هل يمكن علاج دوالي الخصية بدون جراحة ؟

هل يمكن علاج دوالي الخصية بدون جراحة ؟

بنسمع كل شوية كلام كثير عن شفيت من دوالي الخصية بدون جراحة ، أو عالجت دوالي الخصية بدون جراحة ، فهل فعلا الكلام ده حقيقة ولا مجرد كلام واشاعات بتمشي وراها الناس وبتصدقها ، وهل فعلا يمكن علاج دوالي الخصية بدون جراحة ؟

في المقال ده هنتكلم بالتفصيل عن دوالي الخصية وكيفية تشخيصها وطرق علاجها. 

ودلوقتي تعالوا نعرف مع بعض ايه هي دوالي الخصية : 

في البداية لازم تكون عارف ان دوالي الخصية هي عبارة عن تضخم في الأوردة المحيطة بالخصية والموجودة داخل كيس الصفن ، والتضخم ده بيحصل نتيجة لضعف الصمامات الموجودة في الأوردة واللي بتكون مسؤولة عن تنظيم تدفق الدم من الخصيتين الى القلب و منع رجوعه تاني للخصية بعد تدفقه ، بالتالي لو في اي خلل في الصمامات دي ، ساعتها الدم هيبدأ يتراكم جوا الاوردة ومش هتبقي قادرة انها تستوعب كمية الدم اللي فيها وتبدأ الاوردة تتضخم وتتمدد و تسبب الدوالي.

ودلوقتي تعالي اقولك ازاي بيتم تشخيص المريض اللي بيعاني من دوالي في الخصيتين : 

وهنا لازم تكون عارف ان اول واهم خطوة في اكتشاف أي مرض هي التشخيص الصح ، وفي حالة دوالي الخصية ، لازم التشخيص يكون عند دكتور متخصص ، لانه بيفحص المريض كويس ، وبيقيم الاعراض اللي بيحس بيها ، وده بيكون من خلال 3 خطوات : 

• الفحص السريري : 

وفي الخطوة دي لازم المريض يكون واقف ، لانه بيكون صعب علي الدكتور انه يكتشف وجود دوالي الخصية والمريض نايم ، وبعد كدة ببدا يطلب من المريض انه يتنفس بعمق ويحبس النفس فترة قصيرة ، ويضغط بجسمه لتحت ، علشان يعرف يفحص كيس الصفن ويشوف لو في أي كتل أو أوردة منتفخة او ارتجاع للدم في الاوردة. 

• أشعة الدوبلر الملون : 

والخطوة دي لازم تكون في مكان متخصص ، واللي يعملها يكون متخصص في الأشعات الخاصة بأمراض الذكورة ، لأنه بيقيم حجم الخصيتين بالظبط ، وبيحدد هل في دوالي ولا لا ، وهل في ارتجاع للدم في الأوردة ولا لا. 

ولو عايز تعرف أهمية أشعة الدوبلكس في تشخيص دوالي الخصية ، اسمع الفيديو ده مع الدكتور اسامة البكل…

• تحليل السائل المنوي : 

الدكتور بيطلب تحليل سائل منوي علشان يوضح جودة الحيوانات المنوية من حيث العدد والحركة والشكل ، لان ده بيساعدنا نحدد إذا كان في مشكلة في الخصوبة أو لا، وكمان نقدر نربط بين النتيجة وبين أسباب وجود دوالي الخصية اللي ممكن تأثر على كفاءة الخصية في إنتاج الحيوانات المنوية.

●    تحليل تكسير الحمض النووي في الحيوانات المنوية (DNA ) : 

والدكتور ممكن يطلب التحليل ده علشان يقيس نسبة تلف أو تكسير المادة الوراثية داخل الحيوانات المنوية ، لأن التكسير ده ممكن يسبب ضعف في جودة الحيوانات المنوية ويؤثر على فرص حدوث الحمل ، حتى لو كان عدد الحيوانات المنوية كويس في تحليل السائل المنوي العادي.

ودلوقتي تعالي اجاوبك على سؤالك ، هل يمكن علاج دوالي الخصية بدون جراحة ، بس قبلها خليني اقولك معلومة مهمة جدا ، وهي ان مش كل الحالات لازم تعالج دوالي الخصية ، لو الشخص مش بيحس باي الم في الخصية أو أن دوالي الخصية مش ماثرة على نمو ووظيفة الخصية ولا مسببة تاخر في الانجاب ، في الحالة دي مش هنعالج دوالي الخصية ، لكن لو كانت الدوالي من الدرجة الثانية أو الثالثة ومسببة للمريض ألم شديد لدرجة انها موقفة حياته ومسببة له تاخر في الانجاب أو مأثرة على حجم الخصية أو مسببة ارتفاع في تحليل تكسير الحمض النووي في الحيوانات المنوية  ، يبقي لازم وضروري نعالجها. 

