هل الحقن المجهري بديل لعملية دوالي الخصية؟

هل الحقن المجهري بديل لعملية دوالي الخصية ؟

لو عندك دوالي على الخصية وبتخطط لعملية الحقن المجهري ، فاحب اقولك انك لازم تعمل عملية دوالي الخصية الأول.

لان دوالي الخصية هتحسن من وظيفة الخصية وممكن يحصل حمل طبيعي من غير حتي ما نلجأ للحقن المجهري ، و حتى لو لجأنا للحقن المجهري ، فبرضوه عملية دوالي الخصية هترفع من نسب نجاح عملية الحقن المجهري.

ايه هي أهمية عملية دوالي الخصية في عصر الحقن المجهري اللي احنا عايشين فيه ؟

بعض الناس تخيلت في وجود الحقن المجهري أن ممكن عملية دوالي الخصية تصبح شئ من الماضي أو أنها تبقي حل بس للناس اللي بتدور علي الحمل الطبيعي ، لكن اللي مستعجل هيروح يعمل الحقن المجهري علي طول.

ولكن كل ده مفهوم خطأ تماما ، لأن دوالي الخصية مهمة جدا جدا جدا وبالذات لو كانت كبيرة ومؤثرة قبل ما نروح للحقن المجهري ، ليه ؟

لو دوالي الخصية هي السبب الرئيسي في المشكلة

وممكن بعد ما نعمل عملية الدوالي يحصل حمل طبيعي ومنلجأش للحقن المجهري ، بالتالي فعالية الفلوس اللي هتدفع أعلى بكثير ، لأن في الحقن المجهري هتدفع رقم أكبر بكثير من عملية الدوالي وفي الآخر احتمال الحقن ينجح واحتمال يفشل وفرص نجاحه لا تتجاوز الـ 50% في أفضل المراكز الموجودة في مصر وبره مصر.

لكن دوالي الخصية لو فعلا كبيرة ومؤثرة ف فرص نجاح العملية تتجاوز الـ 70% بالتالي فرص نجاح اكبر ومستمر ، يعني ايه ؟

يعني تحليل السائل المنوي بتاعك لو اتحسن ممكن يحصل حمل طبيعي مرة واثنين وثلاثة وأربعة ، لكن الحقن المجهري لو نجح فالحمل خلاص هيحصل مرة واحدة بس.

ولو في دوالي على الخصية كبيرة ومؤثرة بس تحليل السائل المنوي ظاهرياً كويس من حيث العدد والحركة والتشوهات ،

في حاجة اسمها تحليل تفتت المادة الوراثية في السائل المنوي ده بيحدد جودة الحيوانات المنوية عاملة أي ، فنسبة التفتت لو مرتفعة فوق ال 30% فده معناه ان دوالي الخصية مأثرة ولو معملناش العملية قبل اللجوء للحقن المجهري بفترة كبيرة وكافية لاتقل عن 3-6 شهور ، فرص نجاح الحقن المجهري هتبقى قليلة جداً.

ودلوقتي تعالوا نتكلم عن تفتت المادة الوراثية وجودة الحيوانات المنوية :

في البداية لازم تكون عارف أن ده تحليل بيحدد جودة الحيوانات المنوية وجودة الحمض النووي الموجود في رأس الحيوان المنوي ، وده بيحدد فرص حدوث حمل طبيعي وفرص نجاح الحقن المجهري وفرص أن الحمل يستمر وميحصلش سقط مبكر ، لأن طبيعي أن نسب التفتت تكون أقل من 15% وأقصى رقم مقبول هو 25-30% واي رقم فوق 30% فده بيقول أن فرص حدوث الحمل هتبقي ضعيفة وفرص نجاح الحقن المجهري هتبقي ضعيفة ولو حصل حمل طبيعي او حمل بحقن مجهري هيحصل سقط مبكر في أول 3 شهور من الحمل وده أحد أسباب السقط المتكرر ، لأن أغلب الناس مقتنعة أن السقط المتكرر بيكون ليه علاقة بالزوجة فقط ، ولكن تفتت المادة الوراثية عند الزوج هو أحد أسباب السقط المتكرر.

طب ايه هي اسباب ارتفاع نسبة تفتت المادة الوراثية في السائل المنوي :

دوالي الخصية ليست السبب الوحيد ولا السبب الأشهر لحدوث ارتفاع نسب التفتت ، لأن في أسباب تانية كثير أهمها :

• التدخين.
• وجود التهابات في مسار خروج السائل المنوي في البروستاتا والحويصلات المنوية.
• بعض الوظائف زي التعرض للإشعاع فترات طويلة.

دي كلها حاجات بتأثر على تفتت المادة الوراثية ولكن الأشهر طبعا وجود دوالي الخصية أو التدخين أو وجود الالتهابات ، ودي حاجة لازم نعالجها قبل ما نروح للحقن المجهري ، ولذلك كانت عملية دوالي الخصية أساسية قبل ما نروح للحقن المجهري فى وجود ارتفاع لتفتت المادة الوراثية سواء علشان يحصل حمل طبيعي او نضمن نجاح الحقن المجهري بنسبة كبيرة ، بالتالي النقطة المهمة وإجمالا للكلام اللي قولناه ، هل دوالي الخصية هتختفي أو دورها هيقل في عصر الحقن المجهري اللي احنا فيه ؟

خلاصة القول

طبعاً لا لأن دوالي الخصية لو هي السبب الرئيسي فممكن بعد ما نعملها يحصل حمل طبيعي ، والدوالي لو مأثرة فلازم اعملها قبل ما اعمل الحقن المجهري حتى لو معايير تحليل السائل المنوي مش هتتحسن ، يعني في بعض المرضى ممكن العدد والحركة ميتحسنوش بس نسبة تفتت المادة الوراثية في السائل المنوي تتحسن ، فبالتالي فرص حدوث نجاح الحقن المجهري تتحسن جداً جداً بعد عملية دوالي الخصية ، فبالتالي الدوالي لازم تتعمل لو كانت كبيرة قبل ما نروح نعمل حقن مجهري ، لان دي حاجة أساسية جداً لنجاح الحقن المجهري.

ولو عندك اي استفسار عن عملية دوالي الخصية ، ممكن تبعت لنا على رسائل الصفحه او من خلال الواتساب 01018874287.

دكتور اسامة محمد البكل مدرس واستشاري طب وجراحة أمراض الذكورة وتأخر الإنجاب والصحة الجنسية بطب القصر العيني