هل يحدث حمل مع وجود دوالي الخصية ؟
الجواز هو حياة مبنية على وجود أطفال ، بالتالي لو حصل أي مشكلة سواء عند الزوج أو الزوجة وأثرت على الإنجاب ، كل ده وقتها هينعكس بالسلب على العلاقة الزوجية ، لأن بيكون في اعتقاد الطرف الثاني إنك السبب في تأخر الإنجاب ، في حين أن الدراسات العلمية أثبتت أن حوالي 40% من الرجال اللي بيعانوا من تأخر في الإنجاب بيكون السبب الرئيسي والأول هو دوالي الخصية.
ولكن قبل ما نتكلم عن علاقة دوالي الخصية بتأخر الإنجاب ،
تعالوا نعرف مع بعض إيه هي دوالي الخصيتين:
دوالي الخصية هي عبارة عن تضخم في الأوردة المحيطة بالخصية والموجودة داخل كيس الصفن ، والتضخم ده بيحصل نتيجة ضعف الصمامات الموجودة في الأوردة ، اللي وظيفتها إنها تنظم تدفق الدم من الخصيتين إلى القلب ، ومنع عودته تاني للخصية بعد تدفقه ، لكن لو الصمامات دي كان فيها خلل أو عيب خلقي ، ساعتها الدم اللي طالع من الخصية في اتجاه القلب هيرجع تاني للخصية ويفضل يتراكم جوا الأوردة ، وبالتالي الأوردة هتفضل تتمدد علشان تستوعب كمية الدم اللي فيها ، وهو ده اللي بيسبب دوالي الخصية.
ودلوقتي تعالوا نعرف إيه هي المضاعفات اللي بتسببها دوالي الخصية،
وإزاي ممكن تسبب تأخر في الإنجاب:
- دوالي الخصية خطيرة على المراهقين لانها بتسبب لهم بطء في نمو الخصية ، وبتسبب للكبار صغر وانكماش في حجم الخصية ، ممكن يوصل مع الوقت لضمور في الخصية.
- دوالي الخصية بتسبب تأخر الإنجاب:
وهنا لازم تكون عارف إن الخصية هي المصنع اللي بينتج الحيوانات المنوية المسؤولة عن الإنجاب ، والخصية علشان تقدر تنتج حيوان منوي سليم يقدر يخصب البويضة ويكون جنين ، لازم تكون درجة حرارتها أقل من درجة حرارة الجسم بحوالي درجتين ، علشان كده ربنا خلق الخصية بره الجسم وجوا كيس الصفن ، عشان الدم اللي يوصلها يكون دم بارد وبالتالي تقدر تنتج حيوانات منوية سليمة ، لكن لو في دوالي في الخصية وخصوصاً لو كانت الدوالي دي من الدرجة الثانية أو الثالثة ، ساعتها هترفع من درجة حرارة الخصية وهتزيد من تراكم المواد المؤكسدة (ROS) اللي هتسبب:- ضرر للخصية وإنتاجها للحيوانات المنوية.
- وهتأثر على الهرمونات المسؤولة عن إنتاج الحيوانات المنوية.
- وهتضر بالحيوانات المنوية السليمة والمكتملة في الخصية.
- ده غير انها هتسبب نقص في عدد الحيوانات المنوية وضعف في حركتها وزيادة في نسبة التشوهات في شكل الحيوان المنوي.
- وهتسبب تكسير في المادة الوراثية الموجودة في رأس الحيوان المنوي والمسؤولة عن تكوين الجنين ، واللي هتكون السبب في تأخر الإنجاب والإجهاض المتكرر عند الزوجة.
وكل ده هيسبب تأخر في الإنجاب ، لأن مش هيكون في حيوان منوي واحد سليم في الخصية قادر إنه يخصب البويضة ويكون جنين.
لذلك بعد ما عرفت المضاعفات اللي بتسببها دوالي الخصيتين، وإن صعب يحصل حمل مع وجود دوالي بدرجة كبيرة في الخصية ، لازم تعالج دوالي الخصية ، وعلاج دوالي الخصية مش دوائي ولا علاج طبيعي ولا حتى علاج بالليزر زي ما بنسمع ، علاج دوالي الخصية جراحي بالجراحة الميكروسكوبية.
