هل انعدام الحيوانات المنوية يعني العقم ؟

هل انعدام الحيوانات المنوية يعني العقم ؟

يوجد حوالي 15% من الأزواج اللي بيواجهوا مشاكل في تأخر الحمل أو العقم ، ولكن ده مش معناه ان النسبة دي كلها بتظهر عليهم أي علامة من علامات العقم ولم يكتشفوا وجود مشكلة الا من خلال الكشف وعمل التحاليل والفحوصات اللي بتأكد أن الزوج يعاني من مشكلة في حدوث الحمل وهي وجود انعدام في الحيوانات المنوية. 

ومن خلال المقال ده هنتكلم بالتفصيل عن مشكلة انعدام الحيوانات المنوية ، وهل بالضرورة هي سبب العقم عند الرجل…

ودلوقتي تعالي اجاوب على سؤالك واقولك هل انعدام الحيوانات المنوية يعني العقم ؟ 

بس في البداية لازم تكون عارف ان الخصية هي المصنع اللي بينتج الحيوانات المنوية المسؤولة عن الإنجاب واللي دورها انها تسبح لحد ما توصل للبويضة وتخصبها علشان يحصل حمل طبيعي ، لكن انعدام الحيوانات المنوية هي جملة بتشير إلى عدم وجود أي حيوانات منوية في السائل المنوي.

وانعدام الحيوانات المنوية بتعني العقم ، لأنها بتمنع وصول الحيوانات المنوية إلى البويضة وتخصيبها ، ومع ذلك في حالات كثير يمكن علاجها أو ممكن نلجأ إلى تقنيات طبية مساعدة زي ، التلقيح الصناعي أو الحقن ألمجهري لزيادة فرص الإنجاب.

ودلوقتي تعالوا نعرف مع بعض ايه هي أسباب انعدام الحيوانات المنوية في السائل المنوي : 

1/ وجود خلل جيني زي متلازمة كلاينفلتر : وده مرض بيحصل نتيجة وجود خلل في جينات الشخص ، بمعنى ان الشخص الطبيعي بيكون عنده 46 كروموسوم ، اثنين منهم الكروموسومات الجنسية XY للذكور و XX للإناث ، لكن الشخص المصاب بمتلازمة كلاينفلتر بيكون عنده 47 كروموسوم ، بمعنى وجود كروموسوم X زيادة في الخلايا XXY ، وده بيحصل نتيجة خلل في مرحلة انقسام الخلايا أثناء توزيع الكروموسومات للجنين من الأب والأم ، والمتلازمة دي بتأثر على الخصية وعلى انتاجها للحيوانات المنوية وهرمون الذكورة.

2/ الخصية المعلقة : وده عيب خلقي بيصيب الأطفال الذكور بعد الولادة مباشرة ، و يتسبب في أن خصية واحدة أو الاثنين فضلوا معلقين داخل البطن ومنزلتش إلى مكانها الطبيعي في كيس الصفن ، والخصية المعلقة لازم تتعالج بالجراحة خلال السنة الأولى من عمر الطفل ، لأنها لو فضلت معلقة داخل البطن ، هتتعرض لدرجة حرارة الجسم العالية ، وده طبعا هيسبب ضمور للخصية وعدم إنتاجها للحيوانات المنوية.

3/ وجود التهابات في الخصية : بمعنى إصابة الخصية بعدوى أو التهاب نتيجة الأمراض المعدية المنقولة جنسيا ، وده بيسبب انسداد أو ضعف في أنسجة الخصية وعدم إنتاجها للحيوانات المنوية.

4/ دوالي الخصية : وهي عبارة عن تضخم في الاوردة المحيطة بالخصية الموجودة داخل كيس الصفن ، وده بياثر علي الدورة الدموية في الخصية ، وبيؤدي الى رجوع الدم تاني للخصية وده بيخلى الدم يتراكم في الأوردة و يرفع من درجة حرارة الخصية ويزيد من تراكم المواد المؤكسدة ROS ، ويضعف وظيفتها في إنتاج الحيوانات المنوية.