وهنا بقي لازم تكون عارف ان العلاج الوحيد لدوالي الخصية هو الجراحة ، مفيش حاجة اسمها علاج دوالي الخصية بالاعشاب ولا بالميه السخنه ولا بالحجامة زي ما بنسمع ، وقبل ما تقلق وتتوتر من كلمة عملية او جراحة ، خلينى اقولك ان عملية دوالى الخصية  عملية بسيطة وسهلة جدا ، والتعافي بعد العمليه مش بياخد وقت ، بس خليني اقولك ان فى طرق مش بننصح بيها نهائي في علاج دوالي الخصية ، زى :

• جراحة المنظار : 

وفي الطريقة دي المريض بيكون تحت تأثير التخدير الكلي، والدكتور بيعمل شقوق صغيرة في منطقة البطن بيدخل منها المنظار والأدوات الجراحية والكاميرات لربط الأوردة المصابة المسببة للدوالي او قطعها ، و الطريقة دى بيكون ليها مضاعفات كثير جدا : 

1/ لان مش بيكون فيها اي اجهزة او ادوات حديثة تساعد الجراح انه يشوف مكان العملية بشكل أوضح ، وفي الحالة دي ممكن نعرض الشريان الخصوي اللي بيغذي الخصية بالدم للقطع ، وبالتالي هنعرض الخصية للضمور.

2/ وفي جراحة المنظار بيكون في احتمال كبير جدًا إن دوالي الخصية ترجع تاني بعد فترة من العملية ، لان بيكون صعب رؤية كل الأوردة المصابة وربطها بالمنظار.

• الجراحة التقليدية : 

واللي بيحصل في الجراحة التقليدية أن الجراح بيبدأ يعمل فتحة في المنطقة الاربية ، و بعد كده بيبدأ يشوف فين الأوردة المنتفخة بعينه بس من غير ما يستخدم أى أدوات تساعده انه يشوف مكان العملية بشكل أوضح ، وده بيسبب مشاكل كتير زي :

1/ ضمور الخصية : لأن الجراح وقت العملية ممكن يربط الشريان الخصوي اللي بيغذي الخصية بالدم ، وبكده هنكون منعنا الخصية ان يوصلها دم وهيؤدي إلى ضمورها. 

2/ القيلة المائية : لان في الجراحة التقليدية الجراح ممكن يربط الشعيرات الليمفاوية بالغلط مع الأوردة وده هيسبب للمريض قيلة مائية على الخصية.

3/ رجوع الدوالي تاني بعد العملية : لان الجراح ممكن ميشوفش الاوردة الصغيرة اللي فيها دوالي بالعين المجردة وميربطهاش ، وساعتها الدوالي هترجع تاني بعد فترة من العملية.

• الأشعة التداخلية : 

ودي اكثر طريقة مش بننصح بيها نهائي في علاج دوالي الخصية ، لأن القسطرة الموجودة في الأشعة التداخلية مش بتقدر توصل لكل الأوردة في الخصية وبيكون في احتمال كبير جدا أن الدوالي ترجع تاني بعد العملية ، و كمان وقت العمليه بنضطر اننا نعرض الخصية لجرعة كبيرة جدا من الإشعاع تحت جهاز ( C- arm ) و ده بيضر الخصية وهى اصلا بتكون متضررة بسبب الدوالي. 

ودلوقتي تعالي أقولك على طريقة بننصح بيها لعلاج دوالي الخصية ، واللي تعتبر أفضل وأحسن طريقة تفكر تعمل بيها عملية دوالي الخصية ، وهي الجراحة الميكروسكوبية ، والطريقة دي مش بس فعّالة ، ده كمان معترف بيها في أحدث التوصيات والإرشادات الطبية كمعيار ذهبي لعلاج دوالي الخصية ، لأنها بتقلل نسبة الرجوع وتقلل من المضاعفات ، وكفاءتها عالية جدًا في تحسين السائل المنوي وفرص الإنجاب. 

واللي بيحصل في الجراحة الميكروسكوبية اننا بنستخدم فيها الميكروسكوب الجراحي اللي بيكبر الرؤية 25 ضعف وده طبعا بيساعدنا اننا نكبر مكان العملية ونشوف مكان الاوردة بوضوح ، وده هيخلينا نتجنب مضاعفات كثيرة جدا : 

1/ لأن الميكروسكوب هيساعدنا نربط الأوردة الثانوية والصغيرة عشان نمنع رجوع الدوالي مرة ثانية بعد العملية.

3/ وكمان هيساعدنا اننا نبعد عن الشعيرات والأوعية الليمفاوية اللي لو اتربطت بالغلط ممكن تسبب قيلة مائية على الخصية.

4/ ده غير اننا بنقدر نحافظ على الشريان الخصوي اللي بيوصل الدم للخصية ، واللى لو حصله اى ضرر وقت العملية هيسبب ضمور للخصية.

5/ ونقدر كمان اننا نروح من المستشفى في نفس اليوم ، وننزل شغلنا عادي جدا بعد 3-5 أيام.

6/ أما بالنسبة للعلاقة الزوجية، فتقدر نمارسها بعد العملية بأسبوع واحد بس.

واخيرا ، متخليش حد يضحك عليك ويوهمك أن في علاج لدوالي الخصية بالادوية او بالاعشاب أو بالعلاج الطبيعي ، لان علاج دوالي الخصية أمرا قاطعا بالجراحة ، ودلوقتي مع التقدم العلمي الجراحة الميكروسكوبية بقت من افضل واسهل التقنيات المستخدمة في علاج دوالي الخصية ، يعني متخافش و متترددش وتاخد قرار العملية في أسرع وقت.

ولو احتجت انك تتواصل معانا ، تقدر تبعتلنا علي الرقم ده 01018874287، واحنا هنحدد لك ميعاد مع الدكتور اسامة محمد البكل مدرس واستشاري طب وجراحة أمراض الذكورة وتاخر الانجاب والصحة الجنسية بطب القصر العيني.