حتى لو فى انعدام في الحيوانات المنوية ممكن يحصل إنجاب طبيعي
الحالات اللي بتعاني من انعدام في الحيوانات المنوية لسه في فرصة للعلاج وأن يحصل إنجاب طبيعى من غير ما تحتاج للحقن المجهرى ، و الحـالات دى هى
- لو انعدام الحيوانات المنوية حصل بسبب نقص في هرمون FSH- LH
- أو لو انعدام الحيوانات المنوية كان بسبب ارتفاع فى هرمون البرولاكتين
- أو لو كان انعدام الحيوانات المنوية سببه انسداد فى مسار خروج الحيوانات المنوية من الخصية
- واخيرا لو كان سبب انعدام الحيوانات المنوية مشكلة بالخصية زي دوالي الخصية
لو عملت تحليل سائل منوي كذا مرة وطلع في إنعدام في الحيوانات المنوية ، هل معناه إن مفيش أمل للانجاب أو مفيش أمل للإنجاب الطبيعي ؟
لا طبعاً ، في أمل أن يحصل حمل وممكن كمان يحصل حمل طبيعي مش بحقن مجهري.
ودلوقتي تعالوا بقى نعرف ايه هي الأسباب القابلة للعلاج في حالات انعدام الحيوانات المنوية :
هنبدأ من اول الغدة النخامية فوق وهننزل بالأسباب الموجودة والمتعلقة بالخصية ومسار خروج الحيوان المنوي.
- الأسباب المتعلقة بالغدة النخامية ( القابلة للعلاج )
1/ بعض الحالات بيبقي عندهم تأخر في البلوغ أو ضعف في إنتاج هرمون fsh , lh :
نتيجة أنه اخد علاج إشعاعي أو عمل عملية بالغدة النخامية ، في الحالة دي لما نعمل تحليل الهرمونات هنلاقي ان هرمون fsh , lh ودي الهرمونات اللي بتنتج من الغدة النخامية والمسؤولة عن وظيفة الخصية وتشغيل خط انتاج الحيوانات المنوية ، فلو نقصوا خط الانتاج بيتوقف وبيحصل توقف في إنتاج الحيوانات المنوية ، وهو بيبقي في خلايا منوية جوا الخصية ولكن مش بتوصل لمرحلة إنتاج الحيوانات المنوية.
في الحالة دي لو ادينا المريض علاج هرموني تعويضي من بره اللي هو fsh , lh أو ما يعادلهم من هرمونات تخليقية ، فبنقدر اننا نطلع إنتاج حيوانات منوية أو نحرك إنتاج الحيوانات المنوية مرة أخرى ، ونسبة كبيرة تصل إلي 90% من الحالات دي بتوصل أنها تطلع حيوانات منوية في القذف وممكن بعد كدة يحصل حمل طبيعي بعد تشخيص طبعاً المشكلة وأنه ياخد علاج مناسب ، ولكن العلاج بياخد فترة طويلة نسبياً.
2/ السبب الثاني ( القابل للعلاج ) أن يكون في ارتفاع لهرمون البرولاكتين :
وده هرمون بينتج من الغدة النخامية ولكن في حالة فرط نشاط الغدة بإنتاجه بكميات أكبر من الطبيعي بيسبب تثبيط أن هو بيقلل إنتاج هرمون fsh , lh أو بيوقف إنتاج الحيوانات المنوية في الخصية مباشرةً.
وأحد أهم أسباب زيادة هرمون البرولاكتين : أن بيبقى في ورم حميد بالغدة النخامية.
و 80% من الحالات دي بيحتاج انه ياخد علاج دوائي بيبقي عبارة عن أقراص بتتاخد بجرعات معينة لما هرمون البرولاكتين يبتدي ينزل لمستوياته الطبيعية وقتها بيبتدي هرمون fsh , lh ينتجوا بالكميات الطبيعية والخصية تشتغل بطريقة طبيعية ، والأغلبية العظمى من الحالات دي لو كان السبب الوحيد لانعدام الحيوانات المنوية تبدأ تطلع حيوانات منوية في القذف وممكن بعد كدة يحصل حمل طبيعي.
