هل يحدث حمل مع انعدام الحيوانات المنوية ؟

هل يحدث حمل مع انعدام الحيوانات المنوية ؟

يعتبر الإنجاب حلم لكل زوج وزوجة ، ولما بنلاقي ان الحلم ده اتأخر بعد مرور سنة كاملة على الجواز وعلى الرغم من ممارسة العلاقة الزوجية بصورة طبيعية ، بيبدا الخوف والشك يدخل حياتنا ، ومش بينتهي غير بعد عمل الفحوصات والتحاليل اللازمة ، واللي بعدها بتأكد أن الزوج بيعاني من انعدام الحيوانات المنوية في السائل المنوي ، ومن هنا يبدأ الزوج يسأل ، هل ممكن يحصل حمل مع انعدام الحيوانات المنوية ؟

ومن خلال المقال ده هجاوبك على سؤالك ، بس قبلها تعالي نعرف ايه هو انعدام الحيوانات المنوية : 

بس في البداية لازم تكون عارف أن الخصية هي المصنع المسؤول عن إنتاج الحيوانات المنوية وقد تصل إلى 300 مليون حيوان منوي في عملية القذف الواحدة ، أما الشخص اللي بيعاني من انعدام في الحيوانات المنوية ، بنلاقي أن السائل المنوي بيخرج وقت القذف من غير ما يحتوي على أي حيوانات منوية. 

ودلوقتي تعالي اجاوبك على سؤالك وهو ، هل يحدث حمل مع انعدام الحيوانات المنوية ؟ 

هقولك ان علشان يحصل حمل بشكل طبيعي بنحتاج الى حيوان منوي واحد مع بويضة واحدة ، ولكن الشخص اللي بيعاني من انعدام الحيوانات المنوية بيكون عنده ( صفر حيوان منوي ) وساعتها هيكون من الصعب جدا أنه يحصل حمل طبيعي لو وجدنا البويضة فقط بدون وجود الحيوان المنوي ، ووقتها هيحصل تأخر في الإنجاب.

وهنا لازم تكون عارف أن في أسباب كثير جداً ممكن تكون السبب في انعدام الحيوانات المنوية في السائل المنوي ، زي : 

1/ وجود خلل في الهرمونات : بمعنى أن الغدة النخامية في المخ هي اللي بتكون مسؤولة عن إفراز هرمونات FSH , LH اللي بيحفزوا الخصية على إنتاج الحيوانات المنوية وإنتاج هرمون الذكورة ، بالتالي لو حصل اي خلل في الغدة النخامية ، ساعتها مش هيكون في إفراز للهرمونات دي ، والخصية مش هتنتج الحيوانات المنوية وهيحصل تأخر في الإنجاب. 

2/ وجود مشاكل في الخصية خلتها متنتجش حيوانات منوية ، زي : 

• وجود دوالي في الخصية : لأن دوالي الخصية بتأثر على الخصية وبترفع من درجة حرارة الخصية وبتضعف من وظيفتها في إنتاج وتصنيع الحيوانات المنوية.
• الخصية المعلقة : ودي بتكون عبارة عن عيب خلقي بيصيب الأطفال الذكور بعد الولادة مباشرةً ، وتتسبب في أن خصية واحدة أو الاتنين مش بينزلوا إلى مكانهم الطبيعي في كيس الصفن، وبتفضل معلقة جوا البطن ، والخصية المعلقة لازم تتعالج خلال السنة الأولى من عمر الطفل ، لأن الخصية لو فضلت معلقة جوا البطن ده هيسبب مشاكل كتير جدا للطفل لما يكبر ، لأن الخصية المعلقة جوا البطن بتتعرض لدرجة حرارة عالية وده هيسبب ضمور للخصية وعدم إنتاجها للحيوانات المنوية.
• وجود خلل جيني ذي متلازمة كلاينفلتر : وده بيكون عبارة عن خلل بيحصل في جينات الشخص ، بمعنى إن جينات الشخص الطبيعي بتتكون من 46 كروموسوم ، اتنين منهم الكروموسومات الجنسية ( XX للإناث وXY للذكور) ، أما لو الشخص كان مصاب بمتلازمة كلاينفلتر ، فده بيكون عنده كروموسوم X زيادة ، يعنى عدد الكروموسومات عنده 47 كروموسوم ، وده بيحصل بسبب خلل في مرحلة انقسام الخلايا أثناء توزيع الكروموسومات للجنين من الأب والأم ، والمتلازمة دي بتأثر على انتاج الخصية للحيوانات المنوية.
• وجود التهابات في الخصية : بمعنى وجود عدوى أو إلتهاب في الجهاز التناسلي ( كالتهاب الخصية أو التهاب البربخ أو الأمراض المنقولة جنسيا ) لأنها بتسبب ضعف في وظيفة الخصية وإنتاجها للحيوانات المنوية.
• التعرض للعلاج الاشعاعي أو الكيماوي : بمعنى أن علاج الأمراض السرطانية بيهاجم الخلايا والبؤر المنوية اللي جوا الخصية وممكن تتسبب في موتها وانعدام الحيوانات المنوية ، علشان كده دايما بننصح اي حد هيتعرض للعلاج الاشعاعي أو الكيماوي أنه يجمد عينة من الحيوانات المنوية عشان يستخدمها بعد التعافي في عملية الحقن المجهري.

