هل دوالي الخصية بتاثر على حركة الحيوان المنوي ؟
ضعف حركة الحيوانات المنوية من أهم المشاكل اللي بتسبب تأخير للانجاب ، لأن الحيوان المنوي لو مش سليم أو بطيء فى حركته مش هيقدر يوصل للبويضة ويخصبها ، وبالتالي الحمل مش هيحصل بشكل طبيعي ، و واحدة من أهم أسباب ضعف حركة الحيوانات المنوية هي وجود دوالي على الخصية.
وقبل ما نتكلم عن علاقة دوالي الخصية بضعف حركة الحيوان المنوي ، خلونا الاول نتكلم عن أهمية حركة الحيوان المنوي وامتي نقول على الحيوان المنوي أنه ضعيف الحركة :
ببساطة كدة حركة الحيوانات المنوية هي دليل على أن الحيوان المنوي ده سليم وعنده حيوية وقادر انه يتحرك من ساعة ما بيطلع من الخصية ويمشي رحلته الطويلة لحد ما بيوصل لعنق الرحم ثم إلى قناة فالوب ويوصل للبويضة ويخصبها علشان يحصل حمل.
عشان نقول إن الحيوان المنوي سريع الحركة ، لازم يتحرك حركة تقدمية في خط مستقيم أو على الأقل في دوائر كبيرة بسرعة 25 ميكرومتر في الثانية.
طيب إمتى نقول إن الحيوان المنوي ضعيف الحركة؟
لو الحيوان المنوي مش قادر يتحرك حركة مستقيمة أو بيتحرك ببطء أقل من 25 ميكرومتر في الثانية، بيبقى ضعيف الحركة ، و ده بيأثر بشكل كبير على قدرته للوصول للبويضة وتخصيبها ، وبالتالي بيأخر أو يمنع حدوث الحمل.
وبكدة نكون عرفنا يعني ايه ضعف حركة الحيوان المنوي
ولو لسه عايزين تعرفوا معلومات اكثر عن حركة الحيوان المنوي المطلوبة علشان يحصل انجاب ن اسمع الفيديو ده مع الدكتور اسامة البكل…..
تعالوا بقى نعرف ازاي دوالي الخصية ممكن تأثر على حركة وسرعة الحيوان المنوي :
في البداية خليني اقولك ان دوالي الخصية هي عبارة عن تضخم في اوردة الخصية الموجودة جوا كيس الصفن واللي بتنقل الدم من أنسجة الخصية الي القلب ، والأوردة دي جواها صمامات هي اللي بتنظم وصول الدم من الخصية الى القلب وبتمنع رجوعه تاني للخصية ، فالصمامات دي لو فيها خلل او عيب كدة الدم هيرجع تاني للخصية وهيبدا يتراكم داخل الاوردة وهتفضل تتمدد وتوسع وهتسبب الدوالي.
طبعا هتقولي طب دوالي الخصية ايه علاقتها بضعف حركة الحيوان المنوي ؟
هقولك لان الخصية هي المصنع اللي بيصنع الحيوانات المنوية وعلشان الخصية تقدر تنتج حيوان منوي سليم مفيهوش اي عيب او خلل يقدر يخصب البويضة ويكون جنين ، لازم درجة حرارة الخصية تكون أقل من درجة حرارة الجسم الطبيعية بحوالي درجتين ، و فوجود دوالي الخصية وخاصة بقي لو كانت الدوالي دي من الدرجة الثانية أو الثالثة ، الدم اللي جوا الأوردة لما بيتراكم بيسخن وبيرفع من درجة حرارة الخصية وبيزود من تراكم المواد المؤكسدة ( ROS ) وكل ده بياثر على وظيفة الخصية في انتاج وتصنيع الحيوانات المنوية وعلى الهرمونات المسؤولة عن إنتاج الحيوانات المنوية وكمان بتضر بالحيوانات المنوية السليمة و المكتملة و الصالحة للإخصاب.
ده غير ان دوالي الخصية بتاثر على إنتاج الخصية لهرمون التستوستيرون ( هرمون الذكورة ) وبالتالي نسبته بتقل في الجسم وده بياثر على إنتاج الحيوانات المنوية وكمان بيسبب ضعف في حركة الحيوان المنوي وقلة في العدد وزيادة في نسبة تشوهات الحيوانات المنوية ، وكل دي أسباب كافية لتاخير الحمل.
وبكدة تكون عرفت مدى تأثير دوالي الخصية على حركة الحيوان المنوي ، والحل هنا لمشكلة ضعف حركة الحيوان المنوي هو علاج دوالي الخصية .
و افضل علاج لدوالي الخصية هو الجراحة الميكروسكوبية ، و كل اللي بنحتاج نعمله فى الجراحة ، جرح صغير في أسفل البطن طوله حوالي 2 او 3 سم، و باستخدام الميكروسكوب الجراحي بنربط الأوردة المتضررة اللي مسببة الدوالي
طيب ليه بنقول ان الجراحة الميكروسكوبية افضل طريقة نعمل بيها عملية دوالي الخصية ؟
- لان باستخدام الميكروسكوب بنقدر نكبر مكان العملية ونشوف كل الأوردة ونميز بين الأوردة والشرايين لان مهم اننا نعمل العملية من غير ما نضر الشرايين ، لأنها هى المسؤولة عن وصول الدم للخصية و تغذيتها
- ده غير اننا بنقدر نشوف كل الاوردة المنتفخة اللي مسببة الدوالي ونربطها كلها
- وبنقدر كمان نوصل للدوالى الثانوية و نربطها و ده بيقلل من فرص رجوع الدوالي مره تانيه
و بعد العمليه غالبًا بنحتاج لعلاج هرموني لمدة 3 شهور لتنشيط الخصية وتحسين إنتاج الحيوانات المنوية ، نسبة التحسن في تحليل السائل المنوي بعد العملية بتكون حوالي 70% ، وده بينعكس إيجابيًا على حركة وجودة الحيوانات المنوية
في النهاية بعد ما عرفنا ووضح قدامنا ان دوالي الخصية هي السبب في أن الحيوان المنوي يبقى ضعيف الحركة ومش قادر يوصل للبويضة علشان يخصبها ، كل ده بياخر فرصة حدوث حمل طبيعي ، فمتترددش لحظة انك تعالج مشكلة زي دي وتحقق حلمك انك تكون اب ويكون عندك طفل.
ولو عندك اي استفسار او تساؤل تقدر تبعتلنا علي رقم 01018874287 واحنا هنجاوب على كل اسئلتك.