ما هو عدد الحيوانات المنوية الطبيعية لحدوث الحمل ؟

ما هو عدد الحيوانات المنوية الطبيعية لحدوث الحمل ؟

علشان يحصل حمل بشكل طبيعي ، بنكون محتاجين حيوان منوي واحد سليم وخالي من اي عيوب او تشوه مع بويضة واحدة سليمة للاخصاب وتكوين الجنين ، ولكن ده مش معناه ان يكون عندنا حيوان منوي واحد بس ، لان مهم يكون عندنا عدد كبير من الحيوانات المنوية عشان نحسن من فرص حدوث الحمل الطبيعي ، وعشان كده نقص عدد الحيوانات المنوية بيقلل من فرص حدوث الحمل وبيسبب تأخر في الإنجاب.

ودلوقتي تعالوا نعرف مع بعض ايه هو العدد الطبيعي لحدوث الحمل ، 

و ازاي تعرف انك بتعاني من نقص في عدد الحيوانات المنوية :

بس في البداية لازم تكون عارف ان الشخص الطبيعي وقت القذف في العلاقة الزوجية بيخرج حوالي من 80 إلى 300 مليون حيوان منوي في عملية القذف الواحدة ، لكن الشخص اللي بيعاني من نقص في عدد الحيوانات المنوية ، بيحتوي السائل المنوي بتاعه على عدد اقل من 15 مليون حيوان منوي لكل ملليلتر من السائل المنوي في عملية القذف الواحدة.

ولازم تكون عارف ان نقص عدد الحيوانات المنوية بيكون ليه درجات ، زي : 

• نقص بسيط : بمعنى أن عدد الحيوانات المنوية بيكون أكثر من 5 مليون حيوان منوي لكل ملليلتر من السائل المنوي.
• نقص شديد : بمعنى أن عدد الحيوانات المنوية بيكون اقل من 5 مليون حيوان منوي لكل ملليلتر من السائل المنوي.

وهنا خليني اقولك ان في اسباب كثير ممكن تكون السبب في انخفاض عدد الحيوانات المنوية ، زي : 

1/ وجود خلل في الهرمونات : بمعني ان في خلل في هرمون الذكورة أو خلل في هرمون الانوثة ، وده هياثر علي وظيفة الغدد التناسلية ، وبالتالي هياثر علي الخصية وانتاجها وجودتها للحيوانات المنوية.

2/ الخصية المعلقة :  بمعني ان دي حالة مرضية بيصاب بها الأطفال الذكورة بعد الولادة مباشرة ، وهنا الخصية مش بتنزل مكانها الطبيعي في كيس الصفن وبتفضل معلقة داخل البطن ، وهنا لازم تتعالج فورا قبل بلوغ السنة ونص من عمر الطفل علي يد جراح متخصص ، لاننا لو اتاخرنا في علاجها ، ده هيسبب للطفل مشاكل كتير جدا ، لان ده بيعرض الخصية لدرجة حرارة الجسم العالية ، وبالتالي هياثر علي انتاجها وجودتها للحيوانات المنوية ، وهيسبب نقص او انعدام للحيوانات المنوية.

3/ دوالي الخصية : لان دوالي الخصية بترفع من درجة حرارة الخصية وبتزيد من تراكم المواد المؤكسدة ( ros ) اللي هتاثر على الخصية وانتاجها للحيوانات المنوية ، وبالتالي ممكن تسبب نقص أو انعدام في الحيوانات المنوية وتاخر في الانجاب.

4/ وجود التهابات أو عدوى في الجهاز التناسلي : بمعني ان لو عندنا التهاب في الخصية أو البربخ ، ده هياثر علي صحة وجودة الحيوانات المنوية وهيسبب نقص في عدد الحيوانات المنوية.

5/ لو عندنا قذف مرتجع : لان في الطبيعي السائل المنوي وقت القذف بيخرج من مجرى البول في القضيب ، لكن في بعض الحالات بنلاقي ان السائل المنوي بيرجع للمثانة ، والسبب في ده ان في عضلة صغيرة في عنق المثانة واللي وقت القذف بتتقفل عشان تمنع دخول السائل المنوي فيها ، لكن احيانا بيحصل ضعف في عضلة المثانة ، ساعتها فتحة المثانة مش هتتقفل وهيدخل السائل المنوي فيها بدل ما يخرج من مجرى البول ، وده هيسبب مشاكل كتير في السائل المنوي ونقص في عدد الحيوانات المنوية.