3/ وجود انسداد في القنوات المنوية : بمعنى أن في عائق أو حاجز بيمنع خروج الحيوانات المنوية وقت القذف واختلاطها بالسائل المنوي ، والانسداد ده ممكن يكون في أكثر من طريق بيمشي فيه الحيوان المنوي ، زي انه ممكن يكون : 

1/ في القنوات المنوية 

2/ أو في البربخ 

3/ أو في الوعاء الناقل

4/ أو في قناة القذف

وبعد ما عرفنا الأسباب اللي ممكن تكون سبب الإصابة بانعدام الحيوانات المنوية ، 

تعالوا نعرف ازاي بنعالجها علشان ترجع تاني الحيوانات المنوية تظهر في السائل المنوي ويكون عندنا اعلى فرصة لحدوث الحمل الطبيعي : 

1/ بمعني أن لو كان سبب انعدام الحيوانات المنوية وجود خلل في الهرمونات : في الحالة دي هناخد علاج هرموني عشان نعوض بيه نقص هرمون FSH , LH ، وبعدها الخصية هتشتغل وترجع تنتج الحيوانات المنوية.

2/ أما بقي لو كان سبب انعدام الحيوانات المنوية وجود مشاكل في الخصية : زي وجود التهابات أو عدوى ، في الحالة دي هنطلب من المريض أنه يعمل مزرعة سائل منوي علشان نحدد نوع البكتيريا وانسب مضاد حيوي للمريض.

3/ أما لو كان سبب ضعف الخصية وجود دوالي في الخصية ، وقتها لازم نعالج دوالي الخصية بالجراحة الميكروسكوبية أفضل وأحسن طريقة تعالج بيها دوالي الخصية ومن غير ما تضر الخصية. 

4/ لكن بقي لو كان سبب انعدام الحيوانات المنوية وجود انسداد : وقتها لازم نعمل أشعة علشان نحدد فين مكان الانسداد بالظبط ونبدأ نعالجه ، ولو لقينا أن الانسداد في :

• القنوات المنوية : وقتها هنضطر ناخد عينة من الخصية بالابرة ونستخرج منها الحيوانات المنوية ونعمل بيها حقن مجهري.
• أما بقي لو كان الانسداد في الوعاء الناقل : وقتها هنستخدم الميكروسكوب الجراحي علشان نعالج الانسداد ونوصل الوعاء الناقل بالبربخ وبعدها الحيوانات المنوية هتلاقي طريق للخروج.
• لكن لو كان الانسداد في قناة القذف : ساعتها هنستخدم المنظار علشان نصلح الانسداد ، وبعدها الحيوانات المنوية هتظهر في السائل المنوي وقت القذف وبعدها هيكون سهل أنه يحصل حمل طبيعي. 

ولو عايز تعرف ايه هي حالات انعدام الحيوانات المنوية اللي ممكن يحصل معاها إنجاب طبيعي ، اسمع الفيديو ده مع الدكتور اسامة البكل…

في النهاية ، انت كدة شوفت نبذة بسيطة عن علاج مرض واحد ممكن يعاني منه أي رجل ، وعرفت قد ايه كل مشكلة وليها أكثر من طريقة للعلاج ، وده بيخلينا منفقدش الامل ابدا في اي مشكلة بتواجهنا في الإنجاب ، ونكون واثقين ومتأكدين أنه بالثقة في الله وفي العلاج هيكون عندنا أطفال كثير بإذن الله. 

ولو عاوز تتابع معانا حالتك تقدر تتواصل معانا على الرقم ده 01018874287 واحنا هنحجزلك ميعاد مع الدكتور أسامة محمد البكل مدرس واستشاري طب وجراحة أمراض الذكورة وتأخر الإنجاب والصحة الجنسية بطب القصر العيني.

---