ايه هي المضاعفات اللي هتحصل لو معالجناش دوالي الخصية ؟

ايه هي المضاعفات اللي هتحصل لو معالجناش دوالي الخصية ؟

دوالي الخصية من الأمراض الشائعة اللي بتصيب حوالي 15% من الرجال ، واللي بتسبب الم شديد جدا في الخصية ، ده غير انها بتكون السبب في اصابة حوالي 40% من الرجال بالعقم وتاخر الانجاب ، واهمال دوالي الخصية مش حاجة سهلة ، لانك كدة هتكون بتعرض الخصية للضمور. 

بس في البداية خلونا نتكلم عن ايه هي دوالي الخصية : 

دوالي الخصية هي عبارة عن تضخم في الاوردة المحيطة بالخصية الموجودة جوا كيس الصفن ، لأن الاوردة بيكون جواها صمامات مسؤولة عن تنظيم تدفق الدم من الخصيتين الى القلب ، ومنع عودته تاني للخصية ، فلما الصمامات دي بتضعف ، كدة الدم بيرجع تاني للخصية ويفضل يتراكم جوا الاوردة ، وهو ده اللي بيسبب الدوالي. 

ودلوقتي تعالوا نعرف مع بعض ازاي اعرف ان انا عندي دوالي في الخصية: 

1/ لو حسيت بثقل وتضخم في كيس الصفن ، وده بيكون نتيجة تجمع الدم بكميات كبيرة في الأوردة.

2/ لو حسيت بالم في الخصية ، خاصة عند الوقوف فترة طويلة او مع بذل أي مجهود ، والالم ده بيختفي عند الاستلقاء على الظهر.

3/ لو حسيت بتورم في كيس الصفن.

4/ لو ملاحظ صغر وانكماش في حجم الخصيتين أو فرق بينهم.

5/ لو بتعانى من تاخر في الانجاب ، والزوجة معندهاش اي موانع ، فبنسبة كبيرة دوالي الخصية هي السبب.

ودلوقتي تعالوا نجاوب على سؤالنا ، ايه اللي هيحصل لو معالجناش دوالي الخصية ؟ 

في البداية لازم تكون عارف ان دوالي الخصية هيكون ليها مضاعفات كثيرة جدا لو متعالجتش ، زي : 

1/ دوالي الخصية بتكون خطيرة جدا على المراهقين وبتسبب لهم بطء في نمو الخصية ، ومع الكبار بتسبب صغر وانكماش في حجم الخصية ، ومع الوقت ممكن يوصل لضمور الخصية. 

2/ تاخر الانجاب : وهنا لازم تكون عارف ان الخصية هي المصنع اللي بينتج الحيوانات المنوية ، وعلشان الخصية تقدر تنتج حيوان منوي سليم يقدر يخصب البويضة ويكون جنين ، لازم تكون درجة حرارتها أقل من درجة حرارة الجسم الطبيعية بحوالي درجتين ، عشان الدم اللي يوصلها يكون دم بارد وتقدر تنتج حيوان منوي سليم ، لكن دوالي الخصية وخصوصا لو كانت من الدرجة الثانية أو الثالثة ، هترفع من درجة حرارة الخصية ، وهتزيد من تراكم المواد المؤكسدة ( ROS ) اللي بتأثر على الخصية وعلى انتاجها للحيوانات المنوية ، وكمان بتضر بالحيوانات المنوية السليمة والمكتملة ، ده غير انها هتسبب تكسير في المادة الوراثية الموجودة في رأس الحيوان المنوي وهتؤدي إلى تشوهه ، وهتاثر على صحة وجودة الحيوانات المنوية من حيث العدد والحركة ونسبة التشوهات. 

3/ دوالي الخصية بتاثر على هرمون التستوستيرون ، وده طبعا بيكون ليه تاثير كبير جدا زي : 

• انخفاض في الرغبة الجنسية.
• قلق واضطراب في النوم.
• ضعف الانتصاب.
• نقص في الكتلة العضلية في الجسم. 
• زيادة إفراز العرق بشكل مفاجيء.

لازم تكون عارف ان علاج دوالي الخصية مش دوائي ، علاج دوالي الخصية جراحيا بالجراحة الميكروسكوبية ، افضل واحسن طريقة تعالج بيها دوالي الخصية ، لكذا سبب : 

1/ لأنها بتساعدنا فى تكبير مكان العملية فبنقدر نشوفه بشكل واضح جداً ، لان المكان اللى احنا بنعمل فيه العملية هو مكان دقيق جدا. 

2/ بنقدر كمان بسبب التكبير ده اننا نحافظ على الشريان الخصوي اللى بيغذى الخصية بالدم ، وبكده مش هنضر وظيفة الخصية. 

3/ كمان بنقدر نوصل للأوردة الدقيقة والثانوية ونربطها عشان ميحصلش ارتجاع للدوالي مره تانيه وده اللي مش بنقدر نعمله في الجراحة التقليدية. 

4/ بنقدر نشوف الشعيرات الليمفاوية ، و نتجنب اننا نربطها بالغلط مع الأوردة لان ده ممكن يسبب قيلة مائية على الخصية. 

5/ ده غير كمان ان العملية مش بتاخد اكتر من ساعة واحدة بس وبنقدر نروح بعد العملية ، وممكن ننزل الشغل بعد 3-5 أيام ، وبنقدر نمارس العلاقة الزوجية بعد العملية بأسبوع أو أسبوعين.

ولو عايز تعرف ازاي تهتم بالجرح واي الادوية اللي هتاخدها بعد عملية دوالي الخصية بالميكروسكوب ، اسمع الفيديو ده مع الدكتور اسامة البكل…

في النهاية ، لازم تكون عارف ان دوالي الخصية مش مرض خطير زي ما انت معتقد ، ومتقلقش مش هتضيع حلمك في انك تكون اب ، ويكون عندك اطفال ، بس المهم انك لو حسيت باي اعراض من اللي قلناها فوق ، انك متهملهاش وتعالجها بدري ، قبل ما المشكلة تكبر و تسبب لك مضاعفات كثير جدا توصل لضمور الخصية ، وساعتها هتكون ضيعت حلم الانجاب عندك للابد.

ولو لسه عاوز تعرف اكثر عن علاج دوالي الخصية ، ممكن تتواصل مع فريقنا الطبي علي الرقم ده 01018874287 وهما هيجاوبوا علي كل استفساراتك أو تطلب منهم تحديد ميعاد مع الدكتور اسامة محمد البكل مدرس واستشاري طب وجراحة أمراض الذكورة وتاخر الانجاب والصحة الجنسية بطب القصر العيني.