ما هو الفرق بين ضعف الانتصاب وسرعة القذف ؟
الضعف الجنسي عند الرجال يعتبر من المشكلات المزعجة التي يمكن أن تواجه الرجل في مرحلة معينة من حياته ، وممكن يكون الضعف ده نتيجة لأسباب عضوية أو نفسية ، ولكن الاهم اننا نقدر نفرق هل المشكلة اللي عندنا دي ضعف انتصاب ولا سرعه قذف ، لان على الرغم من ان المشكلتين بيعيقوا ممارسة العلاقة الزوجية ، الا ان لازم نتشخص صح علشان نتعالج صح ، لان مش كل اللي بيشتكي من سرعة القذف بيبقى عنده فعلا سرعة فى القذف وممكن يبقي عنده ضعف انتصاب.
ومن خلال المقال ده هنحسم الجدل في الموضوع ده وهنعرف نفرق بين ضعف الانتصاب وسرعة القذف…
- ضعف الانتصاب :
ضعف الانتصاب هو عدم قدرة الرجل على بلوغ الانتصاب أو الحفاظ عليه ، وده بيحصل نتيجة وجود خلل في الأوعية الدموية اللي بتوصل الدم إلى القضيب ، والخلل ده إما بيكون بسبب ضعف في ضخ الدم للقضيب أو إن مش بيتم الاحتفاظ بالدم داخل القضيب وده بنسميه التسرب الوريدي ، وبكده مش بيحصل انتصاب.
وعشان نقول ان اللي عندنا ده ضعف انتصاب ، لازم نكون عارفين ان العضو الذكري مش بيحصل له انتصاب نهائي حتى لو حسينا بإثارة جنسية ، أو أننا لاحظنا أن أكثر من 50 % من عدد مرات العلاقة الزوجية محصلش فيها انتصاب للعضو الذكرى.
وضعف الانتصاب ممكن يحصل لأسباب كثير جدا ، قد تكون :
- أسباب عضوية ، زي :
1/ لو عندنا مرض السكر لأنه بيأثر على الشرايين والأعصاب و بكده الدم مش هيوصل كويس للقضيب.
2/ او لو عندنا ارتفاع فى ضغط الدم.
3/ او لو عندنا مشكلة فى القلب والاوعية الدموية.
4/ او لو عندنا نقص فى هرمون الذكورة.
5/ او لو عندنا اعوجاج في القضيب اللي بنسميه مرض بيروني.
- أو أسباب نفسية ، زي :
1/ الضغوط النفسية والمشاكل الزوجية اللي مش بتخلينا قادرين نستمتع بالعلاقة الزوجية ولا بيكون عندنا رغبة ولا إثارة جنسية علشان يحصل انتصاب.
2/ لو بنمارس العادة السرية باستمرار ، لان ده بيخلينا نفرغ كل الرغبة والشهوة اللي جوانا فيها ، ونيجي وقت العلاقة الزوجية مش بيكون عندنا رغبة ، وبالتالي مش هيحصل انتصاب.
3/ لو بنتفرج على افلام جنسية طول الوقت ، لانها بتخلي عندنا مفهوم وشكل معين عن العلاقة الزوجية ، ولما مش بنلاقيها زي ما احنا متخيلين ، ده بيخلي عندنا قلة ثقة في نفسنا إننا مش كويسين في العلاقة الزوجية ، وبالتالي مش هيحصل انتصاب أثناء العلاقة.
وبعد ما عرفنا ايه هو ضعف الانتصاب واسبابه ، تعالوا نعرف ايه هي سرعة القذف :
- سرعة القذف :
في البداية لازم تكون عارف ان العلاقة الجنسية الطبيعية بتستمر مثلا من دقيقتين إلى 5 دقائق وفى الوقت ده بتكون انت و زوجتك وصلتوا للنشوة الجنسية ، في الحالة دي انت معندكش سرعه قذف.
