هل نقص هرمون الذكورة عند الرجال بيسبب العقم ؟
هرمون الذكورة (التستوستيرون) يُعتبر من أهم الهرمونات عند الرجل ، لأنه يعتبر المسؤول الأول والرئيسي عن الوصول لمرحلة البلوغ ، وبيساهم بشكل كبير جدًا في عملية إنتاج الحيوانات المنوية و الإنجاب ، والنسبة الطبيعية لهرمون الذكورة في الجسم لو زادت أو قلت عن المعدل الطبيعي هتسبب مشاكل كتير، من أهمها العقم وتأخر الإنجاب.
بس قبل ما نعرف ازاي هرمون الذكورة ممكن يسبب لنا عقم ، تعالوا الاول نعرف ايه هو اصلا هرمون الذكورة:
في البداية ، لازم تكون عارف إن هرمون التستوستيرون هو هرمون بيتفرز في الخصية أثناء نمو الجنين في رحم الأم ، بمعنى أن الغدة النخامية بتفرز هرمون LH، اللي بيبدأ يمشي في الدم ويروح لخلايا ليدج في الخصية ، والخلايا دي اللي بتفرز هرمون الذكورة.
والهرمون ده بيكون مسئول عن حاجات كتير زي:
- ظهور شعر الجسم والوجه.
- خشونة الصوت.
- بناء العضلات وقوة بنية الجسم.
- إنتاج الحيوانات المنوية في الخصية.
- زيادة الرغبة الجنسية وحدوث الانتصاب.
وبعد ما عرفنا أهمية هرمون الذكورة ، تعالوا نعرف مع بعض ايه هي المشاكل اللي بتسبب نقص في هرمون الذكورة…
- خلل في الغدة النخامية:
- لأن زي ما قولنا قبل كده ان الغدة النخامية مسؤولة عن إفراز هرمونات بتحفز إنتاج الحيوانات المنوية وهرمون الذكورة.
- بالتالي أي خلل فيها هيؤدي إلى توقف إفراز الهرمونات ، وبالتالي توقف الخصية عن إنتاج الحيوانات المنوية وهرمون الذكورة ، مما يسبب تأخر الإنجاب.
- السمنة المفرطة:
- وهنا لازم تكون عارف معلومة مهمة جدًا، وهي إن السمنة المفرطة بتسبب مشاكل كتير، زي إنها بتزود هرمون الأنوثة (E2) بسبب زيادة نشاط إنزيم الأروماتيز اللي بيحول هرمون الذكورة الي هرمون أنوثة ، وكمان بسبب مقاومة الإنسولين وتراكم الدهون ، وده كله بيقلل هرمون الذكورة (التستوستيرون) وبيخلّي التوازن الطبيعي للهرمونات في الجسم يضطرب.
- ده غير ان نقص هرمون الذكورة بيؤدي إلي نقص أو انعدام الحيوانات المنوية ، وبالتالي تأخر الإنجاب.
- الإصابة بسرطان الخصية أو البروستاتا أو التعرض للعلاج الإشعاعي أو الكيماوي:
- لان العلاج بيؤثر على الخصية وإنتاج الحيوانات المنوية.
- أمراض الكلى أو الكبد:
- تؤدي لانخفاض هرمون الذكورة وضعف الرغبة الجنسية.
- ارتفاع ضغط الدم:
- يسبب نقص هرمون الذكورة وضعف في الرغبة الجنسية ، وضعف الانتصاب ، وبالتالي مش هيبقي في علاقة زوجية وهيحصل تاخر في الانجاب.
- التقدم في العمر:
- لأن مع تقدم السن ، طبيعي ان يحصل انخفاض في مستوى هرمون الذكورة.
