوه الحيوانات المنوية، تعالي أقولك هنعالجها إزاي المشكلة دي:
بس في البداية لازم تكون عارف إن علاج تشوه الحيوانات المنوية مبقاش حاجة صعبة زي ما كان زمان، لأن بفضل التقدم العلمي والتكنولوجي بقى موجود دلوقتي حلول كتير جداً نقدر نعالج بيها مشكلة التشوه دي، زي إننا نعرف إيه سبب التشوه ونعالجه.
1. علاج خلل الهرمونات:
لو كان سبب التشوه وجود خلل في الهرمونات: فعلاجها هنا هيكون أدوية منشطة للخصية علشان ترجع تاني تنتج حيوانات منوية بشكل طبيعي.
2. علاج دوالي الخصية:
أما لو كان السبب وجود دوالي في الخصية: هنعالجها عن طريق ربطها بالجراحة الميكروسكوبية، أفضل وأحسن طريقة تعالج بيها دوالي الخصية، وبعد العملية هنلاقي إن نسبة الحيوانات المنوية المشوهة وصلت للمعدل الطبيعي.
3. الإقلاع عن التدخين:
لكن لو كان سبب تشوه الحيوانات المنوية التدخين: فلازم نبطل تدخين عشان التشوه يقل ويبقى عندنا حيوانات منوية سليمة في العينة.
العلاجات المتقدمة:
لكن بقى لو عالجنا الأسباب دي ولقينا إن لسه عندنا نسبة التشوه عالية، في الحالة دي هيكون عندنا حلين اثنين:
- إما إننا ناخد عينة من السائل المنوي ونعمل بيها تلقيح صناعي
- أو لو ملقيناش حيوانات منوية سليمة في عينة السائل المنوي هنستخرج الحيوانات المنوية من الخصية، عن طريق إما سحب عينة بالإبرة أو التفتيش الميكروسكوبي
أسئلة شائعة:
هل تشوه الحيوانات المنوية تسبب الإجهاض؟
لأن الحيوانات المنوية لو مشوهة أو فيها أي خلل مش بس هتكون السبب في صعوبة حدوث الحمل، لا كمان هتكون السبب في حدوث الإجهاض المتكرر عند الزوج، لأن التشوه يمكن أن يكون في رأس الحيوان المنوي، والرأس هي اللي بتحتوي على المادة الوراثية التي تسبب تكوين الجنين، ولو حصل فيها أي خلل هيأثر على الجنين في مراحل نموه وتكوينه.
هل تشوه الحيوانات المنوية لها علاج؟
نعم، قد يكون هناك علاج لتشوه الحيوان المنوي، والعلاج يعتمد على سبب التشوه، بمعنى إن لو كان سبب التشوه هو دوالي الخصية، فالعلاج هيكون عن طريق ربط دوالي الخصية بالجراحة المجهرية.
ما هو عدد الحيوانات المنوية الطبيعية؟
العدد الطبيعي للحيوانات المنوية في السائل المنوي للرجل هو 15 مليون حيوان منوي أو أكثر لكل مليلتر، أو 39 مليون حيوان منوي أو أكثر في كل عملية قذف، وبالتالي إذا كان العدد أقل من ذلك، فقد تقل فرص حدوث الحمل.
ولو خلاص فكرت وقررت تبدأ رحلة العلاج معانا، تقدر تتصل بينا على رقم 01018874287 واحنا هنحجزلك ميعاد مع الدكتور أسامة محمد البكل مدرس واستشاري طب وجراحة أمراض الذكورة وتأخر الإنجاب والصحة الجنسية بطب القصر العيني.
التعليقات
لا توجد تعليقات حتى الآن. كن أول من يعلق!