هل تؤثر دوالي الخصية على الإنجاب ؟

هل تؤثر دوالي الخصية على الإنجاب ؟

لاشك أن حدوث الحمل بعد فترة معينة من الزواج هو حلم كل زوج وزوجة ، ولكن عند تاخر الحمل بعد مرور سنة كاملة من الزواج ، بنبدا نحس بتوتر في العلاقة ونلجأ للدكاترة للاستشارة الطبية وعمل الفحوصات اللازمة للزوجين ، وساعتها هيتم اكتشاف أن الزوج يعاني من وجود دوالي في الخصية ، ويجي بقي السؤال هنا ، هل ممكن يحدث حمل مع وجود دوالي الخصية ، هل تؤثر دوالي الخصية على الإنجاب ؟ 

في المقال ده هجاوبك علي كل سؤال بيدور في ذهنك ، لكن الأول خليني اقولك ايه هي اصلا دوالي الخصيتين : 

دوالي الخصية هي عبارة عن تضخم في الاوردة المحيطة بالخصية والموجودة جوا كيس الصفن ، والتضخم ده بيحصل نتيجة ضعف الصمامات الموجودة في الاوردة واللي بتكون مسؤولة عن تنظيم تدفق الدم من الخصيتين الى القلب ومنع عودته تاني للخصية ، ولكن لما بيحصل اي خلل في الصمامات دي ، بيبدا الدم اللي طالع من الخصية في اتجاه القلب يرجع تاني للخصية ويفضل يتراكم جوا الاوردة وهو ده اللي بيسبب دوالي الخصية.

ودلوقتي تعالي اجاوبك على سؤالك ، هل تؤثر دوالي الخصية على الإنجاب ؟ 

في البداية لازم تكون عارف ان الخصية هي المصنع المسؤول عن انتاج الحيوانات المنوية ، والخصية علشان تقدر تنتج حيوان منوي سليم ويقدر يخصب البويضة ويكون جنين ، لازم تكون درجة حرارتها أقل من درجة حرارة الجسم الطبيعية بحوالي درجتين ، لكن لو كان الشخص ده يعاني من دوالي في الخصية ، فوجود الدوالي وخصوصا لو كانت من الدرجة الثانية أو الثالثة ، فده هيرفع من درجة حرارة الدم اللي جوا الخصيه وهيزيد من تراكم المواد المؤكسدة ( ros ) اللي هتاثر 

• على الخصية وانتاجها للحيوانات المنوية. 
• وهتضر بالهرمونات المسؤولة عن إنتاج الحيوانات المنوية.
• وهتضر بالحيوانات المنوية السليمة والمكتملة.
• ده غير انها هتسبب تكسير في المادة الوراثية الموجودة في رأس الحيوان المنوي.

وكل ده هيكون السبب في الاصابة بالعقم او تاخر الانجاب ، لان وقتها مش هيكون في حيوان منوي سليم قادر انه يوصل للبويضة ويخصبها. 

وطبعا انت دلوقتي فقدت الامل تماما في الانجاب ، لكن خليني اقولك انك غلطان ، لان اي مشكلة وليها علاج ، ودوالي الخصية ليها اكثر من طريقة للعلاج ، لكن خليني الفت نظرك لنقطة مهمة جدا ، وهي ان علاج دوالي الخصية مش دوائي ، علاج دوالي الخصية جراحيا ، وافضل واحسن طريقة تعالج بيها دوالي الخصية من غير ما تضر الخصية هي الجراحة الميكروسكوبية.

ودلوقتي تعالي اقولك ليه الجراحة الميكروسكوبية افضل طريقة لعلاج دوالي الخصيتين : 

1/ لان المكان اللي بنعمل فيه عملية دوالي الخصية هو مكان حساس ودقيق جدا ، و الميكروسكوب الجراحي بيكبر الرؤية لحد 40 ضعف وده بيخلينا نشوف مكان العملية بشكل اوضح.

2/ وبسبب قوة تكبير الميكروسكوب ، بنقدر اننا نميز بين الاوردة والشرايين في الخصية ونتجنب ربط الشريان الخصوي اللي بيغذي الخصية بالدم ، وبكدة مش هيحصل ضمور للخصية.

3/ وكمان بسبب تكبير الميكروسكوب ، بنقدر نشوف كل الأوردة الصغيرة والثانوية اللي بتكون موجودة على جدار الحبل المنوي اللي بدأت تتضخم ونربطها كلها ، وبكدة مش هيكون في اي فرصة لرجوع الدوالي تاني بعد العملية.

4/ ده غير اننا بنقدر نتجنب ربط الأوعية الليمفاوية بالغلط وقت العملية ، وبكدة مش هيحصلنا قيلة مائية على الخصية.

5/ واخيرا العملية نفسها مش بتستغرق أكثر من ساعة واحدة بس ، وبعدها بتقدر ترجع بيتك بعد 3-4 ساعات ، وبتقدر كمان تنزل شغلك بعد 3-5 أيام من العملية.

6/ أما بالنسبة للعلاقة الزوجية فتقدر تمارسها بعد اسبوع واحد من العملية. 

وبعد العملية انت طبعا عاوز تطمن وتعرف امتي بقي هيحصل حمل طبيعي : 

خليني اقولك ان بعد عملية دوالي الخصية بالجراحة الميكروسكوبية لازم ناخد فترة علاج هرموني من 3 – 6 شهور ، علشان ننشط الخصية وترجع تاني تنتج حيوانات منوية بصورة طبيعية ، وبعد العلاج الهرموني اول تحليل سائل منوي بنعمله بيكون بعد حوالي 6 شهور من العملية ، لان دورة تكوين الحيوان المنوي بتستغرق حوالي 3 شهور علشان الخصية تكون تعافت بشكل كافي من تأثير الدوالي ، وبعدها بنلاحظ تحسن في تحليل السائل المنوي بنسبة تصل الى 70% ، واول حاجة بتتحسن هي عدد الحيوانات المنوية وبعدها الحركة بتتحسن ونسبة التشوهات بتقل ، وفرصة ان يحصل حمل طبيعي بعد العملية تصل إلى 40-45%. 

ولو عايز تعرف هل الحقن المجهري ممكن يكون بديل لعملية دوالي الخصية ؟ اسمع الفيديو ده مع الدكتور اسامة البكل…

وفي النهاية ، لازم تكون عارف ومتاكد ان تحقيق حلم الانجاب عمره ما كان صعب ، ولكن الصعب انك تفقد الثقة في قدرة الله عز وجل ، لأنه سبحانه وتعالى لما خلق الداء خلق معاه الدواء ، بالتالي أي مشكلة هتواجهك لازم تعديها و تبقي عارف ان دوالي الخصية مش حاجة صعبة تقلق منها ، ده ليها علاج نهائي ، وبعد العملية هيكون عندك أعلى فرصة لحدوث الحمل الطبيعي وبدل الطفل هيكون عندك اطفال كثير باذن الله. 

ولو خلاص اخدت قرار العملية معانا ، تقدر تتواصل مع الفريق الطبي على الرقم ده 01018874287 وهما هيحجزولك ميعاد مع الدكتور اسامة محمد البكل مدرس واستشاري طب وجراحة أمراض الذكورة وتأخر الإنجاب والصحة الجنسية بطب القصر العيني.

---