هل مشاكل البروستاتا بتسبب ضعف انتصاب ؟
فيه أمراض ومشاكل صحية كثيرة ممكن تصيب الرجالة وتأثر على قدرتهم الجنسية ، ومن ضمنها مشاكل البروستاتا ، لكن السؤال هنا بقى ، هل البروستاتا بتأثر على انتصاب القضيب ؟ الإجابة أيوه ، لأن أمراض البروستاتا بيكون ليها تأثير كبير على القدرة الجنسية زي انخفاض الرغبة الجنسية وضعف الانتصاب.
ودلوقتي تعالوا نعرف :
إيه هي البروستاتا وعلاقتها بالقدره الجنسية؟
لازم تكون عارف ان البروستاتا هي غدة موجودة عند كل الرجالة ، وبتكون في نهاية مجرى البول ، ولما بيحصل فيها التهاب شديد ، ده طبعا بيأثر على الانتصاب ، وده لأن الأعصاب اللي بتغذي العضو الذكري بتعدي على جدار البروستاتا عشان كده ، لو حصل التهاب شديد ، او مزمن ، أو احتقان ، أو تورم في البروستاتا ، ده هيأثر على العضو الذكري وهيسبب ضعف في الانتصاب.
لكن مهم تعرف إن في فرق بين التهاب واحتقان البروستاتا وبين تضخم البروستاتا.
- التهاب أو احتقان البروستاتا ممكن يحصل بسبب العدوى البكتيرية وممكن يحصل في أي سن.
- أما تضخم البروستاتا بيحصل لكل الرجالة مع التقدم في العمر.
وده لأن كل الأعضاء التناسلية عند الرجل (العضو الذكري – والخصيتين – والحويصلة المنوية) بتتوقف عن النمو بعد البلوغ وبتفقد استجابتها للهرمون الذكري ، إلا غدة البروستاتا بتفضل مستجيبة وبتكبر مع الوقت ، وده ممكن يكون ليه سبب وراثي.
طب هل حجم البروستاتا ليه علاقة باعراضها ؟
حجم البروستاتا مالوش علاقة بالأعراض ، وده بيختلف من شخص للتاني ، لان في ناس البروستاتا عندهم بتتضخم بشكل كبير وأعراضها بسيطة ، وفيه ناس العكس ، ممكن المريض يشتكي من أعراض تانية زي زيادة عدد مرات التبول نتيجة تهيج جدار المثانة ، وده لأن البروستاتا لما بتتضخم بتأثر على المثانة وبتخليها حساسة (مثانة عصبية).
ودلوقتي تعالوا نعرف مع بعض :
إمتي يكون ضعف الانتصاب بسبب التهاب البروستاتا ؟
في حالة واحدة بس ممكن نقول فيها إن ضعف الانتصاب اللي عند الشخص ده بسبب أمراض البروستاتا ، لو كان المريض بيشتكي من ضعف في الانتصاب ومعاه أعراض لمشاكل البروستاتا زي:
- حرقان في البول
- تقطيع في نزول البول
- صعوبة في التبول
- حرقان أثناء القذف مع ألم بين الخصية.
ولو عايز تعرف اي علاقة مشاكل البروستاتا بضعف الانتصاب ، اسمع الفيديو ده مع الدكتور اسامة البكل…
إمتي مشاكل البروستاتا متأثرش على الانتصاب ولا على قدرتنا الجنسية ؟؟
لان كتير من المرضى بيفتكروا إن علاج تضخم أو التهاب البروستاتا ليه علاقة بالانتصاب ، ولازم تكون عارف ان ده اعتقاد خاطئ تماما.
لان التهابات ومشاكل البروستاتا مالهاش تأثير مباشر على الانتصاب ، طالما إن المريض استجاب للعلاج الدوائي المخصص للبروستاتا زي المضادات الحيوية والعلاجات الثانية ، هيقدر بعد كده عادي يحافظ على انتصاب العضو الذكري من غير ما يواجه أي مشاكل وقت العلاقة الزوجية.
طب لو المريض مستجبش للعلاج الدوائي؟
في الحالة دي ممكن نلجأ للجراحة لاستئصال البروستاتا ، سواء عن طريق مجرى البول أو الجراحة التقليدية ، وده ممكن يأثر بشكل سلبي على القدرة الجنسية ويسبب ضعف في الانتصاب ، لان عمليات الحوض وخصوصًا عمليات البروستاتا ، بتأثر على الأعصاب المغذية للقضيب ، وده ممكن يسبب للمريض ضعف جنسي بعد العملية.
عشان كده بننصح أي مريض عمل عملية في البروستاتا إنه يستشير دكتور بعد التعافي عشان يحدد له خطة علاج تساعد على تحسين الدورة الدموية في القضيب وتقليل احتمالية أن يحصله ضعف الانتصاب بعد العملية ، لأنه للأسف لو اتاخر في الاستشارة ، وقتها الحل الوحيد هيكون تركيب دعامة في العضو الذكري ، سواء دعامة مرنة أو هيدروليكية ، علشان المريض يقدر يمارس حياته الزوجية بشكل طبيعي.
ولو عايز تعرف هل التهابات البروستاتا بتسبب تأخر في الإنجاب ولا لا ، اضغط هنا….