الهرمونات المسؤولة عن تأخر الإنجاب عند الرجال

الهرمونات المسؤولة عن تأخر الإنجاب عند الرجال

كنا اتكلمنا قبل كده وقولنا إن انعدام الحيوانات المنوية فى السائل المنوى ليه 3 أسباب:

• أسباب قبل الخصية
• أسباب فى الخصية
• أسباب بعد الخصية

و انهارده هنتكلم بالتفصيل عن أسباب قبل الخصية و دى المقصود بيها الهرمونات اللى بتتحكم فى ظهور العلامات الذكورية وقت البلوغ و بتتحكم كمان فى انتاج الحيوانات المنوية ، والهرمونات دى لو فيها مشكله اكيد ده هيأثر على الحيوانات المنوية سواء هيسبب نقص أو انعدام في عدد الحيوانات المنوية ، و معنى أنه هيأثر على الحيوانات المنوية يبقى اكيد بيأثر على الإنجاب كمان

الهرمونات المؤثرة على الخصوبة

و الهرمونات دى هى:

• هرمونات الغدة النخامية
• هرمونات الذكورة فى الخصية
• هرمونات E2 او هرمونات الأنوثة فى الخصية
• خلل الغدة الدرقية ، وده مش بيأثر على عدد الحيوانات المنويه بس ده كمان بيأثر على حركة ونوعية الحيوانات المنوية

و هنتكلم عن كل هرمون بالتفصيل عشان نفهم كويس ايه تأثيرهم على انتاج الحيوانات المنوية و الإنجاب ، وازاى بنقدر اننا نعالجهم ، و هنبدأ دلوقت بهرمونات الغدة النخامية.

الغدة النخامية

الغدة النخامية بتفرز 3 هرمونات و هما:

• هرمون LH
• هرمون FSH
• هرمون البرولاكتين

متى نقول أن هناك مشكلة في هرمونات الغدة النخامية؟

طيب امتى اقول ان انا عندى مشكله فى هرمونات الغدة النخامية: لو لقينا نقص فى هرمون FSH و LH و ده ليه سببين:

• فشل الغدة النخامية: اما ان الغدة النخامية مشتغلتش اصلاّ و عشان كده مدخلناش فى مرحلة البلوغ و ده بيتسبب فى انخفاض فى هرمون الذكورة ، و نقص أو انعدام في الحيوانات المنوية
• زيادة البرولاكتين: أو أن هرمون البرولاكتين بيتفرز بكميات كبيرة جدا اكتر من النسبة الطبيعية ، وفى الحالة دى هنلاقى نقص فى هرمون FSH و LH ، و ده هيسبب ضعف في انتاج الخصية للحيوانات المنوية

الحالات المختلفة وعلاجها

ودلوقتى تعالوا نتكلم اكتر عن هرمون FSH و LH و ايه علاقتهم بتأخر الإنجاب و البلوغ ، و ايه هى الحالات اللى ممكن يحصل فيها حمل بالحقن المجهرى و ايه الحالات اللى ممكن يحصل فيها حمل طبيعى ، و عشان نفهم الموضوع كويس تعالوا نقسمهم لحالات ، ونشوف كل حالة هيكون ايه علاجها.

الحالة الأولى: انعدام الحيوانات المنوية + نقص FSH و LH

لو عملنا تحليل للسائل المنوي ولقينا انعدام فى عدد الحيوانات المنوية وعندنا كمان نقص فى هرمون FSH و LH:

و فى الحالة دى بيحصل:

• فشل البلوغ: اما فشل فى مرحلة البلوغ و ده سببه ان الجزء المسؤل عن انتاج هرمون FSH و LH في الغدة النخامية مشتغلش خالص وعشان كده مدخلناش فى مرحلة البلوغ ولا الخصية بتشتغل و تنتج الحيوانات المنوية
• توقف ما بعد البلوغ: او ان الغده النخاميه بتتوقف عن انتاج هرمون FSH و LH بعد البلوغ و بكده الخصية مش هتشتغل و تنتج حيوانات منوية ، و كمان هنلاقى نقص فى هرمون الذكورة ، لأن انتاج الحيوانات المنوية وهرمون الذكورة مرتبط بوجود هرمون FSH و LH

العلاج والتوقعات:

فى الحالة دى عندنا فرصة ان يحصل حمل طبيعى بس بشرط اننا نعالج مشكلة نقص هرمون FSH و LH فى سن صغير، لان كل ما كان العلاج فى سن صغير كل ما كانت فرص ان الخصية تنشط و ترجع تطلع حيوانات منوية وقت القذف اكبر ،و العلاج هنا بيكون علاج هرموني ، و لازم نبقى عارفين ان العلاج الهرموني بياخد وقت مش اقل من سنه و نص ، و بعد العلاج بنوصل ان يكون فى حيوانات منوية فى السائل المنوى ، و حتى لو اعدادها اقل من الطبيعى ، ممكن يحصل حمل طبيعى لان بسبب العلاج الهرمونى نوعية الحيوانات المنوية بتكون كويسه جدا.

العلاج المتأخر:

طيب فى حالة بقى اننا مكتشفناش نقص هرمون FSH و LH و انعدام المنوية و فى سن صغير ايه اللى هيحصل

برضو هيكون لسه قدامنا فرصة ان يحصل حمل طبيعى بعد العلاج ، لكن نسبته بتكون اقل من لو عالجنا المشكلة بدرى ، و وقتها ممكن نلجأ للتفتيش الميكروسكوبى ، بعد ما نكون اخدنا العلاج.

الحالة الثانية: انعدام الحيوانات المنوية + ارتفاع FSH و LH

لو عملنا تحليل للسائل المنوي ولقينا انعدام فى عدد الحيوانات المنوية وزياده فى هرمون FSH و LH:

هنا احنا معندناش مشكلة في الغدة النخامية ، لكن المشكلة فى الخصية نفسها انها مش قادره تقوم بوظايفها و تنتج الحيوانات المنوية ، و الحل الوحيد عشان يحصل حمل هو التفتيش الميكروسكوبي ، ممكن مانحتجش لعلاج قبل التفتيش الميكروسكوبي ، لكن لو لقينا مشكلة فى نسبة هرمون الذكورة او هرمون البرولاكتين او هرمون E2 فى الخصية ، هنا لازم ناخد علاج الاول لفترة من 3-6 شهور و بعدها نعمل تفتيش ميكروسكوبى

سؤال مهم:

و هنا فى سؤال بسمعه من ناس كتير ، هو مينفعش ناخد علاج نقلل بيه نسبة هرمون FSH و LH ، و بعد كده يطلع حيوانات منوية فى القذف بدل ما نعمل تفتيش ميكروسكوبى ؟

هنا الاجابه هتكون لا ، لان زى ما قولنا من شوية المشكلة هنا مش فى الهرمونات المشكله هنا فى الخصية نفسها ، بمعنى ان الخصية مبتنتجش حيوانات منويه نهائى فهنلاقى ان الغده النخامية بتنتج هرمون FSH و LH بكميات اكبر من الطبيعى ، عشان تنشط الخصية و تخليها تنتج حيوانات منوية ، و لازم تعرف حاجة مهم انك لو روحت لدكتور مش متخصص و كتبلك علاج تقلل بية نسبة هرمون FSH و LH ، فانت كده بتقضى على البؤر المنوية الموجودة في الخصية اللى ممكن تنتج حيوانات منوية و فى الحالة دى مش هيكون فى اى فرصة ان يحصل حمل حتى بالتفتيش الميكروسكوبى.

ولو عايز تعرف ايه هي حالات انعدام الحيوانات المنوية اللي لازم تعمل تفتيش ميكروسكوبي من الخصية ، اسمع الفيديو ده مع الدكتور اسامة البكل……

الحالة الثالثة: قلة الحيوانات المنوية + ارتفاع FSH و LH

لو عندنا زيادة فى هرمون FSH و LH و عندنا حيوانات منوية بس عددها قليل اقل من 10 مليون:

وده معناه ان الخصية فيها كسل وظيفي مش بتقدر تنتج الحيوانات المنوية بكمية طبيعية ، و سبب زيادة نسبة هرمون FSH و LH انه يحفز الخصية و ينشطها عشان تنتج عدد أكبر من الحيوانات المنوية ، و هنا مش بندى اى علاج يزود عدد الحيوانات المنوية ، لان الخصية كده دى اخر امكانياتها في إنتاج الحيوانات المنوية ، لكن ممكن ناخد علاج نحسن بيه نوعية الحيوانات المنوية.