3/ مسار خروج الحيوانات المنوية :
ممكن يكون في انسداد خلقي أو مكتسب ، والانسداد ده لو موجود على مستوى الحبل المنوي مثلاً في ناحية من الناحيتين ، قابل أننا نعيد توصيله ونعمل إعادة توصيل للحبل المنوي ، ممكن يخرج حيوانات منوية لكن اللي في فرصة كبيرة أن يبقى الانسداد ده مكتسب بسبب خطأ في عملية سابقة ادي الي قطع الحبل المنوي علي الخصيتين مع الحفاظ على الدورة الدموية بالخصيتين ، يعني الخصيتين شغالين ولكن الحبل المنوي اللي اتقطع نتيجة عملية فتق اربي أو أي عملية بالمنطقة الاربية ، وقتها لو القطع قدرنا نحدد مكانه وإعادة توصيل الأجزاء السليمة من الحبل المنوي ، في نسبة كبيرة من المرضى بيقدروا أنهم يطلعوا حيوانات منوية مرة أخري ويحصل حمل طبيعي.
4/ نيجي بقي لآخر مكان يمكن إصلاحه لو المشكلة في الخصية زي وجود دوالي كبيرة على الخصيتين :
في اعتقاد شائع أن دوالي الخصية لا تسبب انعدام الحيوانات المنوية ، ولكن آخر الأبحاث أثبتت أن المريض اللي عنده انعدام في الحيوانات المنوية وعنده دوالي كبيرة و معندناش مشاكل جينية أو مشاكل أخرى بالغدة النخامية أو وظيفية بالخصية ، وقتها نسبة تصل إلى 40% من اللي بيعملوا عملية دوالي الخصية بشرط يكون حجم الخصيتين كويس وهرمونات الغدة النخامية كويسة ، وفي دوالي على الخصية كبيرة ، النسبة دي هيطلعوا حيوانات منوية في القذف وممكن بعد كدة يحصل حمل طبيعي.
دي كانت الأسباب القابلة للعلاج وممكن يحصل بعدها حمل طبيعي.
طيب لو عندي سبب آخر لانعدام الحيوانات المنوية زي ارتفاع هرمون fsh وضمور الخصيتين ، حالات متلازمة كلاينفلتر ، وأسباب جينية كتير جداً بتسبب ضمور الخصية وارتفاع هرمون fsh ، هل في الحالة دي انا معنديش فرصة لحدوث الحمل ؟
لا في فرصة طبعاً لحدوث الحمل ولكن في الحالة دي بنتوجه للتفتيش الميكروسكوبي ، لأن لازم نفتح الخصية ونعمل تفتيش ميكروسكوبي وندور علي البؤر المنوية داخل الخصية ، ونسبة أن احنا نلاقي حيوانات منوية مع التفتيش الميكروسكوبي بأحدث الميكروسكوبات في مراكز محترمة ، هنقدر ان احنا نوصل لنسب نجاح تصل إلي 50% ، بالتالي احنا عندنا فرصة برضو في الحالات التانية دي أن 50% نلاقي حيوانات منوية ونقدر نعمل بيها حقن مجهري ، بالتالي في فرصة برضو لحدوث الحمل ولكن في الحالة دي عن طريق التفتيش الميكروسكوبي والحقن المجهري.
طيب إجمالاً أي مريض عنده انعدام في الحيوانات المنوية في أمل ، الامل منتهاش حتي لو عمل عملية تفتيش ميكروسكوبي قبل كده ومكنتش ناجحة برضو ، فعملية التفتيش العادية تختلف تماماً عن التفتيش الميكروسكوبي في نسب نجاحها ، وممكن يكون كان عنده سبب غير مشخص أصلا وكان لازم ياخد فترة علاج الأول قبل ما نوصل للتفتيش الميكروسكوبي ، فحتي لو في عملية فاشلة سابقاً في التفتيش عن الحيوانات المنوية ، ده برضوا مش معناه انعدام الأمل ، لان بإذن الله نسبة كبيرة دايما بيكون في أمل أن يحصل حمل سواء حمل طبيعي او بحقن مجهري أو بتفتيش ميكروسكوبي ، فأوعى تفقد الأمل أبدا.
ولو عندك اي استفسار عن أسباب تأخر الإنجاب وانعدام الحيوانات المنوية ، ممكن تبعتلنا على رسائل الصفحه او من خلال الواتساب 01018874287.
دكتور اسامة محمد البكل مدرس واستشاري طب وجراحة أمراض الذكورة وتأخر الإنجاب والصحة الجنسية بطب القصر العيني.
احجز الآن :