ما هو علاج انعدام الحيوانات المنوية في الخصية ؟
الخصية هي المصنع اللي بينتج الحيوانات المنوية المسؤولة عن الإنجاب ، واي مشكلة هتاثر على الخصية ، هتؤدي الى انعدام الحيوانات المنوية في الخصية ، وبالتالي هتؤدي إلى تأخر الإنجاب ، لكن في حالات كثير جدا قابلة للعلاج وبترجع الخصية تاني تنتج حيوانات منوية وبيحصل حمل بشكل طبيعي.
لكن قبل ما نتكلم عن طرق العلاج ، خليني اقولك
ايه هي الاسباب اللي بتؤدي الى انعدام الحيوانات المنوية في الخصية ؟
1/ دوالي الخصية : وهي عبارة عن تضخم في الاوردة المحيطة بالخصية الموجودة داخل كيس الصفن ، نتيجة لضعف الصمامات المسؤولة عن تنظيم تدفق الدم من الخصيتين الى القلب ومنع عودته تاني للخصية ، فلما الصمامات دي بتضعف ، الدم بيرجع تاني للخصية ويفضل يتراكم داخل الأوردة ويسبب الدوالي ، ولو كانت الدوالي من الدرجة الثانية أو الثالثة هترفع من درجة حرارة الخصية وهتضعف وظيفتها في إنتاج الحيوانات المنوية.
2/ وجود التهابات في الخصية : بمعنى إصابة الخصية بعدوى أو التهاب نتيجة الأمراض المعدية المنقولة جنسيا ، وده بيسبب ضعف في أنسجة الخصية وعدم إنتاجها للحيوانات المنوية.
3/ وجود خلل جيني زي متلازمة كلاينفلتر : وده مرض بيحصل نتيجة وجود خلل في جينات الشخص ، بمعنى ان الشخص الطبيعي بيكون عنده 46 كروموسوم ، اثنين منهم الكروموسومات الجنسية XY للذكور و XX للإناث ، لكن الشخص المصاب بمتلازمة كلاينفلتر بيكون عنده 47 كروموسوم ، بمعنى وجود كروموسوم X زيادة في الخلايا XXY ، وده بيحصل نتيجة خلل في مرحلة انقسام الخلايا أثناء توزيع الكروموسومات للجنين من الأب والأم ، والمتلازمة دي بتأثر على الخصية وعلى انتاجها للحيوانات المنوية.
4/ الخصية المعلقة : وده عيب خلقي بيصيب الأطفال الذكور بعد الولادة مباشرة ، و يتسبب في أن خصية واحدة أو الاثنين فضلوا معلقين داخل البطن ومنزلتش إلى مكانها الطبيعي في كيس الصفن ، والخصية المعلقة لازم تتعالج بالجراحة خلال السنة الأولى من عمر الطفل ، لأنها لو فضلت معلقة داخل البطن ، هتتعرض لدرجة حرارة الجسم العالية ، وده طبعا هيسبب ضمور للخصية وعدم إنتاجها للحيوانات المنوية.
ولو عايز تعرف اي علاقة الخصية المعلقة بتاخر الانجاب ، اسمع الفيديو ده مع الدكتور اسامة البكل…
5/ التدخين بشراهة : لأن النيكوتين الموجود في السجائر بياثر بشكل كبير جدا على الخصية وانتاجها للحيوانات المنوية ، ده غير كمان انه بيسبب ضيق في الأوعية الدموية الموصلة للعضو الذكري وبيقلل من وصول الدم إلى القضيب وبيسبب ضعف انتصاب.
6/ التعرض للعلاج الإشعاعي والكيماوي : بمعني ان علاج الامراض السرطانية بياثر على الخصية ، لأنه بيهاجم الخلايا والبؤر المنوية الموجودة في الخصية وبيتسبب في موت الحيوانات المنوية ، وبالتالي هيؤدي الى انعدام الحيوانات المنوية في الخصية ، عشان كدة بننصح اي حد هيتعالج من مرض السرطان انه يجمد عينة من الحيوانات المنوية عشان يستخدمها بعد التعافي في عمليات الحقن المجهري.
ودلوقتي تعالوا نعرف ايه هى طرق علاج انعدام الحيوانات المنوية في الخصية :
في البداية لازم تكون عارف ان في حالات كتير بتعاني من انعدام الحيوانات المنوية في الخصية وبتكون قابلة للعلاج ، وبعدها الخصية بترجع تاني تنتج حيوانات منوية ويحصل حمل بشكل طبيعي ، بالتالي لو كان السبب :
1/ دوالي الخصية : وكانت الدوالي درجة كبيرة ، وقتها العلاج هيكون جراحي عن طريق ربط الدوالي بالجراحة الميكروسكوبية عشان نحسن من وظيفة الخصية في انتاج الحيوانات المنوية.
2/ ولو كان السبب متلازمة كلاينفلتر : ساعتها هتاخد علاج هرموني عشان نظبط بيه مستوي الهرمونات في الجسم ، وبعدها نعمل تفتيش ميكروسكوبي علشان نستخرج عينة من الخصية ونعمل بيها حقن مجهري.
3/ ولو كان السبب وجود التهابات : في الحالة دي هنطلب من المريض أنه يعمل مزرعة سائل منوي علشان نتاكد من وجود الالتهابات ونحدد نوع الميكروب ونختار المضاد الحيوي المناسب اللي نقدر نعالج بيه الالتهابات.
في النهاية ، خليك عارف ومتأكد انك مهما وصلت لقمة يأسك انك تكون اب ويكون عندك أطفال ، فانت غلطان لان دلوقتي ومع التقدم العلمي في مجال العقم والذكورة ، بقي كل مرض وليه علاج ، وكل مشكلة وليها حل ، المهم انك متستسلمش ليأسك وتتعالج صح علشان يكون عندك أعلى فرصة ان يحصل حمل طبيعي ويكون عندك أطفال.
ولو احتجت تتواصل معانا ونحجز لك ميعاد مع الدكتور اسامة محمد البكل مدرس واستشاري طب وجراحة أمراض الذكورة وتأخر الإنجاب والصحة الجنسية بطب القصر العيني ، تقدر تتواصل معانا على الرقم ده 01018874287.