هل يمكن علاج الحيوانات المنوية المشوهة ؟

هل يمكن علاج الحيوانات المنوية المشوهة ؟

تنتج الخصية ملايين من الحيوانات المنوية بشكل يومي ، والحيوان المنوي بيكون ليه شكل ومواصفات معينة ، لو حصل اي عيب او خلل في المواصفات دي ، بالتالي هيكون حيوان منوي مشوه ، ومش هيكون قادر أن يوصل للبويضة ويخصبها ويحصل حمل ، وفي طرق كثير نقدر نعالج بيها تشوه الحيوان المنوي ، بس لازم الاول نعرف السبب اللي ادي الي التشوه ونعالجه.

وقبل ما نتكلم عن علاج تشوه الحيوان المنوي ، خلونا الاول نوضح ايه هو الشكل الطبيعي والمشوه للحيوان المنوي : 

في البداية لازم تبقي عارف ان الشخص الطبيعي لازم يكون عنده نسبة من الحيوانات المنوية المشوهة في العينة ، والنسبة دي لازم تكون اقل من 96% ، ونسبة الحيوانات المنوية الطبيعية في العينة تكون 4% ، علشان تكون معدلات الخصوبة كويسة ويحصل حمل طبيعي ، لكن لو نسبة الحيوانات المنوية المشوهة في العينة زادت عن 96% ، ده معناه ان نسبة الحيوانات المنوية الطبيعية بقت اقل من 4% وبكدة الشخص ده هيكون عنده تشوه تام في شكل الحيوانات المنوية ، والحيوان المنوي مش هيكون عنده القدرة انه يوصل للبويضة ويخصبها ، وهيؤدي الي تاخر الانجاب عند الزوجين.

ودلوقتي تعالوا نعرف مع بعض ايه هى المواصفات الطبيعية للحيوان المنوي ، وامتي نقول على الحيوان المنوي ده انه مشوه ؟

الاول لازم تبقي عارف ان الحيوان المنوي بيتكون من 3 أجزاء 

• رأس الحيوان المنوي : 

1/ لازم تكون رأس الحيوان المنوي بيضاوية الشكل ، وطولها يكون من 5 الي 6 ميكرومتر ، وعرضها من 2.5 إلي 3.5 ميكرومتر.

2/ وراس الحيوان المنوي بيكون جواها 23 كروموسوم بيحملوا المادة الوراثية للأب واللي مسؤولة عن تكوين الجنين ، والمادة الوراثية دي لو كان فيها اي عيب او خلل ، هتعمل مشاكل كثير جدا في الجينات أو في عدد الكروموسومات ، ده غير انها ممكن تعمل تشوه في الجنين ، ياما هيكون جنين مشوه ويتولد بعيوب خلقية ، ياما مش هيتولد اصلا وهيحصله اجهاض في الشهور الأولي من الحمل.

3/ وراس الحيوان المنوي بيكون عليها اكروسوم زي الكاب كدة ، وبيكون جواه إنزيمات مسؤولة عن اختراق الحيوان المنوي للبويضة ، و الاكروسوم ده لو مش موجود هيكون حيوان منوي مشوه ومش هيقدر يخترق البويضة ويخصبها. 

ولو عايز تعرف اي علاقة تفتت المادة الوراثية عند الزوج بالسقط المتكرر عند الزوجة وفشل عملية الحقن المجهري ، اسمع الفيديو ده مع الدكتور اسامة البكل…

• عنق الحيوان المنوي : 

عنق الحيوان المنوي يعتبر هو مصدر الطاقة اللي بتحرك ذيل الحيوان المنوي وتساعده على الانتقال من مهبل الزوجة إلي قناة فالوب علشان يخصب البويضة.

• ذيل الحيوان المنوي : 

1/ ذيل الحيوان المنوي لازم يكون مستقيم ومش معووج ، وطوله يكون حوالي 45 ميكرومتر.

2/ والذيل بيكون جواه أنابيب رفيعة جمب بعض ، الانابيب دي بتتفاعل مع بعض علشان تدي الحيوان المنوي القدرة على الحركة والوصول للبويضة.

3/ ذيل الحيوان المنوي لو كان مشوه او فيه اي عيوب ، كدة الحيوان المنوي مش هيكون عنده القدرة على الوصول للبويضة ويخصبها علشان يحصل حمل.

وبعد ما عرفنا ايه هى مواصفات شكل الحيوان المنوي الطبيعية ، تعالوا نعرف امتي نحكم على الحيوان المنوي انه مشوه: 

1/ لو كان الحيوان المنوي عنده راسين.

2/ لو كانت الراس اكبر او اصغر من المعدل الطبيعي.

3/ لو كان الاكروسوم مش موجود على رأس الحيوان المنوي.

4/ لو كان في أي عيوب في عنق الحيوان المنوي.

5/ لو كان ذيل الحيوان المنوي اصغر من المعدل الطبيعي او مش موجود.

6/ لو كان في أكثر من ذيل للحيوان المنوي.

وكدة هيكون حيوان منوي مشوه ومش هيعرف يخترق البويضة وهيحصل تأخر في الإنجاب.

وعلشان نعالج التشوه ده ، لازم الاول نعالج السبب الي تشوه الحيوانات المنويه ، و لازم تبقي عارف ان في اسباب كتير ممكن تؤدي الى تشوه الحيوان المنوي زي : 

1/ الإصابة بدوالي الخصية.

2/ وجود خلل في الهرمونات.

3/ وجود عيب خلقي في الخصية ، خلاها تنتج حيوانات منوية مشوهة.

4/ لو بنتعرض بشكل مباشر للسموم البيئية أو التلوث الكيماوي.

5/ لو عندنا سمنة مفرطة.

6/ لو بندخن بشراهه.

7/ لو عندنا التهاب أو عدوى في الجهاز التناسلي.

8/ لو بنتعرض للعلاج الاشعاعي والكيماوي بسبب الاصابة بالامراض السرطانية.

وبالنسبة للعلاج ، فالعلاج هيكون على حسب السبب ، بمعني ان لو كان السبب في التشوه دوالي الخصية ، هنعالج دوالي الخصية بالجراحة الميكروسكوبية ، ولو كان سبب التشوه التهاب في الجهاز التناسلي ، هناخد أدوية مضاد حيوي علشان نعالج الالتهاب ، ولو بنتعرض بشكل مباشر للسموم البيئية ، نحاول نبتعد عن البيئة اللي بنتعرض فيها للسموم والتلوث ، وفي خلال 6 شهور بس ، هنكون عالجنا التشوه وهيحصل حمل طبيعي.

في النهاية ، لازم تبقي عارف ان تشوه الحيوان المنوي مش حالة خطيرة وميئوس منها ، وحتى لو نسبة التشوه وصلت ل 100% برضه هيكون ليها علاج ، بس الاهم ان يكون عندك الأمل والثقة في الله اولا ثم في خبرة الدكتور ثم في العلاج ، علشان يكون عندك أعلى فرصة ان يحصل حمل طبيعي ويكون عندك طفل سليم.

ولو خلاص فكرت وقررت تبدأ رحلة العلاج معانا ، تقدر تتصل بينا على رقم 01018874287 واحنا هنحجزلك ميعاد مع الدكتور اسامة محمد البكل مدرس واستشاري طب وجراحة امراض الذكورة وتاخر الانجاب والصحة الجنسية بطب القصر العيني.