معيار تشخيص سرعة القذف
فى البداية خلينا نتفق ان سرعة القذف مرض زى اى مرض وله علاج، بس المهم اننا نتأكد اننا فعلا عندنا سرعة فى القذف، لان مش كل اللي بيشتكي من سرعة قذف بيبقى عنده فعلا سرعة فى القذف.
خلينى هنا اوضح نقطة مهمه انت ممكن تكون فاهمها غلط نتيجة لمعلومة سمعتها او شوفتها على الانترنت ان الطبيعي ان العلاقة الزوجية تستمر لنص ساعه او ساعه، غير كده يبقى عندك سرعة قذف، و الكلام ده مش صح ابدا.
المعيار الطبي الصحيح: عشان نقول ان انا عندى سرعة قذف، يبقى لازم القذف ده يكون بيحصل بعد أقل من دقيقتين من الايلاج، او بمعنى تانى ان يحصل القذف قبل ما نكون وصلنا للاستمتاع المطلوب بالعلاقة.
مثال مهم: لو العلاقة الجنسية مثلا استمرت دقيقتين بس، و فى الوقت ده انت و زوجتك وصلتم للنشوه الجنسية يبقى كده مفيش سرعه قذف.
انواع سرعة القذف
تعالوا بقى دلوقت نعرف انواع و اسباب و علاج سرعة القذف. اولاّ: بالنسبة لانواع سرعة القذف عندنا نوعين:
قذف سريع اولى
و ده معناه ان من وقت ما بدأنا نمارس العلاقة الجنسية و بيحصل قذف سريع، او حتى ممكن يحصل أثناء المداعبة في كل مرة بنعمل فيها علاقة جنسية
قذف سريع ثانوى
و المقصود بيها أن في بداية ممارستك للعلاقة الزوجية كان الوقت طبيعى و القذف كان بيحصل بعد مابنوصل للنشوه الجنسية، لكن كل ده اتغير و بقى بيحصل قذف سريع
شروط التشخيص:
- لازم ده يكون بيحصل بقاله 6 شهور
- و خلال الوقت ده لازم نكون بنعمل العلاقة الزوجية بشكل منتظم
- و ان يحصل في اكثر من نصف مرات العلاقة الزوجية سرعة فى القذف
طب ايه هى اصلا الاسباب اللى تخلى يحصل سرعة فى القذف ؟
في أسباب عضوية زى:
1. زيادة حساسية الأعصاب فى القضيب
و ده بيكون بسبب خلل جينى فى الاعصاب، بيخلى احساسها زيادة عن الطبيعى، فلما بنتعرض للإثارة الجنسية او اى احتكاك فى العضو بيحصل قذف
2. التهاب فى الغدد التناسلية (الحويصلة المنوىه او البروستاتا)
و هنا لازم هنحس بحرقان وقت القذف او وقت التبول، ووقتها لازم نعالج الالتهاب ده و بعدين نحكم لو لسه فى سرعة فى القذف، ولازم هنا ناخد بالنا من نقطه مهمه عشان بسمعها كتير ان التهاب البروستاتا ملوش علاقة بضعف الانتصاب
4. مرض السكر او مشاكل فى الغدة الدرقية
الأمراض المزمنة تؤثر على الوظيفة الجنسية
وفى كمان أسباب نفسية زى:
مشاكل فى الشغل أو الخوف و القلق المستمر
من أن الزوجة متكنش راضية عن العلاقة الزوجية، او لو حصل مره سرعة قذف فى العلاقة الزوجية، فضلنا نفكر فيها و نفكر هو ده ممكن يحصل تاني، و هنا هقولك اه هيحصل بسبب التوتر و كتر التفكير و أنك كده بتحول العلاقة الزوجية من مصدر متعه لمصدر قلق و توتر
أسباب آخري خارجية:
عدم انتظام العلاقة الزوجية
و لو مش بنمارس العلاقة الزوجية بشكل منتظم، و بنبعد عنها لفترة طويلة
ختان الزوجة
