هل ممكن يحصل حمل طبيعى وفى ضعف فى حركة الحيوانات المنوية ؟

هل ممكن يحصل حمل طبيعى وفى ضعف فى حركة الحيوانات المنوية ؟

عدد كبير من الرجالة بيعانوا من ضعف في حركة الحيوانات المنوية ، ويفتكروا إن الحل الوحيد هو الحقن المجهري ، ولكن الحقيقة إن بعض الحالات ممكن يحصل فيها حمل طبيعي لو بدأنا التشخيص والعلاج الصح.

مهما كان عندك ضعف في حركة الحيوانات المنوية ، لسه في أمل إن شاء الله أن يحصل حمل طبيعي.

طب ايه هي حركة الحيوانات المنوية ؟ وايه مشاكلها ؟ وايه اسبابها ؟ وإيه هي طرق علاجها ؟ 

حركة الحيوانات المنوية في تحليل السائل المنوي بيتم تقييم نسبة الحيوانات المنوية اللي بتتحرك ، والمفروض أن نسبة الحيوانات المنوية اللي بتتحرك تتجاوز الـ 42% ويكون منهم أكثر من 32% بيتحركوا حركة متقدمة في خط مستقيم لقدام و 10% يكونوا بيتحركوا في مكانهم أو ببطء.

الاول عايزين نفرق بين ضعف حركة الحيوانات المنوية أو ضعف الحركة المتقدمة والحركة الإجمالية صفر.

• ضعف الحركة حتى لو كانت قليلة جداً تقارب من الصفر دي قابلة للعلاج وممكن يحصل معاها حمل طبيعي.
• لكن الحركة الإجمالية صفر بمعنى آخر أن كل تحاليل السائل المنوي اللي المريض عملها طلعت الحركة كلها صفر متقدمة أو غير متقدمة وحتى في اختبار اسمه pentox test بنحط مادة بتزود حركة الحيوانات المنوية ، ولازم تكون نتيجة الاختبار ده برضو صفر ، لأن الحيوانات مبتتحركش حتى بعد ما بنضيف مادة ال pentox ، بالتالي المريض ده هو عنده عيب خلقي بيؤدي إلى أن كل الحيوانات اللي بتخرج مبتتحركش اصلا ومالوش اي فرصة غير أنه يعمل حقن مجهري ، لان مفيش أي فرصة لحدوث الحمل الطبيعي ، ولا بعلاج ولا بعملية دوالي ولا بعلاج هرموني ولا بمنشطات ولا بمضادات أكسدة ، بالتالي لو الحركة الإجمالية صفر فللأسف حلك الوحيد هو الحقن المجهري علشان متقعدش تضيع وقتك وفلوسك على علاجات مش هتجيب نتيجة.

لكن لو الحركة ضعيفة نبتدي ندور على أسباب ضعف الحركة : 

1/ لو في دوالي في الخصية كبيرة ، ساعتها المريض هيحتاج يعمل عملية ربط الدوالي.

2/ لو في خلل هرموني ، هنعالج المشكلة اللي موجوده.

3/ لو في التهابات في مجرى البول ومجرى السائل المنوي.

4/ أو لو مفيش سبب واضح ممكن ندي مضادات أكسدة والمكملات الغذائية اللي بتحسن من حركة الحيوانات المنوية ، وممكن يحصل بعد فترة علاج حمل طبيعي بإذن الله.

بالتالي محدش يجي يسألني انا عندي ضعف في حركة الحيوانات المنوية ، لان دي جملة واسعة جداً و مقدرش احدد بيها حالة المريض ويفضل اني اشوف المريض واشوف تحاليله واشوف كذا تحليل للمريض مش بس تحليل واحد ، لأن لو التحليل مش مظبوط أو في مكان مش متخصص ممكن يودينا لتشخيص غلط للمريض ، زي أن يبقي مثلا التحليل مطلع أن في ضعف شديد في الحركة ، لكن المريض ده عنده الحركة صفر ، فالمريض ده بقاله شهور أو سنين بيتعالج من ضعف حركة الحيوانات المنوية ، ولكن كان حله الوحيد أنه كان يعمل حقن مجهري ، فلذلك دقة التحليل بتفرق جداً جداً في نقطة ضعف حركة الحيوانات المنوية.

ولو لسه عندك اي استفسار عن ضعف حركة الحيوانات المنوية ، ممكن تبعتلنا على رسائل الصفحه او من خلال الواتساب 01018874287.

دكتور اسامة محمد البكل مدرس واستشاري طب وجراحة أمراض الذكورة وتأخر الإنجاب والصحة الجنسية بطب القصر العيني.

احجز الآن :