طرق علاج ضعف حركة الحيوان المنوى

طرق علاج ضعف حركة الحيوان المنوى

مشكلة ضعف حركة الحيوانات المنوية بقت من المشاكل اللي بتسبب تأخير في حلم الأبوة عند الرجال ، وده لأنها بتأثر بشكل كبير على قدرة الحيوان المنوي على الوصول للبويضة وتخصيبها.

ومش عشان قولنا مشكلة يبقي ملهاش علاج ، بفضل الله ثم التقدم العلمي اللي بقي موجود دلوقتي في مجال الطب ، بقت أي مشكلة لها علاج.

بس قبل ما نعرف العلاج ، تعالوا نعرف

ايه هى الاعراض او ازاي بيتم تشخيص المريض اللي بيعاني من ضعف حركة الحيوانات المنوية.

التشخيص

أول حاجة لازم نعرفها إن مفيش أعراض واضحة بتدل على ضعف حركة الحيوانات المنوية، والمشكلة دي غالباً بنكتشفها لما الزوج والزوجة يشتكوا من تأخر الإنجاب ، و وقتها بنطلب من الزوج يعمل تحليل للسائل المنوى ومن خلال التحليل بنحدد

معايير تحليل السائل المنوي

1. شكل الحيوانات المنوية

و لازم على الأقل يكون 4% من الحيوانات المنوية شكلها طبيعي

2. عدد الحيوانات المنوية

وعدد الحيوانات المنويه لازم يكون أكتر من 15 مليون حيوان منوي لكل ملليلتر من السائل المنوي في القذف الواحد عشان ميكونش عندنا نقص فى عدد الحيوانا المنوية

3. معدلات حركة الحيوانات المنوية

و معدلات حركة الحيوانات المنوية ، و لازم تكون الحركة التقدمية للحيوانات المنوية حوالي 32%. والحركة الاجمالية اكتر من 40 % ، لو أي من النسب دي كانت أقل من الطبيعي، بنشخص الحالة كضعف في حركة الحيوانات المنوية، وده بيقلل من فرصة تخصيب البويضة و ده بيقلل من فرصة ان الحمل يحصل بشكل طبيعي

ومن خلال المعايير دي بيتحدد على اساسها اذا كانت العينة طبيعية ولا لا .

ولو لسه عايز تعرف معلومات اكثر عن حركة الحيوان المنوي الطبيعية علشان يحصل حمل ، اسمع الفيديو ده مع الدكتور اسامة البكل.

علاج ضعف حركة الحيوانات المنوية

نيجي بقي لعلاج ضعف حركة الحيوانات المنوية و اللى بيختلف على حسب السبب

الأسباب المكتسبة وعلاجها

فلو كان ضعف حركة الحيوانات المنوية حصل لأسباب مكتسبة زى :

1. دوالي الخصية

دوالي الخصية ، العلاج هيكون عن طريق ربط الدوالي و علاجها بالجراحة الميكروسكوبية، وده بيحسن من حركة الحيوانات المنوية في خلال من 3 الي 6 شهور بعد العملية .

2. التدخين

التدخين ، فوقتها بننصح المريض بأنه يمتنع عن التدخين، لأنه بيأثر بشكل سلبى على حركة وجودة الحيوانات المنوية.

3. التعرض للسموم

التعرض للسموم ، هنا بننصح المريض انه يغير البيئة اللي حواليه و اللى بتخلية بتعرض للتلوث والسموم اللي بتأثر على الحيوانات المنوية .

4. الخلل الهرموني

و لو السبب كان خلل في الهرمونات ، فالعلاج هنا هو ادوية منشطة للخصية و لتظبيط مستوى الهرمونات

5. الالتهابات

او لو فى التهابات أو صديد في السائل المنوي ، هنا بنطلب من المريض يعمل مزرعة سائل منوي عشان نتأكد من وجود التهابات و صديد و نحدد نوع الميكروب ونختار المضاد الحيوي المناسب اللى نقدر نعالج بيه الالتهابات.

الأسباب الجينية

اما لو كان كان ضعف حركة الحيوانات المنوية حصل لأسباب جينية:

فالحالات دي ، في الاغلب مفيش علاج مباشر نقدر نعالج بيه ضعف حركة الحيوانات المنوية، و ممكن نلجأ للحقن المجهري عشان نحقق حلم المريض ده انه يكون عنده طفل .

هل يمكن حدوث حمل طبيعي مع ضعف حركة الحيوانات المنوية؟

طيب هو ممكن يحصل حمل طبيعي من غير منعالج ضعف حركة الحيوانات المنويه ؟

هقولك ان علشان يحصل حمل بشكل طبيعي لازم يكون عدد الحيوانات المنوية طبيعي وانها تكون قادرة تمشي بشكل طبيعي وتسبح علشان توصل للبويضه ويحصل تلقيح واخصاب ، علشان كدة مش هيحصل حمل بشكل طبيعي في اغلب الحالات لو كانت حركة الحيوانات المنوية غير طبيعية أو بطيئة ، بس دلوقتي بقي موجود طرق علاج لتحسين حركة الحيوانات المنوية وجودتها و الوصول للحمل سواء كان حمل طبيعي او حقن مجهري .

أهمية العلاج قبل الحقن المجهري

و ده مش معناه اننا ممكن نعمل حقن المجهري على طول من غير منعالج ضعف حركة الحيوانات المنويه ، و ده لأن استخدام حيوان منوي ضعيف في الحركة هيقلل من فرصة نجاح الحقن المجهري ، و الحيوان المنوي لازم يكون فيه حركة وحيوية ومفيهوش تشوهات عشان يزيد من فرص التلقيح السليم للبويضة وتكوين جنين .

ولو عايز تعرف امتي بيحصل حمل وتحسن في تحليل السائل المنوي بعد عملية دوالي الخصية ، اسمع الفيديو ده مع الدكتور اسامة البكل..

ودلوقتي لو عايز تعرف معلومات عن نقص عدد الحيوانات المنوية وأسبابها ممكن تضغط هنا…