و فى سبب كمان ملهوش علاقة بيك وهو ختان الزوجة: اوقات بيكون ختان الزوجة سبب فى اننا نقول ان عندنا سرعة فى القذف، خصوصاّ لو عملية الختان تمت بطريقة غلط و اتشال جزء أكبر من اللازم من (البظر)، ده هيسبب ان الزوجة توصل للنشوه الجنسية بعد مده طويله
تأثير سرعة القذف على الزوجين
و هنا خلينى اقولك معلومه، ان سرعة القذف مش بتضايقك لوحدك هى كمان بتضايق زوجتك وده لسببين:
- لو القذف حصل قبل ما توصل الزوجة للنشوه الجنسية ده هيخليها مش راضية عن العلاقة الزوجية وده اكيد هيأثر عليك و على حالتك النفسية و يخليك تبعد عن العلاقة الزوجية، وتمارسها على فترات بعيده و ده هيزود سرعه القذف اكتر زى ما اتكلمنا عنها في الأسباب فالمشكلة تكبر
- و كمان بسبب سرعة القذف هتلاقى انك بتبعد عن المداعبة عشان خايف ان يحصل قذف قبل الايلاج، و ده اكيد هيأثر على استمتاع الزوجة
دلوقتى بعد ما اتكلمنا عن اسباب و انواع سرعة القذف تعالوا نتكلم بقى عن العلاج
العلاج السلوكى
و ده بيكون عباره عن اننا نعمل شويه تمارين وقت العلاقة، أو أننا نوقف العلاقة لمدة ثوانى بس عشان نقلل الاثاره الجنسية و نرجع بعدها نكمل العلاقة الزوجية، و كده هنكون أخرنا القذف
العلاقة المنتظمة
لازم نمارس العلاقة الزوجية بشكل منتظم، و ميكنش فى فتره طويله بين كل مرة و التانية
العلاج الدوائي
و ده بيكون عباره عن اقراص ممكن ناخدها كل يوم وفي أنواع تانية بتتاخد قبل العلاقة الزوجية
الواقي الذكري
ممكن كمان نستخدم واقى ذكرى، و ده عشان نقلل الاحساس شويه عن العضو فيتأخر القذف
حقن الفيلر
ودى بنحقنها فى اخر جزء فى رأس العضو و بتفيد فى حاجتين: الفيلر هيععمل طبقة عازله بين الاعصاب و القضيب فبتزود من وقت الوصول للأثاره الجنسية، و بكده هتأخر القذف. و كمان هيزود حجم رأس العضو، و ده بيزود الاستمتاع فى العلاقة الزوجية
ده يعتبر حل أخير في الحالات اللى محصلهاش استجابة فى كل الطرق العلاجية اللى اتكلمنا عنها، لانه بيكون مكلف، وبيحتاج أننا نعيب الحقن كل 9 شهور او كل سنة ونصف وفي مرضى بردو مش بيحقق معاهم نتيجة
تحذيرات مهمة حول الكريمات والاسبراي المخدر
و هنا لازم ناخد بالنا من حاجة مهمه جدا، اكيد سمعتها من ناس كتير انك ممكن تستخدم اسبراي او كريم مخدر، و هنا لازم نسأل الدكتور عن ازاى ممكن نستخدمه، و ايه هى احسن انواعه، ولازم نبعد عن الأنواع مجهولة المصدر اللى بنشوف إعلاناتها كتير على الانترنت.
لأننا لو استخدمنا انواع مش معروفة و استخدمناها بطريقة غلط ممكن يحصل:
حساسية لجلد العضو
تخدير العضو بدرجه كبيره
ممكن بيقلل الاحساس فمش هنحس بالاثاره الجنسية وده اللى بيأخر القذف، و كمان هيأثر على الانتصاب
انتقال المخدر للزوجة
المخدر ممكن يتنقل للزوجة، و ده هيسبب تخدير للمهبل و يخلى الزوجه متحسش بالعلاقة الزوجية