أسباب نقص عدد الحيوانات المنوية وتأثيرها على تأخر الإنجاب

أسباب نقص عدد الحيوانات المنوية وتأثيرها على تأخر الإنجاب

اسباب تاخر الانجاب كتير و بتختلف من شخص للتانى ، وممكن يكون السبب فى انعدام الحيوانات المنويه اما ضعف حركة الحيوانات المنوية أو تشوه في الشكل الطبيعى للحيوان المنوي، او نقص فى عدد الحيوانات المنوية

وده اللى هنتكلم عنه انهادره و هو نقص عدد الحيوانات المنوية

ما هو نقص عدد الحيوانات المنوية؟

و ده معناه ان فى انخفاض فى عدد الحيوانات المنوية عن المعدل الطبيعي، و اللى هو 15 مليون حيوان منوي لكل ملليلتر من السائل المنوي في عملية القذاف الواحدة ،

و خلينا هنا نعرف حاجة ان فى الطبيعي الشخص اللي مش بيعاني من نقص في عدد الحيوانات المنوية ، بيقدر انه يخرج من 80 إلى 300 مليون حيوان منوي في عملية القذف الواحدة .

درجات نقص عدد الحيوانات المنوية

و دلوقتى بعد ما عرفنا اى هو العدد الطبيعى للحيوانات المنوية ، خلونا نعرف اى هى درجات نقص عدد الحيوانات المنوية

و خلونا نقسم درجات نقص عدد الحيوانات المنوية لدرجتين :

1. النقص البسيط

النقص البسيط ، و هنا عدد الحيوانات المنوية بيكون اكتر من 5 مليون حيوان منوي لكل ملليلتر من السائل المنوي في عملية القذف الواحدة .

2. النقص الشديد

النقص الشديد ، و اللى بيكون فيها عدد الحيوانات المنوية أقل من 5 مليون حيوان منوي لكل ملليلتر من السائل المنوي في عملية القذف الواحدة .

أسباب نقص عدد الحيوانات المنوية

وبعد ما عرفنا ايه هو نقص عدد الحيوانات المنوية ، للاسباب اللي ادت الي نقص العدد

نيجي بقي لاسباب نقص عدد الحيوانات المنوية ، و هنقسمهم لنوعين

الأسباب الجينية

أسباب جينية و دى معناها ان فى عيب خلقي أو مشكله في الخصية بتأثر على إنتاجها للحيوانات المنوية.

الأسباب المكتسبة

أسباب مكتسبة ، و دى معناه ان فى امراض او مشاكل صحية اتسببت فى نقص عدد الحيوانات المنوى ، زى

1. دوالي الخصيتين

دوالي الخصيتين ، و دى من أكتر المشاكل المنتشرة عند الرجال ، و هى عبارة عن تمدد في الاوردة اللى بتكون حوالين الخصية بسبب ضعف في الانسجة الضامة و تلف الصمامات الموجودة في الاوردة ، و الصمامات دى هى اللى بتكون مسؤوله عن منع الدم من انه يرجع مره تانية للخصية ، بعد ما يكون بدأ انه يتحرك في اتجاه القلب ، فلما الصمامات دي بتضعف الدم هيبدأ داخل الأوردة ويؤدي إلى تضخمها ، وبالتالي تضعف وظيفة الخصية عن انتاج الحيوانات المنوية.

2. الالتهابات والعدوى

الالتهابات أو العدوى في الجهاز التناسلي ، زى التهاب الخصية أو البربخ أو الأمراض المنقولة جنسيًا، كل الامراض دى بتأثر على كفاءة إنتاج الحيوانات المنوية و جودتها ، و كمان بتسبب نقص شديد او انعدام فى الحيوانات المنوية .

