ما هي مواصفات السائل المنوي الطبيعي لحدوث الحمل ؟
حدوث الحمل يتأثر بمدى صحة وجودة السائل المنوي ، ولان السائل المنوي هو اللي بيحمل الحيوانات المنوية ويغذيها من اول ما بتطلع من الخصية ولحد ما بتخرج من القضيب وقت القذف وتوصل إلي قناة فالوب علشان تخصب البويضة ، وبالتالي أي مشكلة في عدد أو حركة الحيوانات المنوية أو في مكونات السائل المنوي نفسه ممكن تؤدي إلى تأخر الحمل.
ودلوقتي تعالوا نعرف مع بعض ايه هو السائل المنوي ،
وهل في فرق بين السائل المنوي والحيوانات المنوية :
في البداية لازم تكون عارف ان في ناس كثير معتقدة ان مفيش فرق بين السائل المنوي والحيوان المنوي ، ولكن خليني اقولك ان السائل المنوي مش هو الحيوان المنوي ، بمعنى أن :
- السائل المنوي : هو سائل ابيض شفاف تفرزه غدة البروستاتا والحويصلات المنوية ، ويحتوي على مواد مغذية وانزيمات بتعمل على تغذية الحيوانات المنوية وحمايتها وتنشيطها من اول ما بتطلع من القضيب وقت القذف ولحد ما بتوصل الى قناة فالوب لتخصيب البويضة.
- الحيوانات المنوية : دي بتنتج في الخصيتين ووظيفتها انها تخصب البويضة علشان تكون جنين.
ودلوقتي تعالوا نعرف ايه هي مواصفات السائل المنوي الطبيعي علشان يحصل حمل ،
وإيه هي المشاكل اللي بتأثر علي جودة السائل المنوي وبتسبب تأخر في الإنجاب :
1/ لون السائل المنوي : بمعني ان لون السائل المنوي الطبيعي هو ابيض شفاف يميل إلي الرمادي ، وبالتالي أي تغير في لون السائل المنوي الى اللون الاصفر او الاحمر ، ممكن يكون ناتج عن وجود صديد أو دم ، وقد يدل على وجود التهابات أو مشاكل في البروستاتا ومنع حدوث حمل طبيعي.
2/ كمية السائل المنوي : بمعنى أن كمية السائل المنوي الطبيعي بتتراوح بين 1.5-5 مللي ، وبالتالي لو حصل أي انخفاض في كمية السائل المنوي اللي بتخرج وقت القذف عن 1.5 مللي ، فده بيدل على وجود مشكلة مرضية زي انسداد في القنوات المنوية او البربخ أو الوعاء الناقل اللي بتمنع خروج الحيوانات المنوية من الخصية واختلاطها بالسائل المنوي و بتمنع خروج السائل المنوي ، وفي الحالة دي هيؤدي إلى انخفاض كمية السائل المنوي عن المعدل الطبيعي.
3/ لزوجة السائل المنوي : بمعنى أن السائل المنوي الطبيعي بيخرج وقت العلاقة الزوجية وبيكون لونه ابيض شفاف ومتماسك ، وعند خروجه بحوالي 15 إلى 30 دقيقة يبدأ تماسك السائل المنوي يقل ويبقي سايل عشان يسهل وصول الحيوانات المنوية إلى رحم الزوجة ، بالتالي لو لقينا ان السائل المنوي فضل متماسك لفترة أطول من الطبيعي ، ده معناه ان نسبة لزوجة السائل المنوي زيادة عن المعدل الطبيعي ، وده هيضعف من حركة الحيوانات المنوية ووصولها إلى البويضة وتخصيبها وحدوث الحمل.
4/ حموضة السائل المنوي : بمعنى أن نسبة حموضة السائل المنوي الطبيعية بتتراوح ما بين 7.2 الي 8 ، ولو زادت أو قلت نسبة حموضة السائل المنوي عن المعدل الطبيعي ، ده هيكون دليل على وجود التهابات أو عدوى في الجهاز التناسلي ، وهيؤدي إلى ضعف حركة الحيوانات المنوية وتاخر الحمل.
