يعنى اى انسداد فى القنوات المنوية ، و اى أسبابه ؟
يعنى اى انسداد فى القنوات المنوية ، و اى أسبابه ؟
لو تشخصت إن عندك انعدام في الحيوانات المنوية، مش شرط تكون عندك مشاكل في الخصية أو لخبطة في الهرمونات ، ممكن الخصية تكون سليمة وبتنتج حيوانات منوية بشكل طبيعي، والهرمونات تكون طبيعية، لكن يكون عندك انسداد فى القنوات المنويه هو اللي مانع ان الحيوانات المنوية تخرج من الخصية وتختلط بالسائل المنوي وقت القذف، وده هو السبب في انعدام الحيوانات المنوية.
ولو لسه عايزين تعرفوا معلومات أكثر عن شروط تحليل السائل المنوي ، اسمع الفيديو ده من الدكتور اسامة البكل….
رحلة الحيوان المنوي
و عشان نفهم الكلام ده اكتر تعالوا نشوف مع بعض رحلة الحيوان المنوي :
رحلة الحيوان المنوى بتبدأ من الخصية ، وهي مصنع الحيوانات المنوية ، بتتكون الحيوانات المنوية في أنابيب داخل الخصية بعد كده، الحيوانات المنوية بتنتقل إلى البربخ ، اللي هو موجود ورا الخصية ، وهناك بتكتمل مراحل نموها و تكوينها ، بعد كده، تنتقل للحبل المنوي و بتختلط مع السائل المنوي اللي بتفرزه البروستاتا والحويصلة المنوية ، وفي النهاية بتتجمع الحيوانات المنوية و السائل المنوى في قناة القذف ويخرجوا من القضيب وقت القذف.
المسار الطبيعي للحيوان المنوي
- الخصية: مصنع الحيوانات المنوية - تكوين الحيوانات المنوية في الأنابيب الداخلية
- البربخ: اكتمال مراحل النمو والتكوين
- الحبل المنوي: الانتقال والاختلاط مع السائل المنوي
- البروستاتا والحويصلة المنوية: إفراز السائل المنوي
- قناة القذف: التجمع والخروج من القضيب
كده احنا عرفنا المسار الطبيعي اللي بيمشي فيه الحيوان المنوي من وقت ما بيطلع من الخصية ولحد ما بيخرج وقت القذف ، وده معناه ان لو في اي انسداد في جزء من الطريق اللي بيمشي فيه الحيوان المنوي كدة الحيوان المنوي مش هيخرج بره الخصية ولا هيختلط بالسائل المنوي ، وده هيتسبب فى انعدام الحيوانات المنوية .
أماكن الانسداد المحتملة
الانسداد ده ممكن يكون في :
- الأنابيب اللي بتنقل الحيوانات المنوية.
- البربخ.
- الحبل المنوي.
- قناة القذف.
أسباب انسداد القنوات المنوية
طب ايه هي اسباب انسداد القنوات المنوية ؟؟
1. العيوب الخلقية
الانسداد بسبب عيب خلقي، و ده معناه انه ممكن يكون معندناش حبل منوي أصلاً ، و ده اللى بيكون مسؤول عن نقل الحيوانات المنوية خارج الخصية، وده هيخلى الحيوانات المنوية تفضل جوا الخصية ومش هتطلع بره .
2. العدوى والالتهابات
الإصابة بعدوى أو التهاب في الجهاز التناسلي، زي الأمراض المنقولة جنسياً، و اللي بتسبب التهاب في البربخ او البروستاتا و الحويصلات المنوية.
3. الجراحات السابقة
او لو عملنا جراحات قبل كده زي جراحة الفتق أو البروستاتا ، و اللى ممكن تتسبب في ندبات تؤدي لانسداد القنوات التناسلية.
أنواع انسداد القنوات المنوية
و دلوقتى بعد ما عرفنا الاسباب خلونا كمان نعرف اننا عندنا نوعين من انسداد القنوات المنوية و هما :
النوع الأول: الانسداد الميكانيكي (الفعلي)
انسداد ميكانيكي او (فعلي) و ده معناه ان الانسداد ممكن يكون :
أ. الانسداد داخل الخصية
جوا الخصية ده معناه ان الانسداد حصل جوا الأنابيب الدقيقة في الخصية، اللي بتنقل الحيوانات المنوية من مكان إنتاجها للقنوات التانية ، و ده ممكن يحصلنا بسبب الالتهابات الشديدة لانها بتكون ندبات أو بسبب إلاصابات.
