ما هي مضاعفات دوالي الخصية؟
دوالي الخصية من أكثر المشاكل اللي بيعاني منها نسبة كبيرة من الرجال تصل إلى 15%، وده طبعاً بياخدنا لخطر أكبر لو أهملنا دوالي الخصية ومعالجناهاش، لأن مضاعفات دوالي الخصية ممكن توصل إلى العقم التام، وده اللي أثبتته الإحصائيات أن حوالي 40% من الرجال اللي بيعانوا من العقم أو تأخر بيكون السبب الرئيسي هو دوالي الخصية والنسبة دي ممكن تزيد وتصل لـ 80% في حالات العقم الثانوي.
ما هي دوالي الخصية:
ودلوقتي تعالوا نعرف مع بعض إيه هي دوالي الخصية:
دوالي الخصية هي عبارة عن تضخم في الأوردة المحيطة بالخصية والموجود داخل كيس الصفن والتضخم ده بيحصل نتيجة لضعف الصمامات الموجودة في الأوردة واللي بتكون مسؤولة عن تنظيم تدفق الدم من الخصيتين إلى القلب ومنع عودته تاني للخصية بعد تدفقه، فلما بيحصل أي خلل أو ضعف في الصمامات دي، ساعتها الدم اللي طالع من الخصية في اتجاه القلب، هيرجع تاني للخصية وهيفضل يتراكم داخل الأوردة، وهو ده اللي بيسبب دوالي الخصيتين.
أسباب دوالي الخصية:
ولازم تكون عارف أن الدوالي ممكن تحصل لأسباب كثير جداً، زي:
1. العامل الوراثي:
أنها تكون وراثية، بمعنى أن ممكن يكون في تاريخ مرضي في العائلة في الإصابة بدوالي الخصية.
2. ضعف الأنسجة الضامة:
أو ضعف عام بالأنسجة الضامة بالجسم، بمعنى أن ضعف الأنسجة الضامة ممكن تحصل نتيجة لأسباب وراثية وده بيخليها تفقد قدرتها على دعم الأوردة والحفاظ على كفاءتها، وبيؤدي لارتجاع الدم وتراكمه، مما يسبب ظهور الدوالي.
3. التعرض لدرجات حرارة عالية:
أو لو بنتعرض لدرجة الحرارة العالية طول الوقت، زي مثلاً الناس اللي شغالة في صناعة الزجاج، وبيكونوا واقفين فترات طويلة قدام النار، وبيتعرضوا لسخونة شديدة، لأن ده طبعاً بيرفع من درجة حرارة الجسم وخصوصاً الخصية.
4. الوقوف أو الجلوس لفترات طويلة:
وكمان الوقوف أو الجلوس لفترات طويلة بيزود الضغط على الأوردة في منطقة الحوض، وده ممكن يسبب توسعها وتجمع الدم، وده بنشوفه أكتر عند الناس اللي طبيعة شغلهم بتخليهم يفضلوا في نفس الوضع لفترة طويلة، زي السائقين، وأفراد الأمن، والموظفين اللي بيقعدوا على مكتب بالساعات، أو الناس اللي شغلهم يعتمد على الوقوف المستمر زي الطباخين والحلاقين.
مضاعفات دوالي الخصية:
وبعد ما عرفنا الأسباب اللي بتؤدي إلى ظهور دوالي الخصية، تعالوا نعرف إيه هي المضاعفات اللي ممكن تسببها دوالي الخصيتين:
1. ضمور وانكماش الخصية:
دوالي الخصية خطيرة جداً على المراهقين لأنها بتسبب لهم بطء في نمو الخصية، وأيضاً على الكبار لأنها بتسبب لهم صغر وانكماش في حجم الخصية ومع الوقت ممكن يوصل لفقدان الخصية وضمورها.
2. تأخر الإنجاب والعقم:
دوالي الخصية هي السبب الرئيسي لتأخر الإنجاب، ومن هنا لازم أخدك لرحلة قصيرة علشان أعرفك إزاي دوالي الخصية هي سبب تأخر الإنجاب عند الرجال.
آلية تأثير دوالي الخصية على الخصوبة:
وهنا لازم تكون عارف أن الخصية هي المصنع اللي بتنتج الحيوانات المنوية المسؤولة عن الإنجاب، والخصية علشان تقدر تنتج حيوان منوي سليم وخالي من أي تشوه أو عيوب ويقدر يخصب البويضة ويكون جنين لازم تكون درجة حرارة الخصية أقل من درجة حرارة الجسم الطبيعية بحوالي درجتين، عشان الدم اللي يوصلها يكون دم بارد فتقدر تنتج الحيوانات المنوية.
لكن دوالي الخصية بتأثر على الخصية وبترفع من درجة حرارة الخصية وبتزيد من تراكم المواد المؤكسدة (ROS) اللي بتسبب:
- ضرر كبير على الخصية ووظيفتها في إنتاج الحيوانات المنوية
- بتضر بالحيوانات المنوية السليمة والمكتملة
- وفي الحالات المتأخرة بتسبب نقص في هرمون الذكورة واللي هيأثر على صحة وجودة الحيوانات المنوية
- وبتسبب تكسير في المادة الوراثية الموجودة في رأس الحيوان المنوي
- وبتسبب نقص في عدد الحيوانات المنوية وضعف في حركتها وزيادة في نسبة تشوهات الحيوان المنوي
وكل ده هيعيق وصول الحيوان المنوي إلى البويضة وتخصيبها وهيؤدي إلى تأخر الإنجاب.
