ما هي نسبة نجاح عملية التفتيش الميكروسكوبي داخل الخصية ؟
يعاني نسبة كبيرة من الرجال من مشكلة العقم او تاخر الانجاب ، واللي قد تكون نتيجة وجود مشكلة في الحيوانات المنوية نفسها أو وجود مشكلة في القذف ، ولكن مع التقدم العلمي ظهرت العديد من التقنيات الحديثة اللي ساعدت على التخلص من المشكلة دي من جذورها وبنسب نجاح عالية ، ومن أحدث التقنيات دي عملية التفتيش الميكروسكوبي داخل الخصية.
ودلوقتي تعالي اقولك ايه هي عملية التفتيش الميكروسكوبي داخل الخصية ،
وايه هي طرق إجراءاها :
في البداية لازم تكون عارف ان عملية التفتيش الميكروسكوبي هي عملية جراحية بنستخدمها من أجل البحث والتفتيش عن الانابيب والبؤر المنوية الصالحة في الخصية علشان نستخرج منها الحيوانات المنوية السليمة والصالحة للإخصاب ونستخدمها في عمليات الحقن المجهري ، في الحالات اللي بتعاني من انعدام في الحيوانات المنوية في السائل المنوي.
ولازم تكون عارف ان عملية التفتيش الميكروسكوبي داخل الخصية بتم بعدة إجراءات ، زي :
1/ بنعمل تحليل سائل منوي ويكون أكثر من مرة ، ويكون في وقت بين التحليلين على الاقل اسبوعين ، علشان نتاكد من وجود انعدام في الحيوانات المنوية في السائل المنوي.
2/ ولازم نتاكد اننا معندناش دوالي في الخصية لأن الدوالي بالذات وخصوصا لو كبيرة بتضعف وظيفة الخصية في انتاج الحيوانات المنوية ، علشان كدة الاول نعالج الدوالي علشان الخصية ترجع تاني تنتج حيوانات منوية ، وممكن يطلع لنا حيوانات منوية في السائل المنوي ومنحتجش نعمل عملية التفتيش الميكروسكوبي ، لكن لو مطلعتش حيوانات منوية في السائل المنوي بعد عملية الدوالي ، في الحالة دي هنعمل التفتيش الميكروسكوبي ، وفي الحالة دي هتكون الخصية نشطة وبتنتج حيوانات منوية ، وده هيزود من فرص نجاح عملية التفتيش الميكروسكوبي داخل الخصية.
3/ ولازم كمان قبل العملية نعمل تحليل الهرمونات fsh و lh اللي مسؤولين عن انتاج الحيوانات المنوية في الخصية ، عشان لو لقينا نسبتهم قليلة في الجسم ، لازم ناخد فترة علاج هرموني لمدة 3 شهور علشان نظبط مستوي الهرمونات في الجسم ، وبعد العلاج بنعمل تحليل سائل منوي تاني ، لان في نسبة من الحالات بتتحسن مع العلاج ، والخصية بتطلع حيوانات منوية ومش هنحتاج نعمل تفتيش ميكروسكوبي ، لكن لو كانت نتيجة تحليل السائل المنوي بتوضح ان في انعدام في الحيوانات المنوية في السائل المنوي بعد العلاج ، في الحالة دي هنعمل العملية واحنا مطمنين أننا ظبطنا مستوي الهرمونات في الجسم.
ولو عايز تعرف ايه هي حالات انعدام الحيوانات المنوية اللي هتحتاج لفترة علاج هرموني قبل عملية التفتيش الميكروسكوبي ، اسمع الفيديو ده مع الدكتور اسامة البكل…
وبعد ما بنخلص كل الاجراءات دي ، بيجي وقت العملية :
1/ العملية بتم ببنج نصفي أو كلي.
2/ وبنبدا نعمل فتحة صغيرة جدا في نص كيس الصفن علشان ميكونش ليه اي اثر بعد العملية ، وبعدها بنبدا نخرج الخصية برة كيس الصفن ونعمل فيها فتحة علشان نقدر نشوف كل انسجة الخصية بوضوح.
3/ وبعدها بنبدا نستخدم الميكروسكوب الجراحي لانه بيكبر الرؤية لحد 40 ضعف ، وبنبدا ندور علي الانسجة اللي فيها الانابيب المنوية منتفخة ، وبعدين نبدا نخرج الأنابيب المنتفخة من غير ما نقص النسيج كله.
4/ بعد كده بنبعت الأنسجة دي للمعمل عشان يستخرج منها الحيوانات المنوية السليمة اللي هنعمل بيها حقن مجهري.
5/ واخيرا بنقفل الجرح اللي عملناه في الخصية و نرجعها تاني مكانها في كيس الصفن ، ونقفل كيس الصفن بغرز تجميلية علشان ميكونش ليه اي اثر ، وبكدة تكون العملية خلصت.
ودلوقتي خليني اقولك ايه هي نسبة نجاح عملية التفتيش الميكروسكوبي :
في البداية لازم تكون عارف ان نسبة نجاح عملية التفتيش الميكروسكوبي داخل الخصية بتتراوح ما بين 40-60% و النسبة دي ممكن تقل او تزيد على حسب الحالة و حسب سبب الانعدام.
ولكن في شوية اجراءات لازم تكون عارفها علشان تضمن أعلى نسبة نجاح للعملية ، زي :
1/ لازم الجراح اللي هيعمل العملية يكون جراح متخصص وعنده خبرة ، عشان يعرف يميز بين الأنابيب المنتفخة اللي فيها حيوانات منوية بكميات أكبر ، ويبعد عن الأنابيب المنكمشة اللي بيكون فيها الحيوانات المنوية بكميات أقل.
2/ ولازم كمان المكان اللي هنعمل فيه العملية يكون مجهز وفيه معمل اجنة ، علشان يستلم العينة اول ما تطلع من الخصية ويستخرج منها الحيوانات المنوية اللي هنعمل بيها حقن مجهري ، ويجمد الحيوانات المنوية اللي جودتها كويسة ، علشان منحتجش نعمل عملية ونفتح الخصية في كل مرة عاوزين نخلف فيها.
3/ ده غير ان بعد العملية ممكن تحس بألم أو تورم في مكان كيس الصفن ، لكن ده بيكون الم بسيط جدا وبيروح بالمسكنات و بالكمادات الباردة.
4/ ولازم كمان نحافظ على نظافة الجرح لمنع حدوث أي عدوى أو بكتيريا.
5/ ومهم اننا نتجنب اي مجهود شاق بعد العملية لمدة أسبوعين.
وفي النهاية ، لو التزمت بكل التعليمات والنصائح دى هتحقق أعلى نسب نجاح في عملية التفتيش الميكروسكوبي داخل الخصية وهيكون عندك أعلى فرصة لحدوث الحمل وهيكون عندك بدل الطفل اثنين وثلاثة باذن الله.
ولو لسه عندك اي استفسار بخصوص عملية التفتيش الميكروسكوبي ، تقدر تتواصل مع الفريق الطبي علي الرقم ده 01018874287 وهما هيجاوبوا علي كل اسئلتك او تقدر تطلب منهم يحددولك اقرب ميعاد مع الدكتور اسامة محمد البكل مدرس واستشاري طب وجراحة أمراض الذكورة وتاخر الانجاب والصحة الجنسية بطب القصر العيني.