6/ لو عندنا انسداد في القنوات المنوية او الوعاء الناقل : لان ده هيمنع خروج الحيوانات المنوية من الخصية واختلاطها بالسائل المنوي ، وهيسبب نقص في عدد الحيوانات المنوية.

7/ لو بنتعرض للعلاج الكيماوي أو الإشعاعي : لأن علاج الأمراض السرطانية بياثر على الخصية وانتاجها وجودتها للحيوانات المنوية ، علشان كده بننصح اللي هيتعرض للعلاج الكيماوي او الاشعاعي انه يجمد عينة من الحيوانات المنوية عشان يستخدمها بعد التعافي في عملية الحقن المجهري.

8/ السمنة : لأن السمنة من الأمراض الخطيرة اللي بتسبب نقص في هرمون الذكورة وزيادة في مستوى هرمون الانوثة ، وده هياثر علي صحة وجودة الحيوانات المنوية.

ودلوقتي تعالوا نعرف مع بعض ازاي نعالج نقص عدد الحيوانات المنوية علشان يكون عندنا فرصة كبيرة ان يحصل حمل طبيعي : 

وهنا لازم تكون عارف ان انك علشان تعالج نقص عدد الحيوانات المنوية ، لازم الاول تعالج السبب اللي أدى إلى نقص العدد من البداية ، بمعنى ان لو كان نقص العدد بسبب : 

1/ خلل في الهرمونات : وقتها العلاج هيكون دوائي علشان نظبط مستوي الهرمونات في الجسم ونحسن وظيفة الخصية في انتاج الحيوانات المنوية.

2/ ولو كان السبب دوالي الخصية : العلاج هيكون جراحي علشان نربط الدوالي ونحسن وظيفة الخصية بالجراحة الميكروسكوبية باعتبارها أفضل واحسن طريقة تعالج بيها دوالي الخصية ومن غير ما تضر الخصية.

3/ أما لو كان السبب التهابات في الخصية : وقتها هنطلب من المريض أنه يعمل مزرعة سائل منوي علشان نحدد نوع البكتيريا وانسب مضاد حيوي للمريض.

4/ ولو كان السبب قذف مرتجع : وقتها هناخد علاج ننشط بيه عضلة عنق المثانة ، علشان نوجه السائل المنوي للإمام لمجرى البول ، بدلا من تدفقه للخلف إلى المثانة.

5/ لكن بقي لو كان السبب وجود انسداد : وقتها لازم الاول نعمل اشعة علشان نحدد مكان الانسداد فين بالظبط ، ولو لقينا ان الانسداد : 

• في القنوات المنوية : وقتها هنسحب عينة من الخصية بالابرة ونستخرج منها الحيوانات المنوية ونعمل بيها حقن مجهري.
• ولو كان الانسداد في الوعاء الناقل : ساعتها هنستخدم الميكروسكوب علشان نعالج الانسداد وبعدين نوصل البربخ بالوعاء الناقل ، وبعد كده هتظهر الحيوانات المنوية في السائل المنوي. 
• اما بقي لو كان الانسداد في قناة القذف : وقتها هنستخدم المنظار علشان نسلك بيه الانسداد وبعدها هتطلع الحيوانات المنوية في السائل المنوي وهيكون في فرصة كبيرة ان يحصل حمل طبيعي.

ولو عايز تطمن اكثر على حالتك وتعرف ان في امل حتى لو بتعاني من نقص شديد في عدد الحيوانات المنوية ، اسمع الفيديو ده مع الدكتور اسامة البكل…..

في النهاية ، لازم تكون عارف ان مهما واجهت من صعوبات في الحمل ، خليك متفائل لأن ربنا سبحانه وتعالى لما خلق الداء خلق معاه الدواء ، واحنا دورنا كأطباء اننا نطمنك ان كل مشكلة وليها حل ، ومشكلة نقص عدد الحيوانات المنوية ليها أكثر من طريقة للعلاج ، وبعد كدة هيحصل حمل طبيعي وهيكون عندك بدل الطفل اتنين.

ولو محتاج تتابع معانا رحلة علاجك ، تقدر تتواصل مع الفريق الطبي علي الرقم ده 01018874287 وتطلب منهم يحددولك اقرب ميعاد مع الدكتور اسامة محمد البكل مدرس واستشاري طب وجراحة أمراض الذكورة وتأخر الانجاب والصحة الجنسية بطب القصر العيني.