5/ وجود انسداد في القنوات المنوية : بمعني ان في عائق أو حاجز بيمنع خروج الحيوانات المنوية من الخصية واختلاطها بالسائل المنوي وخروجها من القضيب وقت القذف سواء كان انسداد خلقي او بسبب عدوى أو التهابات او حتى خطأ طبي أثناء عملية جراحية زي اصلاح الفتق الاربي.

6/ خلل في الهرمونات : بمعنى وجود مشكلة في الغدة النخامية خلتها متفرزش هرمون FSH و LH ، اللي مسئولين عن تحفيز الخصية انها تنتج الحيوانات المنوية وهرمون الذكورة ، بالتالي لو في اي خلل في إفراز الهرمونات دي ، هيؤدي الى انعدام الحيوانات المنوية.

7/ التعرض للعلاج الكيماوي والإشعاعي : بمعني ان علاج الامراض السرطانية بياثر على الخصية ، وعلى البؤر المنوية في الخصية ، وممكن يتسبب في موت الخلايا وانعدام الحيوانات المنوية ، علشان كده مهم اللي هيتعرض للعلاج الكيماوي ، انه يجمد عينة من الحيوانات المنوية عشان يستخدمها بعد التعافي في عمليات الحقن المجهري.

وبعد ما عرفنا الاسباب اللي بتؤدي الى انعدام الحيوانات المنوية في السائل المنوي ، تعالوا نعرف مع بعض ازاي نعالج المشكلة دي : 

في البداية لازم تبقي عارف ان علشان نعالج انعدام الحيوانات المنوية في السائل المنوي ، لازم الاول نعالج السبب اللي ادى الى المشكلة من البداية ، بمعنى ان لو كان السبب في انعدام الحيوانات المنوية ، هو : 

1/ وجود التهابات في الخصية : وقتها هنطلب من المريض أنه يعمل مزرعة سائل منوي علشان نتاكد من وجود الالتهابات ونحدد نوع الميكروب ونختار المضاد الحيوي المناسب اللي نقدر نعالج بيه الالتهابات. 

2/ أما لو كان السبب دوالي في الخصية : وقتها هيكون لازم نعالج دوالي الخصية بالجراحة الميكروسكوبية افضل واحسن طريقة نعالج بيها دوالي الخصية من غير ما نضر الخصية.

3/ لكن لو كان السبب هو وجود انسداد في القنوات المنوية : وقتها هنضطر نسحب عينة من الخصية بالابرة ونستخرج منها الحيوانات المنوية ونعمل بيها حقن مجهري.

4/ ولو كان السبب خلل في الهرمونات : العلاج هيكون بالأدوية علشان ننشط الخصية ونظبط مستوي الهرمونات في الجسم ويحصل حمل طبيعي.

ولو عايز تعرف هل حالات انعدام الحيوانات المنوية ممكن يحصل معاها إنجاب طبيعي ، اسمع الفيديو ده مع الدكتور اسامة البكل…

ولكن في حالات تانية ، ممكن يتم اللجوء إلى تقنيات الإنجاب المساعدة ، زي :

• التلقيح الصناعي (IUI): يتم فيه إدخال الحيوانات المنوية مباشرة في الرحم. 
• الحقن المجهري (ICSI): يتم فيه حقن حيوان منوي واحد مباشرة في البويضة.

في النهاية ، لازم تبقي عارف ان حتي لو عملت تحليل سائل منوي وطلعت النتيجة ( صفر حيوان منوي ) اوعي تيأس وتفقد الأمل ، علشان كل مشكلة وليها حل ، بس الاهم انك تتشخص صح علشان تلاقي طريق للعلاج ويكون عندك بدل الطفل اثنين وثلاثة.

ولو عايز تبدا معانا رحلة علاجك ، تقدر تتواصل معانا على الرقم ده 01018874287 واحنا هنحجزلك ميعاد مع الدكتور اسامة محمد البكل مدرس واستشاري طب وجراحة أمراض الذكورة وتاخر الانجاب والصحة الجنسية بطب القصر العيني.