التواء الخصية

و عشان نفهم ازاى الخصية بتضر بسبب الالتواء ده ، خلونا نعرف الاول ان الخصية بتكون موجوده فى كيس الصفن و بتكون متعلقة فى الحبل المنوى ، و الحبل المنوى ده بيكون فيه مجموعة من الشرايين اللى بتكون مسؤوله انها توصل الدم و الاكسجين للخصية عشان يغذيها ، و بيكون فيه كمان الاوردة و دى اللى بتكون مسؤولة عن انها تخرج بقايا الدم من الخصية بعد ما تكون استفادة منه للدوره الدموية مرة تانية ، و بيكون كمان فيه الانابيب المنوية اللى بتخرج الحيوانات المنوية من الخصية للحويصله المنوية ، فلما الخصية تلف حوالين نفسها هيبدء كمان الحبل المنوى اللى متعلقة فيه الخصية يحصل فيه التفاف و بسبب الالتفاف ده الشرايين و الاوره بتتقفل و بكده الدم مش بيوصل للخصية ، و بيبدء يحصل للخصية اختناق و تلف فى الانسجة ، و هيبدء لونها يتغير و يبقى مزرق بسبب نقص الدم و الاكسجين ، و هنا لازم نروح فوراّ للمستشفى عشان نلحق الخصية ، لاننا لو اتأخرنا مش هنقدر نعالج التلف اللى حصل للانسجة و بكده هيحصل ضمور و غرغرينة للخصية و هنضطر نستأصلها .

العمليه نفسها بتكون بسيطة جدا مش بتاخد اكتر من 45 دقيقة، كل اللى بنعمله فيها فتحة صغيره فى كيس الصفن، عشان نخرج منها الخصية، و بعدين نفك الالتواء اللى حصل و نحاول اننا ننعش الخصية مره تانية، و هنا لو لقينا ان لونها بدء يرجع تانى للطبيعى، وقتها هتبقى الخصية سليمة و هنبدء نرجعها تانى لكيس الصفن و نثبتها فيه بخيط جراحى عشان الالتواء ميحصلش مره تانية