ودلوقتي خليني أجاوب على سؤال أنا متأكد إنه بيدور في ذهنك وعاوز تسأله ، ليه أعالج دوالي الخصية بالجراحة الميكروسكوبية؟
لأن الجراحة الميكروسكوبية أفضل وأحسن طريقة ممكن تفكر تعالج بيها دوالي الخصية، لكذا سبب:
- لأننا بنقدر نعمل العملية ببنج نصفي أو كلي ، ده غير أن جرح العملية بيكون صغير جداً حوالي من 2-3 سم.
- في الجراحة الميكروسكوبية بنستخدم الميكروسكوب الجراحي اللي بيكبر الرؤية لحد 25 ضعف، وده بيخلينا نقدر نشوف كل الأوردة والشرايين بشكل واضح جداً ، وكمان بيخلينا نحافظ على الشريان الرئيسي اللي بيغذي الخصية بالدم ، وبكده مش هيحصل اي ضرر للخصية.
- وكمان بسبب تكبير الميكروسكوب بنقدر إننا نوصل للأوردة الدقيقة والثانوية ونربطها كلها عشان ميحصلش ارتجاع للدوالي مرة تانية ، وده اللي مش بيكون موجود في أي طريقة جراحية ثانية غير الميكروسكوب.
- وبنقدر إننا كمان نشوف الشعيرات الليمفاوية وقت العملية ، ونتجنب إننا نربطها بالغلط مع الأوردة وبكده مش هيحصلنا قيلة مائية على الخصية.
- ده غير إن العملية نفسها مش بتاخد أكثر من ساعة واحدة بس ، وبعدها ممكن ترجع بيتك في خلال 3-4 ساعات.
- وتقدر كمان تنزل شغلك بعد 3-5 أيام من العملية.
- وتقدر تمارس العلاقة الزوجية بعد العملية بأسبوع واحد بس.
ولو عايز تعرف هل عملية الحقن المجهري بديل لعملية دوالي الخصية ، اسمع الفيديو ده مع الدكتور اسامة البكل…..
ودلوقتي تعالي اطمنك واقولك امتي ممكن يحصل حمل بعد عملية دوالي الخصية بالميكروسكوب:
لازم تكون عارف إن بعد عملية دوالي الخصية بالميكروسكوب بناخد فترة علاج هرموني لمدة متقلش عن 3 شهور ، وبعد العلاج أول تحليل سائل منوي بنعمله بيكون بعد حوالي 6 شهور من العملية ، لأن دورة تكوين الحيوان المنوي بتستغرق حوالي 3 شهور علشان الخصية تكون تعافت بشكل كامل وبالتالي تقدر تنتج حيوانات منوية تاني بصورة طبيعية ، وبعدها بنلاحظ تحسن في تحليل السائل المنوي لنسبة تصل إلى 70% ، وأول حاجة بتتحسن بعد عملية دوالي الخصية بالجراحة الميكروسكوبية هي عدد الحيوانات المنوية وبعدها الحركة بتتحسن ونسبة التشوهات بتقل ، وإمكانية إن يحصل حمل طبيعي بتكون من 6 شهور لسنة بالكثير، ونسبة حدوث الحمل بتصل إلى 40-45% بعد عملية دوالي الخصية بالميكروسكوب.
في النهاية ، أنا عارف إن أي مشكلة هتأثر في قدرتك على الإنجاب هيكون التفكير فيها صعب ومرهق كمان ، لكن أحب أطمنك إن مع التقدم العلمي في الطب ودخول الميكروسكوب الجراحي ، حل أي مشكلة دلوقتي بقي سهل ومش هتحتاج للحقن المجهري ، لان نجاح عملية دوالي الخصية بالجراحة الميكروسكوبية تخطى الـ 70%، وفرص إن يحصل حمل طبيعي بعدها وصلت إلى 40-45% ، يعني متفقدش الأمل وتبقى متأكد أن أول وآخر خطوة في الشفاء ، هي ثقتك في الله سبحانه وتعالى ثم بعد كده في خبرة الدكتور ثم في العلاج.
ودلوقتي لو عندك أي تساؤل أو استفسار، تقدر تتواصل معانا على الرقم ده 01018874287، واحنا هنحجزلك ميعاد مع الدكتور أسامة محمد البكل مدرس واستشاري طب وجراحة أمراض الذكورة وتأخر الإنجاب والصحة الجنسية بطب القصر العيني.