وفي اسباب تانية كتير ممكن تكون السبب في وجود مشاكل بالسائل المنوي وتاخر الانجاب ، زي :
1/ وجود صديد في السائل المنوي : واللي بيكون سببه التهابات في المسالك البولية أو البروستاتا نتيجة وجود عدوى جرثومية اتسببت في وجود صديد في السائل المنوي ، وبالتالي لو نسبة الصديد كانت عالية ، ده طبعا هياثر على حركة الحيوانات المنوية وهيضعف قدرتها على الوصول إلى البويضة وتخصيبها وحدوث الحمل.
2/ وجود اجسام مضادة في السائل المنوي : بمعنى ان الجهاز المناعي وظيفته انه يهاجم أي أجسام غريبة في جسمنا ، والحيوانات المنوية بالنسبة للجهاز المناعي هي اجسام غريبة ، علشان كدة ربنا سبحانه وتعالي خلق حاجز علشان يمنع الجهاز المناعي انه يتعرف على الحيوانات المنوية ويهاجمها ، لكن لو حصل اي خلل في الحاجز ده ، هيبدأ الجهاز المناعي يكتشف وجود الحيوانات المنوية ويهاجمها ويكون ضدها أجسام مضادة ممكن تتسبب في موتها ، أو أن الحيوانات المنوية كلها تلزق في بعض وقت الحركة ، وده هيسبب ضعف في حركة الحيوانات المنوية و تأخر في الإنجاب.
ولو عايز تعرف معلومات اكثر عن مواصفات السائل المنوي وامتي السائل المنوي يكون طبيعي ، اسمع الفيديو ده مع الدكتور اسامة البكل…
ودلوقتي خليني اقولك ان في اسباب كتير ممكن تكون السبب في أن السائل المنوي ميخرجش اصلا وقت العلاقة الزوجية :
زي اننا نكون بنمارس العلاقة الزوجية بس مش بنوصل للنشوة الجنسية وبالتالي مش بيكون في قذف ، والحالة دي ممكن نقسمها ل 3 اسباب ، زي :
- أسباب عضوية :
1/ زى ان يكون عندنا ضعف انتصاب وده بيخلينا مش بنقدر نكمل العلاقة الزوجية لحد ما نوصل للنشوه الجنسية ويحصل قذف.
2/ أو أن يكون عندنا نقص في هرمون الذكورة.
3/ أو أن يكون في زيادة في نسبة هرمون البرولاكتين.
- أسباب نفسية :
1/ زى ان يكون عندنا مشاكل وخلافات مع الزوجة ، وده بيخلينا مش مستمتعين بالعلاقة الزوجية ولا بنوصل للنشوة الجنسية.
2/ او اننا نكون بنمارس العادة السرية باستمرار ، وده بيخلينا نفرغ كل الرغبة والشهوة اللي عندنا فيها ، ونيجي وقت العلاقة الزوجية مش بيكون عندنا أي رغبة جنسية وده بيخلينا منوصلش للنشوة الجنسية.
3/ او اننا نكون بنتفرج على افلام اباحية ، لان ده بيرسم في دماغنا صورة معينة عن العلاقة الزوجية وعن شريك حياتنا ، ولما مش بنلاقيها زي ما احنا متخيلين ، ده بيخلينا منحسش بالإثارة الجنسية و منوصلش للنشوة.
- أسباب في العلاقة الزوجية نفسها :
بمعنى ان الزوجة لو مش متفاعلة مع الزوج وقت العلاقة الزوجية ، ده بيخلى الزوج مش مستمتع بالعلاقة الزوجية ومش هيوصل للنشوة الجنسية ومش هيحصل قذف.
ولو لسه عندك اي تساؤل او استفسار ، تقدر تتواصل مع الفريق الطبي علي الرقم ده 01018874287 ، وهما هيحددولك ميعاد مع الدكتور اسامة محمد البكل مدرس واستشاري طب وجراحة أمراض الذكورة وتأخر الإنجاب والصحة الجنسية بطب القصر العيني.