- الإصابة بدوالي الخصية:
- وخاصة لو كانت الدوالي دي من الدرجة الثانية أو الثالثة ، ساعتها الأوردة اللي بتخرج الدم من الخصية هتضعف ومش هتبقي قادرة انها تخرج الدم بره ، والدم هيبدا يتجمع في الوريد ويسخن ويرفع من درجة حرارة الخصية ويزيد من تراكم المواد المؤكسدة ( ROS ) وده طبعا هياثر علي خلايا ليدج المسؤولة عن إنتاج هرمون الذكورة ، و هياثر علي إنتاج الحيوانات المنوية وبالتالي هيسبب العقم وتاخر الانجاب.
ولو عايز تعرف معلومات اكثر عن الحالات اللي بتسبب نقص في هرمون الذكورة وانعدام الحيوانات المنوية ، اسمع الفيديو ده مع الدكتور اسامة البكل…
إذ نقص هرمون الذكورة عن المعدل الطبيعي بيسبب العقم وتأخر الإنجاب ، وبالتالي علشان نعالج نقص هرمون الذكورة ( التستوستيرون ) لازم الاول نعالج السبب اللي ادي الي انخفاضه في الجسم ، يعني مثلا لو كان عندنا :
1/ لو كان عندنا مشاكل في الغدة النخامية : وقتها العلاج هيكون هرموني عشان نظبط مستوي الهرمونات في الجسم.
2/ ولو عندنا سمنة مفرطة : لازم نبعد علي قد ما نقدر عن الوجبات السريعة والأكل اللي مليان دهون ونهتم دايما بوزننا وصحتنا.
3/ لو عندك دوالي في الخصية : وقتها لازم نعالج الاول دوالي الخصية عن طريق ربطها بالجراحة الميكروسكوبية.
ولازم عشان تعالج نقص هرمون الذكورة وتحسن الخصوبة ، انك تستخدم أدوية تحفز الخصوبة ، زي أدوية تساعد الجسم على زيادة إنتاج التستوستيرون الطبيعي وإنتاج الحيوانات المنوية.
ومهم جدا انك تتجنب العلاج بالتستوستيرون ، لأنه بيقلل إنتاج الحيوانات المنوية لأنه بيخلي الجسم يوقف إنتاج التستوستيرون الطبيعي اللي مسؤول عن تكوين الحيوانات المنوية.
وهنا لازم نأكد على حاجة مهمة جدا ، ان العلاج بالتستوستيرون ، زي حقن التستوستيرون اللي بياخدها بعض لاعبي كمال الأجسام ، بتقلل إنتاج الحيوانات المنوية بشكل كبير وبيسبب انعدامها تمامًا ، وده طبعا بيحصل لأن الجسم لما يحس إن مستوى التستوستيرون عالي جدًا بسبب الحقن ، بيوقف إنتاج التستوستيرون الطبيعي اللي بيتم إنتاجه في الخصيتين، وده بيأثر بشكل مباشر على تكوين الحيوانات المنوية ، وفي حالات كثير انعدام الحيوانات المنوية مش بيكون ليه علاج ، حتى بعد توقف الحقن ، وده بيأثر بشكل كبير على الخصوبة وفرص الإنجاب.
في النهاية ، لو عندك نقص في هرمون الذكورة في الجسم ، اوعي تسمع كلام حد وتحقن نفسك بهرمون الذكورة ، لانك كدة مش بتعالج المشكلة ، انت بتزود عليها مشاكل اكبر ، وبتوقف الخصية انها تنتج هرمون الذكورة بشكل طبيعي وتنتج كمان حيوانات منوية وده هيسبب لك مشاكل كبيرة جدا في الإنجاب.
ولو لسه عاوز تعرف أكتر عن نقص هرمون الذكورة، ممكن تتواصل مع فريقنا الطبي على رقم 01018874287، وهما هيجاوبوا على كل استفساراتك. أو تقدر تطلب منهم تحديد ميعاد مع الدكتور أسامة محمد البكل، مدرس واستشاري طب وجراحة أمراض الذكورة وتأخر الإنجاب والصحة الجنسية بطب القصر العيني.