ب. الانسداد في البربخ
او ان الانسداد يكون في البربخ ، و ده عباره عن قناة اللي بتخزن فيها الحيوانات المنوية لحد نموها ما يكتمل ، و بعد كده بتتنقل للأوعية الناقلة للمني ، و اللى ممكن يحصل انسداد فيه بسبب الالتهابات أو الإصابات .
ج. الانسداد في الأوعية الناقلة للمني
و الاانسداد ممكن يكون كمان في الأوعية الناقلة للمني ، دي القنوات اللي بتنقل الحيوانات المنوية من البربخ لقنوات القذف ، الانسداد هنا ممكن يحصل بسبب العمليات الجراحيه زى ما قولنا من شويه أو بسبب عيوب خلقية.
د. الانسداد في قناة القذف
و اخيرا انسداد في قناة القذف ، و القناة دى اللي بتجمع الحيوانات المنوية من الحويصلات المنوية والبروستاتا وبتخرجها مع السائل المنوي ، و الانسداد هنا ممكن يحصل بسبب الندبات او الأورام، أو بسبب التهابات شديدة.
النوع الثاني: الانسداد الوظيفي
و النوع التانى من الانسداد هو الانسداد الوظيفي و ده بيحصل بسبب :
أ. القذف العكسي
القذف العكسي وده معناه ان السائل المنوى بدل ما بيخرج من القضيب وقت القذف ، بيرجع تانى للمثانة ، و ده بيحصل بسبب مشكلة في عضلات عنق المثانة .
ب. الاضطرابات العصبية
او بسبب اضطرابات او مشاكل عصبية ، ممكن تأثر على عملية القذف وتمنع خروج السائل المنوي بشكل طبيعي .
ج. مشاكل البروستاتا والغدد المساعدة
مشاكل او خلل في البروستاتا أو الغدد المساعدة ، وده ممكن يقلل من إنتاج السائل المنوي ويظهر كأنه انسداد وظيفي .
علاج انسداد القنوات المنوية
بعد ما عرفنا الانسداد وأسبابه تعالوا دلوقتي بقي نتكلم عن علاج انسداد القنوات المنوية
التشخيص والتحديد
في الاول لازم نعمل اشعة علشان نحدد مكان الانسداد فين بالظبط ونشوف هل هنقدر نصلح الانسداد ولا هنضطر ناخد عينة من الخصية ، و العينه هنا فى الاغلب بتكون عن طريق السحب بالابرة و دي عملية بسيطة بتحتاج تخدير موضعي فقط و لو عاوزين تعرفوا عنها معلومات اكتر هتلاقوا كل تفاصيلها هنا " سحب العينه بالإبره " ، و بالاجراء ده بنقدر اننا نطلع من الخصية حيوانات منوية ونعمل بيها حقن مجهري.
خيارات العلاج حسب مكان الانسداد
و تعالوا دلوقتى نعرف امتى بنلجأ لاننا نصلح الانسداد و امتى بنعمل سحب عينه بالابره
1. الانسداد في القنوات المنوية
إذا كان الانسداد في القنوات المنوية ، هنا هنضطر اننا ناخد عينة من الخصية بالابره ونستخرج الحيوانات المنوية من الأنسجة ونعمل بها حقن مجهري.
2. الانسداد في الحبل المنوي
لكن لو الانسداد كان في الحبل المنوي ، وقتها هنستخدم الميكروسكوب الجراحي عشان نعالج الانسداد او ممكن اننا نوصل الحبل المنوى بالبربخ و بكده هتخرج الحيوانات المنوية بشكل طبيعي في القذف.
3. الانسداد في قناة القذف
إذا كان الانسداد في قناة القذف ، هنا بنستخدم المنظار عشان نسلك الانسداد، وبعدها بتبدأ الحيوانات المنوية تظهر في السائل المنوي ، و يحصل الحمل بشكل طبيعي .
لو عايزين تعرفوا اكتر عن انعدام الحيوانات المنويه اضغطوا هنا
التعليقات
لا توجد تعليقات حتى الآن. كن أول من يعلق!