و الحمل هنا بنسبة كبيرة بيكون طبيعى ، و مش بنلجأ للحقن المجهرى غير لو الحمل اتأخر فتره طويله و اعداد الحيوانات المنوية بدأت تقل.

الحالة الرابعة: حيوانات منوية قليلة جداً + ارتفاع FSH و LH

لو عندنا زيادة فى هرمون FSH و LH و عندنا حيوانات منوية بس عددها قليل جدا و مش ظاهر فى التحليل:

والمشكلة هنا ان انتاج الخصية للحيوانات المنوية بيكون قليل جدا ، و حلنا الوحيد هنا اننا نعمل حقن مجهرى ، و بعده نعمل تجميد للحيوانات المنوية ، لان ممكن ان عدد الحيوانات المنوية يوصل للصفر فى اى وقت.

الحالة الخامسة: دوالي الخصية + ارتفاع FSH و LH

لو عندنا نقص فى عدد الحيوانات المنوية و دوالى على الخصية ، وكمان زيادة فى هرمون FSH و LH:

فى الحالة دى لو حجم الخصيتين اصغر من الطبيعى هيكون فى فشل في وظايف الخصية ، وبنسبة كبيرة مش هنحتاج نعمل عملية نعالج بيها دوالى الخصية ، و لو عملناها فده بيكون عشان نحسن من نوعية الحيوانات المنوية مش عشان نزود عددها ،و هنا بيكون عندنا فرصة كبيرة جدا ان يحصل حمل طبيعى بعد فترة علاج ، و لو محصلش حمل وقتها ممكن نلجأ للحقن المجهرى.

الحالة السادسة: نقص FSH فقط

لو عندنا نقص أو انعدام فى عدد الحيوانات المنوية و معاه نقص فى هرمون FSH:

و دى تعتبر من الحالات النادرة ، فى الحالة دى هنلاقى حجم الخصية بيكون كويس جدا ، هرمون الذكورة و هرمون LH نسبتهم كويسة ، بس المشكلة ان هرمون FSH نسبته اقل من الطبيعى ، هنا كل اللى هنعمله اننا ناخد علاج هرمونى نعوض بيه نقص هرمون FSH ، و بعد العلاج بيطلع حيوانات منوية فى القذف و بيحصل حمل طبيعى

الحالة السابعة: نقص LH وهرمون الذكورة

أما الحالة السابعه و الاخيرة: لو عندنا نقص فى الحيوانات المنوية ، و نقص فى هرمون LH و هرمون الذكوره

و دى كمان من الحالات النادره ، و بيكون فيها عدد الحيوانات المنوية فى القذف قليل عن الطبيعى ، و هنا بناخد حقن LH او حقن HCG عشان نعوض بيها نقص هرمون LH ، و بعد العلاج بيبدء عدد الحيوانات المنوية يزيد ، وبيحصل حمل بشكل طبيعي.

تحذير مهم

و فى هنا معلومة مهمة ناخد بالنا منها مش معنى اننا قولنا ان فى نقص فى هرمون الذكورة ، يبقى لو رحنا اخدنا حقن هرمون الذكورة كده المشكلة هتتحل ، لا انت كده هتكون بتزود المشكلة مش بتحلها ، لان الحقن دى هتتسبب أن إنتاج الحيوانات المنوية يقف خالص فى الخصية ، فاللى المفروض نعمله اننا ناخد حقن LH او حقن HCG اللى هتنشط الخصية وده هيخلى إنتاج الحيوانات المنوية يزيد و هيزود كمان نسبة هرمون الذكورة بشكل طبيعى.

و لو عاوز تعرف معلومات اكتر عن اضرار حقن هرمون الذكورة نقدر نشوفها من هنا

اما لو عاوز تعرف باقي مشاكل الهرمونات اللى بتسبب تاخر في الانجاب هيكون من هنا

و لو احتجت تتواصل معانا و نحجزلك معاد مع دكتور اسامه محمد البكل مدرس واستشاري طب وجراحة أمراض الذكوره وتأخر الإنجاب والصحة الجنسية بطب القصر العيني ، تقدر تتواصل معانا على الرقم ده 01018874287