2024-06-04تأخر الإنجاب9 دقائق

ايه هي حالات انعدام الحيوانات المنوية اللي مش هتعمل تفتيش ميكروسكوبي

#انعدام الحيوانات المنوية#التفتيش الميكروسكوبي#تأخر الإنجاب#العقم#الحقن المجهري

ايه هي حالات انعدام الحيوانات المنوية اللي مش هتعمل تفتيش ميكروسكوبي

انعدام الحيوانات المنوية في السائل المنوي من اكثر المشاكل اللي بتؤثر بشكل كبير جدا على خصوبة الرجل ، لكن ده مش معناه العقم التام ، لأن في الحقيقة بيكون ليها علاج عن طريق تقنية حديثة تسمى التفتيش الميكروسكوبي للخصية ، وهي تقنية بنستخدمها عشان نستخرج بيها حيوانات منوية من الخصية فى الحالات اللي بتعاني من انعدام الحيوانات المنوية ، لكن لازم تبقي عارف ان في نسبة كبيرة جدا من الحالات دي بتكون قابلة للعلاج ، ومش بنحتاج اننا نعملها تفتيش ميكروسكوبي من الخصية.

تعاني من هذه العلامة؟

📞 احجز تقييمك الآن: 01018874287

حالات انعدام الحيوانات المنوية القابلة للعلاج:

ودلوقتي تعالوا نعرف مع بعض ، ايه هي الحالات اللي بتعاني من انعدام الحيوانات المنوية وقابلة للعلاج ومش هنعملها تفتيش ميكروسكوبي من الخصية…

1. حالات قصور الغدة النخامية اللي مدخلتش مرحلة البلوغ

في البداية لازم تكون عارف ان الغدة النخامية في المخ مسؤولة عن إفراز هرمونات مهمة زي الـFSH وLH، اللي بيحفزوا الخصية عشان تنتج حيوانات منوية وهرمون الذكورة ، أما في حالة قصور أو خلل في الغدة النخامية ، الهرمونات دي مش بتنتج بشكل كافي ، وبالتالي الخصية مش هتنتج حيوانات منوية وهرمون الذكورة ، فالشخص ده اصلا مدخلش في عملية البلوغ وبيعاني من تأخر الإنجاب.

في الحالة دي بنبدا نديله علاج هرموني لهرمون FSH وLH لفترة طويلة قد تتجاوز سنتين، بعدها نسبة كبيرة منهم تصل ل80% الخصية هتنتج حيوانات منوية وبكدة هيكون عندنا فرصة كبيرة ان يحصل حمل طبيعي ، وحتى لو محصلش حمل طبيعي ممكن نعمل حقن مجهري بس بعد فترة من العلاج الهرموني من غير ما نلجأ لعملية التفتيش الميكروسكوبي.

2. حالات الانسداد في مسار خروج الحيوانات المنوية بسبب التهابات في الحويصلات المنوية أو البروستاتا

بمعني ان احيانا بيحصل التهابات شديدة على مستوى الحويصلات المنوية أو في البروستاتا ولما بنسيبها فترة طويلة ومتعالجتش بتعمل انسداد كامل في مسار خروج الحيوانات المنوية.

في الحالة دي لو اتشخصنا بدري واخدنا فترة من العلاج من المضادات الحيوية ، بنلاقي ان نسبة كبيرة منهم خرجوا حيوانات منوية اثناء القذف وممكن يحصل حمل طبيعي.

وفي بعض الحالات بيحصل عندها تكيس على مستوى البروستاتا أو في الحويصلات المنوية ، في الحالة دي بنعمل استئصال للتكيس الموجود في البروستاتا أو في الحويصلات المنوية ونسلك مسار خروج الحيوانات المنوية وتبدأ تخرج في القذف ويبقي عندنا فرصة ان يحصل حمل طبيعي ، او ممكن نعمل حقن مجهري بحيوانات منوية من القذف.

3. الحالات اللي عندها ارتفاع شديد في مستوى هرمون البرولاكتين

بعض الحالات بيكون عندها ارتفاع في هرمون البرولاكتين نتيجة ورم حميد في الغدة النخامية بيزود من إنتاج الهرمون في الجسم ، و بكده نسبته في الجسم هتزيد ، وهيؤدي الى انعدام الحيوانات المنوية ، و ده لانه بيقلل من إنتاج هرمونات FSH وLH ، بالتالي هيوقف من انتاج الخصية للحيوانات المنوية.

في الحالة دي بنبدا نديله علاج دوائي يقلل من مستوى هرمون البرولاكتين إلى مستوياته الطبيعية ، وفترة العلاج بتكون من 3-6 شهور علي حسب نسبة الهرمون وبعد العلاج عدد الحيوانات المنوية هيرجع طبيعي وكدة هيكون عندنا فرصة كبيرة ان يحصل حمل طبيعي.

