هل تشوهات الحيوانات المنوية تسبب العقم عند الرجال ؟

هل تشوهات الحيوانات المنوية تسبب العقم عند الرجال ؟

يعتبر العقم من أهم التحديات الصعبة اللي بتواجه اي زوجين في جميع أنحاء العالم ، والرجل في معظم الحالات ممكن يكون السبب الرئيسي في حدوث العقم ، وواحدة من اهم هذه الاسباب هي تشوهات الحيوانات المنوية لأنها بتاثر على قدرة الحيوان المنوي على الوصول إلى البويضة وتخصيبها وساعتها هيكون من الصعب على أي زوجين حدوث الحمل الطبيعي.

ودلوقتي تعالوا نعرف مع بعض ايه هي النسبة الطبيعية لتشوه الحيوانات المنوية في عينة السائل المنوي ، 

وامتي نقول على الحيوان المنوي انه مشوه ومش هيقدر يخصب البويضة : 

في البداية لازم تكون عارف ان الشخص السليم لازم يكون عنده نسبة من الحيوانات المنوية المشوهة في العينة ، والنسبة دي بتكون اقل من 96% ودي اللي بتأكد ان الشخص ده عنده خصوبة جيدة ، لكن في حالة لو النسبة دي زادت عن 96% فده معناه ان الشخص ده عنده نسبة عالية جدا من الحيوانات المنوية المشوهة وهيواجه صعوبة كبيرة في حدوث الحمل الطبيعي.

ولو عايز تعرف معلومات اكثر عن النسبة الطبيعية لتشوه الحيوانات المنوية ، اسمع الفيديو ده مع الدكتور اسامة محمد البكل …

لكن امتي بقي نقول على الحيوان المنوي انه مشوه ومش هيقدر يخصب البويضة ؟ 

الاول لازم تبقي عارف ان الحيوان المنوي بيكون ليه رأس وعنق وذيل وكلا منهم بيكون ليه مواصفات معينة علشان يدي القدرة للحيوان المنوي على الوصول إلى البويضة وتخصيبها : 

• رأس الحيوان المنوي :

1/ رأس الحيوان المنوى لازم تكون بيضاوية الشكل.

2/ رأس الحيوان المنوى بيكون فيها 23 كروموسوم اللي هي المادة الوراثية للزوج و اللي بتكون مسؤولة عن تكوين الجنين ، و هنا عشان الحيوان المنوى يكون سليم ، لازم تكون المادة الوراثية دي سليمة ومفيهاش نسبة تفتت أو أي عيوب خلقية او اي مشاكل في الجينات أو في عدد الكروموسومات ، لان لو فيها خلل هيحصل مشكلة في الاجنة ، اما انها مش هتتولد اصلا او هتتولد بعيوب خلقية.

3/ ولازم رأس الحيوان المنوى يكون عليها الاكروسوم وده حاجة عامله كده زي الكاب ، حجمه بيكون حوالي من 40 إلى 70 % من حجم الحيوان المنوي ، و الاكروسوم ده بيكون فيه انزيمات هي اللى بتكون مسؤولة عن ان الحيوان المنوي يخترق البويضة ، ولو الاكروسوم ده مش موجود ، ساعتها الحيوان المنوى هيكون مشوه و مش هيقدر يخترق البويضة.

• عنق الحيوان المنوي : 

عنق الحيوان المنوى يعتبر هو مصدر الطاقة اللي بيحرك ذيل الحيوان المنوي ويساعده في الانتقال من مهبل الزوجة بعد القذف عشان يوصل لقناة فالوب و يخصب البويضة.

• ذيل الحيوان المنوي :

1/ لازم ذيل الحيوان المنوى يكون مستقيم ، وطوله حوالي 45 ميكرومتر.

2/ ولازم يكون جوا الذيل أنابيب رفيعة جمب بعض والأنابيب دي بتتفاعل مع بعض وهى اللى بتخلي الذيل يتحرك يمين وشمال فيدي الحيوان المنوي القدرة على الحركة.

3/ ولازم كمان الذيل يكون سليم ومفيهوش أي عيوب خلقية عشان الحيوان المنوى يعرف يتحرك و يوصل للبويضة ويخصبها ويحصل حمل. 

