هل تزداد دوالي الخصية مع الوقت ؟
دوالي الخصية تعتبر واحدة من اهم اسباب العقم وتأخر الإنجاب عند حوالي 40% من الرجال ، ده غير انها تصيب حوالي 15% من الشباب البالغين ، لكن مهم تبقي عارف ان الخطورة مش في كل ده ، الخطورة كلها لو اكتشفت ان عندك دوالي في الخصية واهملتها ومعالجتهاش ، لان مع الوقت درجة الدوالي هتكبر وهتسبب مضاعفات كثيرة ممكن توصل لضمور الخصية.
ودلوقتي تعالوا نعرف مع بعض ايه هى اصلا دوالي الخصية :
في البداية لازم تكون عارف ان دوالي الخصية هي عبارة عن تضخم في الاوردة المحيطة بالخصية ، والتضخم ده بيحصل نتيجة ضعف الصمامات الموجودة في الاوردة واللي بتكون مسؤولة عن تنظيم تدفق الدم من الخصيتين الى القلب ومنع عودته تاني للخصية بعد تدفقه ، فلما بيحصل اي خلل او ضعف في الصمامات ، ساعتها الدم اللي طالع من الخصية في اتجاه القلب هيرجع تاني للخصية وهيفضل يتراكم داخل الاوردة وهو ده اللي بيسبب دوالي الخصية.
ولازم تكون عارف ان دوالي الخصية 3 درجات :
- الدرجة الأولى : تعتبر ابسط درجة من درجات دوالي الخصية ، ومش بتكون مسببة ألم للمريض ، والدكتور مش بيقدر يحسها أو يلمسها إلا من خلال الفحص بالموجات فوق الصوتية.
- الدرجة الثانية : في الدرجة دي الاوردة بتكون مش مرئية ، لكن الدكتور بيقدر يلمسها لما بيطلب من المريض انه ياخذ نفس عميق ويحبسه فترة قصيرة علشان يعرف يفحص كيس الصفن ويشوف لو في أي كتل أو أوردة متضخمة.
- الدرجة الثالثة : تعتبر اخطر درجة من درجات دوالي الخصية ، لأن الأوردة فيها بتكون متضخمة والدكتور بيقدر يلمسها ويفحصها بسهولة جدا ، لانها بتكون عاملة تغير كبير وواضح في شكل كيس الصفن وحجمه.
ودلوقتي تعالي اجاوبك على سؤالك ، هل دوالي الخصية بتزداد مع الوقت ؟
في البداية لازم تكون عارف ان دوالي الخصية لو اهملنها ومعالجنهاش هتزداد مع الوقت وهتسبب مضاعفات كثيرة جدا ، زي :
1/ دوالي الخصية بتسبب للمراهقين بطء في نمو الخصية ، ومع الكبار بتسبب صغر وانكماش في حجم الخصية ومع الوقت ممكن يوصل لضمور الخصية.
2/ وبتسبب تأخر في الإنجاب : وهنا لازم تكون عارف ان الخصية هي المصنع اللي بينتج الحيوانات المنوية ، والخصية علشان تقدر تنتج حيوان منوي سليم وخالي من اي عيوب او تشوه ويقدر يخصب البويضة ويكون جنين ، لازم درجة حرارتها تكون أقل من درجة حرارة الجسم الطبيعية بحوالي درجتين ، عشان الدم اللي يوصلها يكون دم بارد فتقدر تنتج الحيوانات المنوية.
لكن لو الشخص ده كان بيعاني من دوالي في الخصية وخصوصا بقى لو كانت الدوالي من الدرجة الثالثة ، وقتها الدوالي هترفع من درجة حرارة الخصية وهتزيد من تراكم المواد المؤكسدة ( ros ) اللي :
- هتاثر على الخصية وانتاجها للحيوانات المنوية.
- وهتضر بالحيوانات المنوية السليمة والمكتملة.
- وهتسبب تكسير في المادة الوراثية الموجودة في راس الحيوان المنوي.
- ده غير انها هتسبب نقص في عدد الحيوانات المنوية وضعف في حركتها وزيادة في نسبة التشوهات ، وكل ده هيسبب تأخر في الانجاب ، لان وقتها مش هيكون في حيوان منوي سليم قادر انه يخصب البويضة ويكون جنين.
وهي دي كل المضاعفات اللي هتحصل لو اهملت دوالي الخصية ومعالجنهاش ، علشان كدة اول ما تحس بوجع في الخصية لازم تكشف فورا ، ولو كانت دوالي الخصية ، لازم تعالجها ، وعلاج دوالي الخصية الوحيد هو الجراحة ، بالجراحة الميكروسكوبية افضل واحسن طريقة تعالج بيها دوالي الخصية ومن غير ما تضر الخصية أو تضر بوظيفتها ، لكذا سبب :
1/ لان في الجراحة الميكروسكوبية ، بنستخدم الميكروسكوب الجراحي اللي بيكبر الرؤية لحد 25 ضعف ، وده بيساعدنا اننا نشوف مكان العملية بشكل اوضح.
2/ وبسبب قوة تكبير الميكروسكوب ، بنقدر نحافظ علي الشريان الخصوي اللي بيغذي الخصية ، وبكدة مش هيحصل اي ضرر للخصية.
3/ ونقدر كمان نتجنب ربط الأوعية الليمفاوية ، وبكدة مش هيحصلنا قيلة مائية على الخصية.
4/ ده غير اننا بنقدر نربط كل الأوردة في الخصية ، حتى الاوردة الصغيرة والثانوية اللي بتكون موجودة على جدار الحبل المنوي ، وبكدة مش هيكون عندنا أي فرصة لرجوع الدوالي تاني بعد العملية.
5|/ والعملية نفسها مش بتستغرق أكثر من ساعة واحدة بس ، وبعدها بتقدر تخرج من المستشفى في نفس اليوم ، وتقدر كمان بعد 3-5 أيام من العملية انك تنزل شغلك وتمارس حياتك الطبيعية.
6/ وبالنسبة للعلاقة الزوجية بتقدر تمارسها بعد العملية باسبوع واحد بس.
ولو عايز تعرف امتي تقدر تمارس الرياضة وتروح شغلك بعد عملية دوالي الخصية بالميكروسكوب ، اسمع الفيديو ده مع الدكتور اسامة البكل…
وفي النهاية ، لازم تكون عارف ان الخصية هي جزء اساسي من الجهاز التناسلي ، ولو حصل فيها اي مشكلة زي دوالي الخصية واهملتها ومعالجتهاش ، مع الوقت المشكلة دي هتكبر والمضاعفات بتاعتها هتزيد ، وساعتها ممكن توصل انك تحرم نفسك من الإنجاب طول حياتك ، لانك هتكون ضريت وظيفة الخصية اللي هي اصلا اساس انتاج الحيوانات المنوية.
ولو خلاص قررت تتابع معانا مشكلتك ، تقدر تتواصل مع الفريق الطبي علي الرقم ده 01018874287 وتطلب منهم يحددولك ميعاد مع الدكتور اسامة محمد البكل مدرس واستشاري طب وجراحة أمراض الذكورة وتأخر الإنجاب والصحة الجنسية بطب القصر العيني.