4. الحالات اللي معندهاش اي مشاكل سواء على مستوى الهرمونات أو وجود التهابات ، ولكن عندها دوالي كبيرة على الخصيتين من الدرجة الثانية أو الثالثة وماثرة على حجم ووظيفة الخصية

لازم تكون عارف ان دوالي الخصية بتسبب ضعف في جدار الوريد المسؤول عن إخراج الدم من الخصية وبسبب الضعف ده الدم مش بيخرج وبيفضل متجمع في الوريد اللي بيفضل يتمدد عشان يستوعب كل الدم اللي فيه وده هيضر بالخصية وهياثر على انتاجها للحيوانات المنوية.

في الحالة دي بنعالج الدولي الأول عن طريق ربطها بالجراحة الميكروسكوبية وبعدها المريض بياخد علاج هرموني ينشط بيه الخصية ، وبترجع الخصية تنتج حيوانات منوية ، وبكدة بيكون في فرصة يحصل حمل طبيعي او نعمل حقن مجهري.

👨‍⚕️ هل تنطبق عليك هذه النقاط؟
إذا استمرت الأعراض أو أثرت على حياتك الزوجية، فالتقييم الطبي هو الخطوة الصحيحة.
جميع الاستشارات تتم بسرية تامة وخصوصية كاملة.
📱 للحجز المباشر: 01018874287

حالات انعدام الحيوانات المنوية اللي مش هينفع معاها حتى التفتيش الميكروسكوبي:

وبعد ما عرفنا ايه هي الحالات القابلة للعلاج ومش هنعملها تفتيش ميكروسكوبي ، تعالوا نعرف مع بعض ايه هي حالات انعدام الحيوانات المنوية اللي مش هينفع معاها حتى التفتيش الميكروسكوبي

لازم تكون عارف ان في حالات عندها انعدام في الحيوانات المنوية وللاسف حتي التفتيش الميكروسكوبي بالنسبالها مش حل للعلاج ، لانه مش بيكون عندها حيوانات منوية اصلا في الخصية زي :

المجموعة A و B من حالات الحذف الجيني للكروموسوم Y:

والكروموسوم ده هو اللي بيكون عليه الجينات اللي مسؤولة عن إنتاج الحيوانات المنوية.

المجموعة A: لو حصل فيها حذف كامل ، ده معناه ان المجموعة كلها مش موجودة على الكروموسوم Y ومش هيبقي في اصلا خلايا منوية تقدر تنتج حيوان منوي ، ومش هنلاقي حيوانات منوية حتي لو عملنا تفتيش ميكروسكوبي.

المجموعة B: لو حصل فيها حذف ده معناه ان في خلايا منوية بس إنتاج الحيوان المنوي بيقف في المراحل الأولى ، وكدة للاسف مفيش امل للتفتيش الميكروسكوبي.

حالات MALE XX:

وفي بعض الحالات بنسميها MALE XX : يعني تشريحيا ده رجل طبيعي ، ولكن الكروموسومات بتاعته عبارة عن XX بمعنى ان مفيش جينات عنده مسؤولة عن إنتاج الحيوانات المنوية زي حالات الحذف الجيني.

إذا الحالات دي مفيش فيها أي فرصة لحدوث حمل طبيعي او حتي حمل بعملية التفتيش الميكروسكوبي ، ولكن دي كلها حالات نادرة جدا وغير شائعة.

ولو عايز تعرف اكثر عن حالات انعدام الحيوانات المنوية اللي التفتيش الميكروسكوبي مش هيجيب معاها نتيجة ومش هيكون حل ليها ، اسمع الفيديو ده مع الدكتور اسامة البكل….

الخلاصة

في النهاية ، احب اطمنك ان انعدام الحيوانات المنوية مش نهاية الطريق ، لسه في امل وفرص كثير جدا للعلاج ، لأن نسبة كبيرة جدا من حالات انعدام الحيوانات المنوية ياما بتتعالج لو في مشكلة قابلة للعلاج أو بنلجأ لعملية التفتيش الميكروسكوبي وبتكون بفرص نجاحه أعلى. ولو عايز تعرف طريقة استخراج الحيوانات المنوية من الخصية بالميكروسكوب اضغط هنا…

ولو قررت تبدا العلاج دلوقتي، تقدر تتصل بينا على رقم 01018874287 واحنا هنحددلك ميعاد مع الدكتور اسامة محمد البكل مدرس واستشاري طب وجراحة أمراض الذكورة وتأخر الانجاب والصحة الجنسية بطب القصر العيني.