ما هي أسباب العقم الثانوي عند الرجال وعلاجه ؟

ما هي أسباب العقم الثانوي عند الرجال وعلاجه ؟

بنلاقي في مجتمعنا العربي ان في اعتقاد عند الناس بيقول ان الراجل اللي خلف مره قبل كده معندوش مشكلة ويقدر يخلف مرة واتنين ، وبالتالي لو حصل اي عائق او مشكلة أثرت على الإنجاب ، هتكون الزوجة هي السبب ، لكن خليني اقولك ان ده تفكير مش صح نهائي ، لان الراجل اللي خلف مرة ممكن عادي يحصله عقم ، و ده اللي بنسميه العقم الثانوي.

ودلوقتي تعالوا نعرف مع بعض اي هو العقم الثانوي : 

بس في البداية لازم تكون عارف ان زي ما في عقم ثانوي ، في كمان عقم اولي ، والعقم الاولى معناه ان زوجين متجوزين بقالهم اكثر من سنة ومع اول حمل بيعانوا من تأخر في الإنجاب ، لكن العقم الثانوي معناه أن الزوجين انجبوا مرة قبل كده ومكنش عندهم مشكلة وفجأة حصل عندهم تاخر في الانجاب.

ودلوقتي خليني نعرف ايه هي اسباب العقم الثانوي عند الرجال…

وهنا لازم تكون عارف ان في اسباب كثير جدا ممكن تكون سبب العقم الثانوي عند الرجل

• بمعنى أن في بعض الحالات ممكن يحصل عندها حمل طبيعي حتي لو في نقص في عدد الحيوانات المنوية أو ضعف في حركتها ولكن بدرجة بسيطة ومكنتش مأثرة على الإنجاب ودلوقتي بقت ماثرة.
• أو أن في بعض المشاكل ممكن تكون مكنتش موجودة في اول حمل بس ظهرت أو زادت مع الوقت ، زي : 

1/ دوالي الخصية : بمعني ان ممكن كان عندك دوالي في الخصية ولكن كانت بدرجة بسيطة ومش مأثرة علي الانجاب ، بس مع الوقت درجة الدوالي زادت وخاصة لو كانت من الدرجة الثانية او الثالثة ، ساعتها الاوردة اللي بتخرج الدم من الخصية هتضعف ومش هتبقي قادرة انها تخرج الدم ، والدم هيفضل يتراكم جوا الأوردة ويسخن وهيرفع من درجة حرارة الخصية وهيزيد من تراكم المواد المؤكسدة ( ROS ) اللي هتاثر على الخصية وانتاجها للحيوانات المنوية وهتضر بالحيوانات المنوية السليمة والمكتملة ، وهتسبب نقص في عدد الحيوانات المنوية وضعف في حركتها وهترفع من نسبة تشوهات الحيوانات المنوية ، ده غير كمان انها هتسبب تكسير في المادة الوراثية الموجودة في رأس الحيوان المنوي ، وكل ده هيكون سبب العقم او تاخر الانجاب.

ولو عايز تعرف امتي تتاكد انك عندك دوالي في الخصية ولازم تعمل عملية ، اسمع الفيديو ده مع الدكتور اسامة البكل…

2/ الالتهابات : بمعنى ان وجود التهاب أو عدوى في الجهاز التناسلي ( كالامراض المنقولة جنسيا ) هتاثر على الخصية وانتاجها للحيوانات المنوية.

3/ وجود مشاكل في الغدة النخامية : بمعني ان الغدة النخامية هي اللي مسؤولة عن إفراز الهرمونات اللي بتحفز الخصية على إنتاج الحيوانات المنوية وهرمون الذكورة ، وبالتالي لو حصل اي خلل في الغدة النخامية ، مش هيكون في إفراز للهرمونات دي ، وهيؤدي إلي توقف الخصية عن انتاج الحيوانات المنوية وهيسبب تاخر في الانجاب.

4/ وجود انسداد في القنوات المنوية : بمعنى أن الحيوان المنوي بيمشي رحلة طويلة من اول ما بيطلع من الخصية ولحد ما بيخرج من القضيب وقت القذف ، وبالتالي لو حصل اي مشكلة او انسداد في أي جزء من الطريق اللي بيمشي فيه الحيوان المنوي ، ده هيمنع خروجه واختلاطه بالسائل المنوي وقت القذف وهيسبب انعدام في الحيوانات المنوية و تاخر الانجاب.

5/ القذف المرتجع : بمعنى أن السائل المنوي بيخرج وقت القذف من مجرى البول في القضيب الى عنق الرحم ، لكن لو الشخص ده عنده مشكلة في القذف وعنده قذف مرتجع ، في الحالة دي هنلاقي ان السائل المنوي بيرجع للمثانة بدلا من خروجه من مجرى البول ، والسبب ان في عضلة صغيرة في عنق المثانة بتتقفل وقت القذف علشان تمنع دخول السائل المنوي فيها ، لكن في بعض الحالات بيحصل عندهم ضعف في عضلة المثانة ، ساعتها فتحة المثانة مش بتتقفل وبيدخل السائل المنوي فيها ، وده هيسبب تاخر في الانجاب.