العلاج الأمثل: الجراحة الميكروسكوبية
لكن قبل ما تفقد الأمل في الإنجاب، خليني أقولك إن كل مشكلة وليها حل، ودوالي الخصية علاجها الوحيد هو الجراحة، وقبل ما تقلق وتخاف من الجراحة، لازم تكون عارف أن عملية دوالي الخصية عملية بسيطة وسهلة جداً، واللي بيساعد أكثر في ده، هو الجراحة الميكروسكوبية باعتبارها أفضل وأحسن طريقة تعالج بيها دوالي الخصية من غير ما تضر الخصية، وده لكذا سبب:
مميزات الجراحة الميكروسكوبية:
- رؤية واضحة: لأن الميكروسكوب الجراحي بيكبر الرؤية ويخلينا نشوف مكان العملية بشكل أوضح.
- المحافظة على الشريان الخصوي: وبسبب قوة تكبير الميكروسكوب دي، بنقدر إننا نميز بين الأوردة والشرايين في الخصية ونتجنب ربط الشريان الخصوي اللي بيغذي الخصية بالدم، وبكده مش هيحصل ضمور للخصية.
- تجنب الأوعية الليمفاوية: ده غير إننا بنقدر نتجنب ربط الأوعية الليمفاوية بالغلط وقت العملية، وبكده مش هيحصلنا قيلة مائية على الخصية.
- ربط جميع الأوردة: وكمان بسبب تكبير الميكروسكوب، بنقدر نشوف كل الأوردة الصغيرة والثانوية اللي بتكون موجودة على جدار الحبل المنوي اللي بدأت تتضخم ونربطها كلها، وبكده مش هيكون في أي فرصة لرجوع الدوالي تاني بعد العملية.
- مدة العملية والتعافي: والعملية نفسها مش بتستغرق أكثر من ساعة واحدة بس، وبعدها المريض بيقدر يرجع بيته بعد 3-4 ساعات، وبيقدر كمان ينزل شغله بعد 3-5 أيام من العملية.
- العودة للحياة الطبيعية: أما بالنسبة للعلاقة الزوجية، فتقدر تمارسها بعد حوالي أسبوع واحد بس من العملية.
ولو عايز تعرف هل كل المرضى اللي عندهم دوالي في الخصية من الدرجة الثالثة هيستفيدوا من العملية، اسمع الفيديو ده مع الدكتور أسامة البكل…
نسبة نجاح العلاج:
وفي النهاية، لازم تكون عارف إن دوالي الخصية مرض طبيعي زي أي مرض، له علاج وكمان نسبة نجاح تخطت الـ 70% بالميكروسكوب الجراحي، بس مهم جداً إنك متهملش علاجها علشان متوصلش إنك تضيع فرصة إنك تكون أب ويكون عندك أطفال.
أسئلة شائعة:
متى تكون دوالي الخصية خطيرة؟
دوالي الخصية من الدرجة الثالثة هي أخطر أنواع دوالي الخصية بحيث يمكن ملاحظة أوردة الخصية بسهولة أثناء وقوف المريض، ده غير طبعاً إنها بتؤدي إلى شعور المريض بالألم ووجود مشاكل في الإنجاب.
ماذا يحدث إذا أهملت دوالي الخصية؟
إذا تم إهمال دوالي الخصية، فقد يؤدي ذلك إلى ظهور مضاعفات خطيرة، زي العقم، وانخفاض إنتاج الحيوانات المنوية، وتأخر الإنجاب.
هل دوالي الخصية تسبب العقم؟
نعم، دوالي الخصية يمكن أن تسبب العقم عند الرجال، لأنها بتؤدي إلى ارتفاع درجة حرارة الخصية وزيادة المواد المؤكسدة ROS، وده بيضر بإنتاج الحيوانات المنوية.
إحصائيات مهمة:
- 15% من الرجال يعانون من دوالي الخصية
- 40% من حالات العقم الأولي سببها دوالي الخصية
- 80% من حالات العقم الثانوي سببها دوالي الخصية
- 70%+ نسبة نجاح الجراحة الميكروسكوبية
ولو خلاص فكرت واخدت قرار العلاج، تقدر تتواصل مع الفريق الطبي على الرقم ده 01018874287، وهما هيحددولك أقرب ميعاد مع الدكتور أسامة محمد البكل مدرس واستشاري طب وجراحة أمراض الذكورة وتأخر الإنجاب والصحة الجنسية بطب القصر العيني، وحلينا نبدأ مع بعض رحلة العلاج اللي هتنتهي بالذرية الصالحة بإذن الله.
التعليقات
لا توجد تعليقات حتى الآن. كن أول من يعلق!