لكن علشان تقدر تقول ان انت عندك سرعة قذف أو قذف مبكر ، لازم القذف ده يكون بيحصل بعد أقل من دقيقتين من الإيلاج ، او بمعنى آخر أن بيحصل قذف قبل ما بنكون وصلنا للاستمتاع بالعلاقة.
وهنا خليني اقولك معلومة مهمة جدا ، وهي ان لازم عشان تقول ان عندك سرعة قذف لازم ده يكون بيحصل بقاله 6 شهور ، و خلال الوقت ده نكون بنمارس العلاقة الزوجية بشكل منتظم ، وأن سرعة القذف بتحصل في أكثر من نصف مرات العلاقة الزوجية.
ولازم تكون عارف ان سرعة القذف ممكن تحصل لأسباب كثير جدا ، قد تكون :
- أسباب عضوية ، زي :
1/ لو عندنا ضعف انتصاب بالتالي هيكون عندنا سرعة في القذف.
2/ لو عندنا حساسية زيادة في أعصاب العضو الذكري ، لان ده هيخلى احساسها زيادة عن الطبيعى ، فكل لما نتعرض للإثارة الجنسية او اى احتكاك فى العضو بيحصل قذف على طول.
3/ لو عندنا سكر لانه هياثر على الأعصاب في العضو الذكري.
4/ لو عندنا التهابات في البروستاتا أو في مجرى البول.
- أو أسباب نفسية ، زي :
1/ الخوف و القلق المستمر من أن الزوجة متكونش راضية عن العلاقة الزوجية.
2/ لو عندنا مشاكل في الشغل او نتعرض باستمرار لضغط نفسي وتوتر.
3/ او لو حصل مره سرعة قذف فى العلاقة الزوجية ، وبعدها فضلنا نفكر فيها ونفكر هو ده ممكن يحصل تاني ولا لا.
4/ او لو مش بنمارس العلاقة الزوجية بشكل منتظم ، و بنبعد عنها لفترة طويلة.
ودلوقتي خليني اجاوبك على سؤال مهم جدا انا متأكد انك بتفكر فيه دلوقتي وانت بتقرا المقال وهو ، هل سرعة القذف دليل على ان الشخص ده ضعف انتصاب ؟ الاجابة لا طبعا ، سرعة القذف عمرها ما كانت دليل على ان الشخص ده عنده ضعف انتصاب ، ولكن الشخص اللي بيكون ضعف في الانتصاب بالضرورة بيكون عنده سرعة في القذف ، ده غير كمان ان الخوف من فقدان الانتصاب باستمرار أثناء العلاقة الزوجية بيزيد من مشكلة سرعة القذف.
ولو عايز تحدد هل الاعراض اللي عندك دي ضعف انتصاب ولا سرعة قذف ، اسمع الفيديو ده مع الدكتور اسامة البكل…
فى النهاية ، لازم تبقي عارف ان الضعف الجنسي سواء كان سرعة قذف أو ضعف انتصاب ، فده حاجة متعبكش ده مرض زي أي مرض ، بس لازم اول ما نحس ان فى اختلاف فى أدائنا الجنسى اننا نكشف فورا عشان نلحق الموضوع من اوله لو هو عضوى علشان نحط ليه خطة علاج مناسبة ، ولو هو نفسى نبدء بردو فى العلاج السلوكى عشان نوفر على نفسنا القلق بسبب اننا مش قادرين نقوم بالعلاقة الجنسية.
ولو لسه عندك اي تساؤل او استفسار ، تقدر تتواصل مع فريقنا الطبي علي الرقم ده 01018874287 وهما هيحددولك ميعاد مع الدكتور اسامه محمد البكل مدرس واستشاري طب وجراحة أمراض الذكورة وتأخر الإنجاب والصحة الجنسية بطب القصر العيني وهو هيجاوب على كل الاسئلة اللى قلقاك وهيحدد لك العلاج المناسب ليك عشان توصل للعلاقة الزوجية اللى ترضيك.