اى هى أسباب انعدام الحيوانات المنوية ، و اى تأثير الهرمونات على الخصوبة ؟
الخصية هى اللى بتكون مسؤولة عن تصنيع وإنتاج الحيوانات المنوية وتخزينها ، و فى وقت العلاقة الزوجية ، بيتم نقل الحيوانات المنوية عن طريق الحبل المنوي ، عشان تختلط مع السائل المنوي اللى بتفرزه غدة البروستاتا والحويصلة المنوية، و بكده هيكون عندنا سائل منوى بيخرج من القضيب وقت القذف.
طيب اى هو المعدل الطبيعي لأعداد الحيوانات المنوية ، و اى اسباب انعدام الحيوانات المنوية ؟
المعدل الطبيعي لأعداد الحيوانات المنوية لازم يزيد عن 15 مليون لكل ملليلتر من السائل المنوي في عملية القذف الواحدة ، أما في حالة انعدام الحيوانات المنوية (صفر حيوان منوي)، بيكون فى سائل المنوي بيخرج وقت القذف بس مش بيكون فيه أي حيوانات منوية، و ده هيكون سبب فى ان يحصل تأخر فى الانجاب
ولو عايز تعرف معلومات اكثر عن العدد الطبيعي للحيوانات المنوية علشان يحصل يحصل إنجاب ، اسمع الفيديو ده مع الدكتور اسامة البكل…
طيب اى هى أسباب انعدام الحيوانات المنوية ؟
- وجود خلل في الهرمونات .
- او بسبب مشاكل في الخصية بتمنعها من إنتاج الحيوانات المنوية.
- او ان يكون فى انسداد في القنوات المنوية اللى بتنقل السائل المنوي.
و فى المقال ده هنتكلم عن سبب من أسباب انعدام الحيوانات المنوية وهو خلل الهرمونات .
و عشان نقدر نفهم ازاى خلل الهرمونات بيسبب انعدام فى الحيوانات المنوية ،
خلونا الاول نعرف اى هو دور الهرمونات و ازاى بتأثر على الخصوبة ؟
و الهرمونات دى بتتفرز من الغده النخامية
في البداية خلونا نعرف اكتر عن الغدة النخامية ، الغده دى موجودة في المخ ، وهي اللي بتكون مسؤولة عن إفراز الهرمونات اللي بتساعد في عملية البلوغ والخصوبة عند الرجل ، وكمان الهرمونات دى بتأثر على وظيفة الخصية وانتاجها للحيوانات المنوية ، و الهرمونات دول هما
1- هرمون LH ، و بيكون وظيفته تنشط الخصية ، عشان تفرز هرمون الذكورة (التستوستيرون) ، وده الهرمون اللى بيخلى علامات البلوغ تظهر ، بالاضافة لدوره الاساسي في نمو الخصية و انتاجها للحيوانات المنوية .
2- هرمون FSH ، و الهرمون ده لما بتفرزه الغدة النخامية ، بنتقل للخلايا المنوية ، عشان يبدأ إنتاج وتصنيع الحيوانات المنوية ، ويبقي عندنا قدرة على الإنجاب.
و دلوقتى بعد ما عرفنا عن الغده النخاميه ، و اى دور الهرمونات اللى بتفرزها فى الخصوبة ، تعالوا نعرف دلوقتى
اى اللى هيحصل لو كان فى قصور او خلل في الغدة النخامية
لو حصل خلل أو قصور في الغدة النخامية، كده مش هيبقى فيه إفراز لهرمونات (FSH و LH) ، او هيكونوا موجودين بس بنسبة قليله جدًا، وده بيكون السبب في انعدام الحيوانات المنوية ونقص في هرمون الذكورة.
وهنا لازم ناخد بالنا من حاجة مهمة جدًا، وهي
- إن لو هرمون FSH وLH نسبهم كانت قليلة في الجسم، فده معناه إن فيه خلل هرموني ،
- لكن لو كانت نسبتهم كانت عالية، فده معناه إن المشكلة وقتها في الخصية نفسها، يا إما انها مش قادرة تنتج حيوانات منوية خالص، أو بتنتج بس بنسبة قليلة جدًا.
طيب اى هى أسباب ضعف الغدة النخامية
- لو كان فى نقص فى تدفق الدم إلى المخ بسبب مشاكل صحية زي الجلطات أو انخفاض ضغط الدم .
- او بسبب تناول بعض الأدوية زى ادوية علاج السرطانات اوالتعرض للعلاج الإشعاعي او الكيميائي .
- او بسبب الإصابة بأورام في الغدة النخامية، سواء كانت حميدة أو خبيثة.
- او لو اتعرضنا لاصابه فى الرأس أو التهابات في المخ.
- او لو اتصابنا بأمراض المناعة الذاتية ، اللي ممكن تهاجم الغدة النخامية وتضعف افرزها لهرمون FSH و هرمون LH .
و تعالوا دلوقتى نعرف ازاى بنعالج خلل الغدة النخامية ؟
علاج خلل الغده النخامية ، بيكون علاج هرمونى عشان نفضل منشطين الخصية ، و محافظين على انتاجها للحيوانات المنوية و هرمون الذكوره ، و العلاج الهرموني ده بنحتاج اننا نفضل مستمرين عليه مدى الحياة ،او على الاقل لفترة كافية لإنتاج حيوانات منوية ، و اللى ممكن توصل لسنتين .
3- هرمون البرولاكتين ، وده هرمون بتفرزه الغدة النخامية، و بيكون ليه دور مهم في تنظيم مستويات هرمون التستوستيرون عند الرجال ، لكن لو نسبة هرمون البرولاكتين كانت مرتفعة بشكل غير طبيعي، ده ممكن يتسبب فى انخفاض مستويات هرمون التستوستيرون في الجسم، و طبعا ده هيأثر بشكل سلبي على الصحة الجنسية والإنجابية عند الرجل،
و كل ما كانت نسبة البرولاكتين في الجسم ضمن المعدلات الطبيعية، بيكون وضع الخصية وإفراز هرمون التستوستيرون طبيعي، وبالتالي بتكون الصحة الجنسية والإنجابية أفضل.
طب لاقدر الله لو حصل ارتفاع فى نسبة هرمون البرولاكتين عند الرجل ايه اللي ممكن يحصل ؟؟
- هيحصل نقص فى هرموني FSH وLH، و ده هيتسبب فى ان انتاج الخصية للحيوانات المنويه هيقف
- و هيسبب نقص في هرمون الذكورة.
- و انخفاض الرغبة الجنسية.
- و هيكون كمان السبب فى تضخم في الثدي عند الرجل (التثدى).
و بعد ما عرفنا اى الاضرار اللى هتحصلنا لو نسبة هرمون البرولاكتين زادت عن معدلاتها الطبيعية ، خلونا دلوقتى نعرف ازاى بنعالج ارتفاع نسبة هرمون البرولاكتين
و العلاج هنا بيكون عن طريق ادوية لتقليل مستوى هرمون البرولاكتين، و بعد العلاج هتبدأ باقي الهرمونات نسبتها تنتظم ، وتظهر الحيوانات المنوية تاني ويحصل حمل بشكل طبيعي.
في النهاية لازم دايما نفحص نفسنا ونعمل تحاليل الهرمونات عشان نطمن ، علشان لاقدر الله لو في اي مشكلة نقدر نعالجها بسرعة قبل ما المشكلة الصغيرة دي تكون السبب في مشاكل كتير منعرفش نعالجها بعد كدة.
و علشان تعرفوا اكتر عن انسداد القنوات المنوية اضغطوا هنا