3. القذف المرتجع

لو كان عندنا قذف مرتجع وده معناه ان السائل المنوى مش بيخرج وقت القذف من القضيب ، و بيرجع للمثانه ، و السبب فى ده ان في عضلة صغيرة في عنق المثانة ، و اللى وقت القذف بتتقفل عشان تمنع دخول السائل المنوي للمثانه ، بس في بعض الحالات بيحصل ضعف في عضلة المثانة و اللى ممكن يحصل بسبب مشكلات عصبية أو عضلية ، ساعتها فتحة المثانة مش هتتقفل وهيدخل السائل المنوي فيها للمثانه وقت القذف بدل ما يطلع فى القضيب، و كل ده هيسبب مشكلة في السائل المنوي ، و نقص في كمية السائل المنوي و عدد الحيوانات المنوية .

4. تكوين أجسام مضادة

تكوين أجسام مضادة ، و هنا جهاز المناعة بيهاجم الحيوانات المنوية باعتبارها أجسام غريبة، و بيفرز مضادات اكسدة هتتسبب في موت الحيوانات المنوية وقلة عددها.

5. الخصية المعلقة

الخصية المعلقة ، و ده اختلاف خلقى بيحصل للأطفال الذكور بعد الولادة مباشرة، و هنا الخصية مش بتنزل لكيس الصفن و بتفضل متعلقة فى البطن او المنطقة الارابية ، و اللى لازم نعالجها قبل بلوغ الطفل عمر سنة ونصف علي يد جراح متخصص و كل ما هنتأخر في انزال الخصية كل ما زادت فرصه اننا نوصل لانعدام في الحيوانات المنوية وده هيسبب مشكلة في الإنجاب

6. الخلل الهرموني

الخلل الهرموني ، و ده عباره عن خلل فى نسبة هرمون الذكورة أو هرمون الأنوثة ، و اللى بيكون سبب فى ان يحصل قصور في وظيفة الغدد التناسلية و ده هيأثر على إنتاج وجودة الحيوانات المنوية.

7. العمليات الجراحية

لو عملنا بعض العمليات الجراحية زى عمليات البروستاتا أو علاج الخصيتين ، ده ممكن يأثر على جودة الحيوانات المنوية.

8. انسداد القنوات المنوية

لو عندنا انسداد في القنوات المنوية أو الحبل المنوي ، ده هيمنع خروج الحيوانات المنوية واختلاطها مع السائل المنوي وقت عملية القذف ، و ده هيتسبب فى نقص عدد الحيوانات المنويه او انعدامها.

9. التدخين

التدخين وده لان مادة النيكوتين اللى موجوده فى السجاير بتعمل ضيق في الأوعية الدموية الموصلة للعضو الذكري ، وده بيقلل من تدفق الدم إلى القضيب ، و بياثر كمان على الصحة الإنجابية عند الرجال لانه بيقلل من وظيفة الخصية في تصنيع الحيوانات المنوية.

10. السمنة المفرطة

السمنة المفرطة ، و ده لانها بتأثر على مستويات هرمون الذكورة و بتزود من مستويات هرمون الانوثة وده هيأثر على الحيوانات المنوية.

11. العلاج الكيماوي

التعرض للعلاج الكيماوي بسبب الاصابة بالامراض السرطانيه ، لان ده بيأثر على انتاج الخصية للحيوانات المنوية ، و عشان كده يفضل اننا نعمل تجميد للحيوانات المنوية لو كنا هنتعرض للعلاج الكيميائى او الاشعاعى قبل بداية العلاج عشان نستخدمها في عمليات الحقن المجهري.

رسالة أمل

واخيرا لازم متفقدش الامل في العلاج ، لان الامل هيفضل موجود وهتقدر تخلف وتجيب اطفال حتي لو انت بتعاني من صفر حيوانات منوية.

ولو عايزين تعرفوا ايه الحل للحالات اللي بتعاني من نقص في عدد الحيوانات المنوية ، اسمع الفيديو ده مع الدكتور اسامة البكل…..

لو عايزين تعرفوا علاج نقص عدد الحيوانات المنوية اضغط هنا…