و هى دى المواصفات اللى بتقول ان الحيوان المنوي سليم ، لكن لو لقينا ان شكل الحيوان المنوي مختلف عن كل المواصفات دي ، زي ان يكون : 

• رأس الحيوان المنوي أكبر أو أصغر من المعدل الطبيعي.
• أو أن الحيوان المنوى يكون عنده رأسين.
• او فى اى عيوب في العنق.
• او لو الذيل كان صغير أو معوج او مش موجود اصلا.
• أو لو كان في أكثر من ذيل للحيوان المنوى.

في الحالات دي هيكون حيوان منوي مشوه ، و مش هيقدر انه يخصب بويضة ويكون جنين.

وفي اسباب كتير ممكن تكون سبب إصابة الرجل بتشوه الحيوانات المنوية ، زي : 

1/ الإصابة بدوالي الخصية : لأنها بتاثر على الدورة الدموية في الخصية ، وده طبعا بيأثر على صحة وجودة الحيوانات المنوية و بيتسبب في تفتيت المادة الوراثية في رأس الحيوان المنوي.

2/ خلل الهرمونات : و ده عبارة عن خلل فى نسبة هرمون الذكورة أو هرمون الأنوثة ، و اللى بيكون سبب فى ان يحصل قصور في وظيفة الغدد التناسلية و ده هيأثر على إنتاج وجودة الحيوانات المنوية.

3/ الالتهابات أو العدوى في الجهاز التناسلي : زى التهاب الخصية أو البربخ أو الأمراض المنقولة جنسيًا ، وكل الامراض دى بتأثر على كفاءة إنتاج الحيوانات المنوية وجودتها.

4/ التعرض للعلاج الكيميائي او الاشعاعي : لان العلاج ده بيأثر على انتاج الخصية للحيوانات المنوية ، وعشان كده يفضل اننا نعمل تجميد للحيوانات المنوية لو كنا هنتعرض للعلاج الكيميائي أو الإشعاعي قبل بداية العلاج عشان نستخدمها في عمليات الحقن المجهري.

5/ لو عندنا أي أمراض مزمنة : زي السكر او الضغط او تصلب الشرايين ، لان الامراض دي بتأثر على الدورة الدموية في الخصية وبتسبب تشوه في الحيوانات المنوية.

6/ واخيرا لو عندنا عيب خلقي في الخصية ، خلاها تنتج حيوانات منوية مشوهة.

لكن قبل ما تفقد الامل ، خليني اقولك ان كل مشكلة وليها علاج ، وعلاج تشوه الحيوانات المنوية بيكون على حسب سبب المشكلة ايه ، بمعني ان لو كان السبب في تشوه الحيوانات المنوية هي دوالي الخصية ، ساعتها هنعالج دوالي الخصية بالجراحة الميكروسكوبية ، أما لو كان السبب وجود خلل في الهرمونات ، ساعتها هتاخد علاج هرموني عشان نظبط بيه مستوي الهرمونات في الجسم وترجع الخصية تنتج حيوانات منوية سليمة ، أما لو كان سبب التشوه التهابات أو عدوى في الجهاز التناسلي ، ساعتها هناخد أدوية مضاد حيوي علشان نعالج الالتهاب ، وفي خلال 6 شهور بس ، هنكون عالجنا التشوه وهيحصل حمل طبيعي.

وفي النهاية ، لازم تبقي عارف ان تشوه الحيوان المنوي مش حالة خطيرة وميئوس منها ، الاهم ان يكون عندك الأمل والثقة في الله اولا ثم في خبرة الدكتور ثم في العلاج ، علشان يكون عندك أعلى فرصة ان يحصل حمل طبيعي ويكون عندك طفل سليم.

ولو خلاص فكرت وقررت تبدأ رحلة العلاج معانا ، تقدر تتصل بينا على رقم 01018874287 واحنا هنحجزلك ميعاد مع الدكتور اسامة محمد البكل مدرس واستشاري طب وجراحة امراض الذكورة وتاخر الانجاب والصحة الجنسية بطب القصر العيني.