هل انسداد القنوات المنوية عند الرجل يسبب العقم وتأخر الانجاب ؟

هل انسداد القنوات المنوية عند الرجل يسبب العقم وتاخر الانجاب ؟

من اكثر المشاكل اللي ممكن تدمر حياة اي راجل هي وجود مشكلة تاثر على قدرته الجنسية او الانجابية ، وفي مشاكل وامراض كثيره ممكن تاثر على قدرة الرجل على الإنجاب زي وجود مشكلة تتعلق بالحيوانات المنوية ، باعتبارها هي المتحكم الأول والرئيسي في إنجاب طفل ، وفي مشاكل ممكن تمنع اصلا خروج الحيوانات المنوية من الخصية وتسبب تأخر في الإنجاب زي وجود انسداد في القنوات المنوية.

مسار خروج الحيوانات المنوية من الخصية وحتى خروجها أثناء القذف:

في البداية لازم تكون عارف ان الخصية هي مصنع الحيوانات المنوية ، وتتكون الخصية من أنابيب بتتصنع جواها الحيوانات المنوية ، وبعد كده بتنتقل للبربخ الموجود ورا الخصية ويعتبر الأنبوبة الأولى اللي بتنتقل ليها الحيوانات المنوية علشان تكمل مراحل تكوينها ونموها ، لحد ما توصل للوعاء الناقل وهناك بتختلط الحيوانات المنوية مع السائل المنوي اللي بتفرزه البروستاتا والحويصلات المنوية ، وبعد كده بتتجمع الحيوانات المنوية مع السائل المنوي في أنبوب آخر يسمي قناة القذف ، علشان يبدأوا يخرجوا من القضيب وقت القذف.

4 أماكن ممكن يحصل فيها انسداد:

وهو ده المسار اللي بيمشي فيه الحيوان المنوي من الخصية ولحد ما يطلع وقت القذف ، وبالتالي لو حصل اي مشكلة في أي جزء من المسار ده سواء في

الأنابيب المنوية.

أو في البربخ.

أو في الوعاء الناقل.

او فى قناة القذف.

هيمنع خروج الحيوانات المنوية انها تختلط بالسائل المنوي وهيؤدي إلى انعدامها وهيسبب تاخر في الانجاب.

ايه هي اسباب انسداد القنوات المنوية ؟

1/ بسبب عدم اكتمال نمو القنوات المنوية : زي اننا نكون اتولدنا بعيب خلقي اتسبب في ان ميكونش عندنا وعاء ناقل اصلا ، وبكدة هيمنع خروج الحيوانات المنوية من الخصية عشان تختلط بالسائل المنوي ويخرجوا وقت القذف وهيسبب تأخر الإنجاب.

2/ الإصابة بعدوى أو التهاب في الجهاز التناسلي : زي التهاب البربخ أو بالبروستاتا أو الحويصلات المنوية.

3/ لو عملنا أي جراحة قبل كدة في الجهاز التناسلي : زي جراحة البروستاتا ممكن تسبب انسداد في القنوات المنوية.

4/ الاصابة ببعض الامراض السرطانية أو التعرض للعلاج الإشعاعي أو الكيماوي : ممكن يسبب انسداد في القنوات المنوية.

ازاي نعالج الانسداد عشان نحل مشكلة تأخر الإنجاب ؟

لازم تكون عارف ان علشان نعالج الانسداد ، لازم الاول نعمل اشعة علشان نحدد فين مكان الانسداد بالضبط هل هو في الانابيب المنوية ولا في الوعاء الناقل ولا فى قناة القذف.

1/ لو كان الانسداد في الانابيب المنوية :

في الحالة دي هنسحب عينة من الخصية بالإبرة علشان نستخرج منها الحيوانات المنوية ونعمل بيها حقن مجهري.

2/ أما لو كان الانسداد في الحبل المنوي :

في الحالة دي هنستخدم الميكروسكوب علشان نعالج الانسداد وبعدها هنوصل الحبل المنوي بالبربخ ، وبكدة الحيوانات المنوية هتخرج وتختلط بالسائل المنوي وهيبقي في فرصة كبيرة ان يحصل حمل طبيعي.

3/ لكن لو كان الانسداد في قناة القذف :

في الحالة دي هنضطر نستخدم المنظار علشان نسلك بيه الانسداد أو نزيل أي أكياس أو حويصلات في البروستاتا ممكن تكون السبب في الانسداد ، وبعدها الحيوانات المنوية هتخرج من القضيب بسهولة وقت القذف وهيحصل حمل بشكل طبيعي.

ولو عايز تعرف ايه هي حالات انعدام الحيوانات المنوية اللي قابلة للعلاج ومش هتحتاج تعمل تفتيش ميكروسكوبي من الخصية ، اسمع الفيديو ده مع الدكتور اسامة البكل…

خلاصة القول

في النهاية ، لازم تكون عارف ان لو عندك انعدام في الحيوانات المنوية و تأخر في الإنجاب نتيجة وجود انسداد سواء كان الانسداد ده في القنوات المنوية أو في الحبل المنوي أو في قناة القذف ، اوعى تفقد الأمل وتجري بسرعة على الحقن المجهري ، لان لسه عندك فرصة تعالج فيها الانسداد وتخرج الحيوانات المنوية وقت القذف ويحصل حمل طبيعي ويكون عندك اطفال.

ولو احتاجت تتابع معانا حل مشكلتك تواصل مع الفريق الطبي علي الرقم ده 01018874287 وهما هيجاوبوا علي كل اسئلتك ، او ممكن تطلب منهم تحديد ميعاد مع الدكتور اسامة محمد البكل مدرس واستشاري طب وجراحة أمراض الذكورة وتأخر الإنجاب والصحة الجنسية بطب القصر العيني.