6/ التعرض للعلاج الإشعاعي أو الكيميائي : بمعني ان علاج الامراض السرطانية بيهاجم الخلايا ، ويشوف الخلايا في الخصية على أنها خلايا سرطانية ويبدأ يهاجمها وممكن يتسبب في موتها ، وساعتها انتاج الخصية للحيوانات المنوية هيقف وهيؤدي إلى انعدام الحيوانات المنوية في السائل المنوي وتاخر الانجاب.

علشان كده بننصح دايما اللي هيتعرضوا للعلاج الإشعاعي أو الكيميائي انهم يجمدوا عينة من الحيوانات المنوية ، علشان يستخدموها بعد التعافي في عمليات الحقن المجهري.

7/ التدخين بشراهة : لأن مادة النيكوتين الموجودة في السجائر بتقلل من وصول الدم إلى الخصية ، وبالتالي بتقلل من وظيفة الخصية في انتاج وتصنيع الحيوانات المنوية ، ده غير انها بتعمل ضيق في الأوعية الدموية الموصلة للعضو الذكري وده بيقلل من تدفق الدم إلى القضيب وممكن يسبب ضعف انتصاب.

8/ السمنة : لأن السمنة من الأمراض الخطيرة اللي بتزود من مستويات هرمون الانوثة بسبب زيادة نشاط انزيم الاروماتيز اللي بيحول هرمون الذكورة الي هرمون انوثة ، ده غير ان بسبب تراكم الدهون في الجسم ، ده هيقلل من مستوي هرمون الذكورة وهياثر على صحة وجودة الحيوانات المنوية وهيسبب تاخر في الانجاب.

9/ ارتفاع ضغط الدم : بمعنى أن ارتفاع ضغط الدم بيؤدي إلى تلف الأوعية الدموية وبياثر على تدفق الدم إلى الأعضاء التناسلية وممكن يسبب ضعف انتصاب ، وساعتها مش هيكون في علاقة زوجية وبالتالي هيحصل تأخر في الإنجاب.

وبعد ما عرفت اي الاسباب اللي ممكن تؤدي إلى اصابة الرجل بالعقم الثانوي بعد انجاب الطفل الاول ، تعالوا نعرف ازاي نعالج العقم الثانوي عند الرجال : 

بس في الاول لازم تكون عارف ان علاج أي مشكلة بيعتمد على سبب المشكلة نفسها ، بمعني اننا نشوف ايه سبب المشكلة ونعالجها ، ولو كان سبب العقم الثانوي عند الرجل هو 

1/ دوالي الخصية : وقتها لازم نعالج دوالي الخصية بالجراحة الميكروسكوبية افضل واحسن طريقة تعالج بيها دوالي الخصية من غير ما تضر الخصية.

2/ ولو كان السبب قذف مرتجع :  وقتها هناخد أدوية علشان ننشط عضلة عنق المثانة ويرجع السائل المنوي يخرج تاني من مجرى البول ويحصل حمل طبيعي.

3/ أما لو كان السبب التهابات في الجهاز التناسلي : وقتها هنطلب من المريض أنه يعمل مزرعة سائل منوي علشان نحدد نوع البكتيريا ، والمضاد الحيوي المناسب ليها. 

4/ ولو كان السبب التدخين : وقتها العلاج اننا نبعد عن التدخين عشان نحسن من صحة وجودة الحيوانات المنوية. 

5/ ولو كان سبب العقم الثانوي خلل في الهرمونات : العلاج هيكون بالأدوية علشان ننشط الخصية ونظبط مستوي الهرمونات في الجسم ويحصل حمل طبيعي.

في النهاية ، لازم تكون عارف ان مش علشان خلفت مرة او اتنين قبل كدة يبقي انت دلوقتي سليم و معندكش مشاكل ، خليك عارف ومتاكد ان في مشاكل وأمراض ممكن تظهر مع الوقت وتقدم السن وتكون السبب في العقم وتاخر الانجاب ، بس ده ميخلكش تفقد الامل ابدا ، لان ربنا سبحانه وتعالى لما خلق الداء ، خلق معاه الدواء ، بس كل اللي علينا اننا نكشف ونسعى لطلب الشفاء.

ولو محتاج تتابع معانا مشكلتك ، تقدر تتواصل مع الفريق الطبي علي الرقم ده 01018874287 وهما هيحددولك ميعاد مع الدكتور اسامة محمد البكل مدرس واستشاري طب وجراحة امراض الذكورة وتاخر الانجاب والصحة الجنسية بطب القصر العيني.