ازاي نتاكد ان دوالي الخصية ماثرة علي الشخص ومحتاجة العملية ؟

ازاي نتاكد ان دوالي الخصية ماثرة علي الشخص ومحتاجة العملية ؟

دوالي الخصية تعتبر من أكثر المشاكل الصحية اللي بتسبب ارق لحوالي 15% من الرجال ، و تكون السبب الرئيسي في حالات العقم وتأخر الإنجاب عند حوالي 40% من الرجال ، لكن السؤال هنا بقى ، هل كل شخص عنده دوالي في الخصية ، لازم تكون مأثرة عليه وتكون محتاجة عملية ؟ 

هو ده اللي هنعرفه في المقال ده ، 

ازاى نتاكد ان دوالي الخصية ماثرة علي الشخص ومحتاجة عملية ، او مش ماثرة ومش محتاجة عملية. 

بس في البداية لازم تكون عارف ان دوالي الخصية هي عبارة عن توسع في الأوردة اللي بتنقل الدم من الخصية الى القلب ، والأوردة دي بيكون جواها صمامات ، وظيفتها انها تمنع رجوع الدم تاني للخصية بعد تدفقه في اتجاه القلب ، ولو في اي خلل في الصمامات دي ، ساعتها الدم هيبدأ يتراكم جوا الاوردة ومش هتبقي قادرة انها تستوعب كمية الدم اللي فيها وتبدأ الاوردة تتضخم وتتمدد و تسبب الدوالي.

ودلوقتي تعالوا نعرف مع بعض ايه هي الإشاعات والفحوصات اللي لازم المريض يعملها علشان نتأكد ان الدوالي اللي عنده ماثرة عليه فلازم يعمل عمليه ، او مش ماثرة عليه فمش لازم يعمل عملية.

1/ اشعة الدوبلر الملون : 

• لازم تكون في مكان متخصص ، واللي يعملها يكون متخصص في الأشعة ، لأنه بيقيم حجم الخصيتين بالظبط ، لان من اهم اسباب اننا نعمل عملية الدوالي انها تكون عاملة فرق كبير بين حجم الخصيتين. 
• بتوضح في اسباب تانية للوجع ولا لا ، لان ممكن يكون الشخص ده عنده التهابات في الخصية  أو مشاكل في البربخ. 
• بتحدد هل في دوالي ولا لا ، وهل في ارتجاع للدم في الأوردة ولا لا ، وحجم الاوردة قد ايه ، لان حجم الاوردة الطبيعي مش بيزيد عن 2 ملم ، فلما تزيد حجم الأوردة عن 3 ملم ده بيؤكد وجود دوالي في الخصية. 

2/ تحليل السائل المنوي : 

لو الشخص ده عنده تاخر في الانجاب بنطلب منه انه يعمل تحليل سائل منوي ويكون أكثر من تحليل ، ولازم يكونوا على فترات متباعدة علشان نتاكد من نتيجة التحليل كويس ، لان تحليل السائل المنوي بيوضح جودة وصحة الحيوانات المنوية من حيث العدد والحركة ونسبة التشوهات ، ونشوف هل دوالي الخصية ماثرة علي تحليل السائل المنوي ولا لا ومحتاجة عملية ولا لا. 

ولو عايز تعرف ايه هي شروط تحليل السائل المنوي ، اسمع الفيديو ده مع الدكتور اسامة البكل…

3/ لو الشخص بيشتكي من وجع في الخصيتين : 

لازم الاول نعمل تحليل مزرعة بول ومزرعة سائل منوي ، علشان نشوف هل في سبب تاني لألم غير دوالي الخصية ، زي وجود التهابات ولا لا.

4/ لو شخص عنده تاخر في الانجاب وتحليل السائل المنوي عنده في مشكلة : 

زي وجود نقص في عدد الحيوانات المنوية ، لازم في الاول نعمل تحليل هرمونات الغدة النخامية FSH و LH وهرمون البرولاكتين ، علشان نشوف هل في سبب تاني للمشكلة ولا دوالي الخصية هي السبب الوحيد في مشكلة السائل المنوي ، لأن دوالي الخصية بتسبب ضعف حركة الحيوان المنوي ونقص في العدد وبتزود من نسبة تشوهات الحيوانات المنوية ، في الحالة دي لازم نعمل عملية دوالي الخصية. 

5/ لو مفيش مشكلة في تحليل السائل المنوي وفي تاخر في الانجاب : 

• في الحالة دي هنحتاج نعمل تحليل تفتت المادة الوراثية ، ولازم تكون عارف ان المادة الوراثية بتكون موجودة في راس الحيوان المنوي وهي اللي بتحمل المعلومات الوراثية الخاصة بالاب علشان تتحد مع المعلومات الوراثية الخاصة بالأم لتكوين الجنين ، ولو في اي خلل في المادة الوراثية ده بيقلل من قدرة الحيوان المنوي على إخصاب البويضة ، وهيؤدي إلي تأخر الإنجاب. 
• وتحليل تكسير المادة الوراثية هو اللي بيكشف عن أي خلل في المادة الوراثية واللي مش بيكشف عنها تحليل السائل المنوي العادي ، ودوالي الخصية من أهم أسباب تكسير المادة الوراثية للحيوان المنوي.
• ويعتبر هو ده السبب الوحيد والاهم اللي ممكن نعمل بسببه عملية دوالي الخصية ، لو لقينا نسبة تفتت المادة الوراثية مرتفعة ، وفي دوالي في الخصية واضحة في الاشعة وفي الفحص الظاهري ، بالتالي لازم نعمل عملية دوالي الخصية عشان نحسن من تفتت المادة الوراثية ، ونزود فرص حدوث حمل طبيعي ونقلل من فرص حدوث الإجهاض المبكر أو نقلل من فشل عملية الحقن المجهري. 

ولو عايز تعرف هل نتيجة تحليل السائل المنوي هي اللي هتحدد إذا كنا هنعمل عملية دوالي الخصية ولا لا ، اسمع الفيديو ده مع الدكتور اسامة البكل…

في النهاية ، لازم تكون عارف ان قرار عملية دوالي الخصية مش قرار سهل اننا ناخده ، ده قرار بيحتاج إلى تحاليل وإشاعات كثيرة ، مش مجرد بس فحص إكلينيكي أو سماع شكوى المريض ، لازم الاول نعمل تحاليل واشاعات علشان نقيم هل دوالي الخصية هي فعلا سبب مشكلة المريض سواء كانت الم او تاخر في الانجاب ، ولا في سبب تاني لازم نعالجه ، وساعتها مش هتكون الدوالي هي اللي مؤثرة ومش هتحتاج عملية. 

ولو فكرت واخدت خطوة الكشف تقدر تتواصل مع الفريق الطبي علي الرقم ده 01018874287 وهما هيحددولك اقرب ميعاد مع الدكتور اسامة محمد البكل مدرس واستشاري طب وجراحة أمراض الذكورة وتاخر الانجاب والصحة الجنسية بطب القصر العيني.