امتي يكون تركيب دعامة العضو الذكري هو الحل الوحيد لعلاج ضعف الانتصاب

امتي يكون تركيب دعامة العضو الذكري هو الحل الوحيد لعلاج ضعف الانتصاب

خلينا فى البدايه نأكد على نقطة ان تركيب دعامة للعضو الذكرى ، مش هو حلنا الوحيد عشان نعالج ضعف الانتصاب ، لكن هو الحل الاخير ، بمعنى ان اخر حاجة بنلجألها عشان نعالج ضعف الانتصاب هو تركيب الدعامة ، و ان فى طرق تانيه لعلاج ضعف الانتصاب زى العلاج الدوائى او الحقن الموضعى.

متى لازم نركب دعامة للعضو الذكري لعلاج ضعف الانتصاب

و تعالوا دلوقتى نعرف امتى لازم نركب دعامه للعضو الذكرى عشان نعالج ضعف الانتصاب

1. ضعف الانتصاب من الدرجة الثالثة

لو ضعف الانتصاب اللى عندنا كان من الدرجة التالتة ، واللى بتكون اخر واصعب درجة ممكن نوصلها من ضعف الانتصاب ، وهنا العلاج الوحيد هيكون زرع الدعامة.

2. مرض بيروني

لو كان عندنا مرض بيرونى ، بس هنا لازم نعرف ان الدعامة مش بتعالج التليف اللى بيحصل فى العضو الذكرى بسبب مرض بيرونى ، الدعامة هنا هتعالج ضعف الانتصاب اللى حصل بسبب التليف.

3. اعوجاج القضيب

لو كان عندنا اعوجاج في القضيب ، وقتها أفضل قرار ممكن ناخده هو تركيب الدعامة ، لان الدعامة هنا مش بس هتعالج ضعف الانتصاب ، دى كمان هتعالج الاعوجاج وهترجع العضو الذكرى لشكله الطبيعى.

4. فشل العلاج الدوائي

ولو جربنا العلاج الدوائى لفترة متقلش عن شهرين ولقينا ان ضعف الانتصاب لسه زى ما هو ومفيش اى تحسن وقتها ممكن اننا نلجأ لتركيب الدعامة ، بس هنا فى شرط عشان نقول إن العلاج مجابش نتيجة ، وهو اننا نكون عارفين اى اصلا سبب ضعف الانتصاب ، لان ضعف الانتصاب ده عرض مش مرض بمعنى انه بيحصل بسبب مشكله زى مثلا سكر مش متظبط او مشاكل فى القلب أو الوزن الزائد ، او اننا بندخن ، او ان يكون عندنا زياده في نسبه الدهون فى الدم ، فكل الحاجات دى بتأثر على الدورة الدموية في العضو الذكرى و بتعمل ضعف انتصاب ، فلازم قبل ما ناخد خطوه اننا نعالج ضعف الانتصاب سواء بالأدوية أو بتركيب الدعامة لازم الاول نعرف السبب فى ضعف الانتصاب ونعالجه ، لان احنا لو ركبنا الدعامة من غير ما نعالج المشكله الاساسيه ، احنا هنكون فعلا عالجنا ضعف الانتصاب بس ممكن نعرض نفسنا لمشاكل تانية كتير زى جلطات فى القلب والمخ بسبب المشكله اللى موجوده فى الدورة الدموية.

5. مشاكل القلب وموسعات الشرايين

أو أن يكون عندنا مشكله فى القلب وبناخد بسببها موسعات للشرايين ، وقتها منقدرش اننا نعالج ضعف الانتصاب بالأدوية ولا نقدر ناخد اى منشطات جنسيه ، لإننا كده هنكون بنرفع من مستوى GMP في الجسم ، وده ممكن يسبب انخفاض شديد في ضغط الدم وممكن يسبب الوفاة.

6. عدم الراحة مع الحقن الموضعي

وممكن كمان نقرر اننا نركب دعامة القضيب لو كنا بنعالج ضعف الانتصاب بالحقن الموضعى ، بس احنا مش مرتاحين لفكرة اننا لازم نحقن نفسنا فى العضو الذكرى فى كل مرة عاوزين اننا نعمل فيها علاقة زوجية.

7. التسريب الوريدي

او لو عندنا تسريب وريدى ، بس هنا لازم قبل ما ناخد قرار تركيب الدعامة ، نكون متأكدين اننا عندنا تسريب وريدى فعلا لان ده من أكثر الأمراض اللى بتتشخص غلط.

8. كسر الحوض

واخيرا لو لاقدر الله حصلنا كسر فى الحوض ، لان الكسر ده هيأثر على الاعصاب اللى مسئولة عن تغذية العضو الذكري والانتصاب ، وهنا للأسف العلاج الدوائى مش هيجيب نتيجة.

الحالات التي تمنع تركيب دعامة العضو الذكري

طيب هل معنى اللى قولناه ده ان كده كل الناس اللى عندها ضعف انتصاب تقدر تركب دعامة العضو الذكرى ؟

الاجابه هتكون لا فى حالات مينفعش نركب فيها دعامة العضو الذكرى حتى لو كانت هى الحل الوحيد لعلاج ضعف الانتصاب ، لان الدعامة وقتها هتسبب لنا مشاكل كتير و الحالات دى هى :

1. مرض السكري غير المنتظم

لو الشخص اللى هيركب الدعامة كان مريض سكر، و نسبة السكر فى الدم مش مستقره و مش عارفين نسيطر عليها وقتها مش هنقدر اننا نركب الدعامة ، غير لما نظبط السكر الاول .

