متى تكون دوالي الخصية خطيرة ؟

متى تكون دوالي الخصية خطيرة ؟

عندما نفكر في كلمة مرض خطير فأول حاجة بتيجي في بالنا هي الأمراض التي تمثل خطورة أو تهديد على حياتنا ، ويشمل ذلك العديد من المشكلات الصحية ، لكن ماذا عن دوالي الخصية ، فهل هي خطيرة إلى الحد الذي يمثل تهديداً على الحياة ؟ ومتى بالضبط دوالي الخصية بتكون خطيرة ؟

في المقال ده هنتكلم بالتفصيل عن دوالي الخصية ، والمضاعفات اللي بتسببها دوالي الخصيتين ، و متى تكون دوالي الخصية خطيرة…

ودلوقتي تعالوا نعرف مع بعض ايه هي دوالي الخصية : 

دوالي الخصية هي أحد أهم المشكلات اللي بتصيب عدد كبير من الرجال ، نتيجة لضعف الصمامات اللي بتكون موجودة في الأوردة واللي مسؤولة عن تنظيم تدفق الدم من الخصيتين الى القلب ومنع عودته تاني للقلب بعد تدفقه ، فلما الصمامات دي بيحصل فيها اي عيب او خلل ، ساعتها الدم اللي طالع من الخصية في اتجاه القلب بيرجع تاني للخصية ويفضل يتراكم داخل الاوردة ، وهو ده اللي بيسبب دوالي الخصية.

ودلوقتي تعالي اجاوبك على سؤالك ، متى تكون دوالي الخصية خطيرة ؟ 

في البداية لازم تبقي عارف ان دوالي الخصية بتكون خطيرة في الحالات دي  : 

• عندما تسبب وجع والم شديد للشخص نتيجة الوقوف لفترات طويلة أو ممارسة الانشطة الثقيلة.
• عندما تكون السبب في الاصابة بتاخر الانجاب او العقم.
• أو عند انكماش الخصية بسبب تجمع الدم وارتفاع درجة حرارتها.
• واخيرا ، عندما تكون دوالي الخصية اللي عندك من الدرجة الثالثة ، لان الدرجة الثالثة هي أشد درجة من درجات دوالي الخصية من حيث خطورتها ودرجة تأثيرها على المريض ، لأن الأوردة فيها بتكون متضخمة جدا و مرئية بوضوح ، والدكتور بيقدر يشوفها ويحسها بسهولة من خلال الفحص ، ده غير ان الدرجة دي بتعمل تغير كبير وواضح في شكل كيس الصفن وحجمه. 

ولو عايز تعرف هل كل شاب عنده دوالي في الخصية لازم يعمل عملية ؟ اسمع الفيديو ده مع الدكتور اسامة البكل…

ودلوقتي تعالي اقولك على ايه هي المضاعفات اللي بتسببها دوالي الخصيتين : 

1/  دوالي الخصية بتكون خطيرة على المراهقين : لانها بتسبب لهم بطء في نمو الخصية ، ده غير انها بتسبب للكبار صغر وانكماش في حجم الخصية ، ومع الوقت ممكن يوصل لضمور الخصية.

2/ السبب الرئيسي لتأخر الإنجاب : وهنا لازم تكون عارف ان الخصية في المصنع الرئيسي اللي بينتج الحيوانات المنوية ، والخصية علشان تقدر تنتج حيوان منوي سليم يقدر يخصب البويضة ويكون جنين ، لازم درجة حرارتها تكون أقل من درجة حرارة الجسم الطبيعية بحوالي درجتين ، عشان الدم اللي يوصلها يكون بارد وتقدر تنتج حيوانات منوية.

لكن دوالي الخصية وخاصة بقي لو كانت من الدرجة الثانية أو الثالثة ، هترفع من درجة حرارة الخصية وهتزيد من تراكم المواد المؤكسدة ( ROS ) اللي بتأثر على الخصية وانتاجها للحيوانات المنوية ، وبتاثر على الهرمونات المسؤولة عن إنتاج الحيوانات المنوية ، وكمان بتسبب تكسير في المادة الوراثية الموجودة في رأس الحيوان المنوي ، ده غير كمان انها بتسبب انخفاض في هرمون الذكورة في الجسم في الحالات المتأخرة ، وده هياثر علي صحة وجودة الحيوانات المنوية من حيث عددها وحركتها وشكلها ، وكل المشاكل دى هتسبب تأخر في الإنجاب.

وهنا مهم تبقي عارف ان اي مشكلة وليها علاج ، وان كل المضاعفات اللي قولناها دي مش هتمنعنا أننا نعالج المشكلة ، وعشان تطمن اكثر ، خليني اقولك ان في طريقة بننصح بيها جدا في علاج دوالي الخصيتين ، وهي الجراحة الميكروسكوبية ، وتعتبر أفضل واحسن طريقة نعالج بيها دوالي الخصية ومن غير ما نضر بوظيفة الخصية.

ودلوقتي تعالي اقولك ليه الجراحة الميكروسكوبية افضل طريقة نعمل بيها عملية دوالي الخصية : 

1/ لاننا بنستخدم فيها الميكروسكوب الجراحي اللي بيساعد في تكبير مكان العملية ، وده بيخلينا نقدر نميز بين الشرايين والأوردة في الخصية. 

2/ بسبب تكبير الميكروسكوب ، الجراح بيقدر يتجنب ربط الشريان الخصوي اللى بيغذى الخصية بالدم ، وبالتالي الخصية مش هيحصلها ضمور.

3/ في الجراحة الميكروسكوبية الجراح بيقدر يوصل لكل الأوردة الصغيرة ويربطها ، عشان ميحصلش ارتجاع للدوالى مره تانيه وده اللي مش بنقدر نعمله في الجراحة التقليدية.

4/ الميكروسكوب الجراحي بيساعد الجراح إنه يتجنب ربط الأوعية الليمفاوية ، وبالتالي بيقلل من حدوث قيلة مائية على الخصية.

5/ والعملية مش بتاخد أكتر من ساعة ، والمريض بيقدر يروح البيت في نفس اليوم ، ويرجع للشغل بعد 3-5 أيام.

6/ وبالنسبة للعلاقة الزوجية بنقدر نمارسها بعد العملية باسبوع واحد بس.

في النهاية ، لازم تكون عارف ان دوالي الخصية مش خطر بيهدد حياتك زي ما انت متخيل ، وحتى لو كانت من الدرجة الثالثة اللي هي أخطر أنواع دوالي الخصية ، فهي برضه مش هتحرمك من الانجاب ، بس المهم انك متهملش علاجها وتتشخص صح وتختار الطريقة اللي تتعالج بيها صح ، علشان تحقق حلمك ويكون عندك أطفال.

ولو احتجت انك تتواصل معانا ونحجز لك ميعاد مع الدكتور اسامة محمد البكل مدرس واستشاري طب وجراحة أمراض الذكورة وتأخر الانجاب والصحة الجنسية بطب القصر العيني ، تقدر تتواصل معانا على الرقم ده 01018874287