2. ضعف المناعة

لو عندنا ضعف بدرجة كبيره فى مناعة الجسم .

3. العدوى النشطة

و لو عندنا اى عدوى فى الجهاز التناسلى ، و خصوصا لو كانت نشطة لازم نعالجها الاول .

4. مشاكل التبول

و اخيرا لو عندنا اى مشكله فى التبول ، لازم نحل مشاكل التبول الأول قبل ما نفكر في تركيب الدعامة .

تفاصيل عملية تركيب الدعامة

بخلاف الحالات دى نقدر اننا نركب دعامة للعضو الذكري و احنا متطمنين ، لان العمليه نفسها بسيطة جدا و مفيهاش اى خطوره لو اتعملت صح ، و عشان نطمن اكتر تعالوا نعرف شويه تفاصيل عن العمليه و ازاى بتم :

بس قبل ما نشرح اى اللى بيحصل فى العمليه ، خلينى اقولك شويه حاجات عن العمليه

معلومات مهمة عن العملية

نسبة نجاح عمليه تركيب الدعامة بتكون اكتر من 95% ، و على فكره دى نسبه كبيره جدا لما نكون بنتكلم عن نسب نجاح عمليه .
العمليه نفسها مش بتاخد اكتر من 45 دقيقة او ساعه بالكتير
ده غير اننا بنقدر نعمل العمليه ببنج نصفى ، لو وضعنا يسمح وده بيتحدد طبعا بعد استشارة دكتور التخدير

خطوات العملية

و دلوقتى تعالوا نعرف ازاى الدعامة بتتركب ؟

فى الاول بنبدأ العمليه بأننا بناخد جرعه مضاد حيوى ، و ده لاننا بنزرع جسم غريب فى العضو الذكرى فلازم مايكونش فى اى احتمال ان يحصل عدوى وقت تركيب الدعامة .

و بعد كده بنبدأ اننا نطهر المكان اللى هنعمل فيه جرح العمليه كويس عشان برضو ميكونش فى فرصة ان يحصل اى عدوى.

و بعد كده بنعمل فتحة صغيره جدا مش بتزيد عن 2 او 3 سم ، عشان ندخل فيها الدعامات ،

تركيب الدعامة داخل النسيج الكهفي

و هنا فى نقطة لازم ناخد بالنا منها و هى ان الدعامة لازم تكون جوا النسيج الكهفى ، مفيش حاجة اسمها اننا نزرع الدعامة بره النسيج الكهفى عشان نحافظ عليه وده لان :

اولا : النسيج الكهفى بقي فى مشكله اصلا و مبقاش قادر انه يقوم بدوره و هو انه يخلى العضو الذكرى ينتصب وقت العلاقة الجنسيه ، فهو بقى نسيج ملهوش دور
ثانيا : احنا لما بنيجى ندخل الدعامة احنا مش بنشيل اصلا النسيج الكهفى ، احنا بس بنعمل فيه فتحة صغيره مش بيزيد قطرها عن 2 سم عشان ندخل فيها الدعامة ، وده مش هيضر النسيج فى حاجة

إتمام العملية

و دلوقتى خلونا نرجع تانى للعملية بعد ما بنعمل الفتحة فى النسيج الكهفى و ندخل الدعامة ، هنا بنبدأ نتأكد أن طول الدعامة مناسب لطول العضو الذكرى ، ودي خطوة مهمة جدا لان لو طول الدعامة كان اقصر او اطول من العضو الذكرى ، ده هيسبب مشاكل كتير بعد كده.

وهو ده اللى بيحصل فى عملية تركيب الدعامة المرنه اما لو المريض كان بيركب دعامة هيدروليك و قتها هيزيد على الخطوات اللى لسه قايلينها دى حاجة كمان ، لان الدعامة الهيدروليكية بتتكون من اكتر من جزء مش جزء واحد زى الدعامة المرنة ، وده بيخلينا نعمل فتحتين كمان صغيرين واحدة فى كيس الصفن عشان نركب فيها المضخة بتاعت الدعامة وده الجزء اللى بنضغط عليه عشان ينفخ الدعامة وقت العلاقة الزوجية فيحصل انتصاب ، أو يفرغ الدعامة بعد العلاقة ما تخلص فيروح الانتصاب ، وفتحة تانيه فى اخر البطن أو ورا عظمة العانة ، أو في المساحة اللى ورا العضلات البطنية عشان نركب فيها الخزان.

و بعد ما بنتأكد ان خلاص الدعامة كده فى مكانها بنبدأ اننا نقفل الجرح بخيط تجميلى رفيع ، عشان بعد الجرح ما يلتئم ما يكونش ليه اى اثر .

ولو عايز تعرف ازاي تتجنب أي التهابات أو مضاعفات ممكن تحصل بعد تركيب دعامة الانتصاب ، اسمع الفيديو ده مع الدكتور اسامة البكل….

وكده احنا خلصنا العملية وعرفنا عنها كل حاجة ، ودلوقتى لو عايزين تعرفوا اكتر عن الفرق بين دعامة الانتصاب المرنة والدعامة الهيدروليك ، اضغط هنا…..